16 مينيسترلىك جۇمىس ىستەپ تۇرعان قازاقستان رەسپۋبليكاسىندا تاعى ءبىر، ياعني 17ء-شى مينيسترلىكتى اشۋ ۇسىنىلدى، دەپ حابارلايدى Qamshy.kz اقپارات اگەنتتىگى.

ۇسىنعان – سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى داريعا نازاربايەۆا. اتاۋى – ساۋدا مينيسترلىگى.

سەبەبى، نازاربايەۆانىڭ ايتۋىنشا، ەلىمىزدە ءتۇيىنى شەشىلمەي تۇرعان ماسەلەلەردىڭ ءبىرى – ساۋدا سالاسى ەكەن.

«بىزدە ساۋدا سالاسىندا قيىندىقتار كوپ، ونى رەتتەۋدى قاداعالاي الماي وتىرمىز، اكىمشىلىكپەن دە ماسەلە جەتەرلىك.  2018 جىلدىڭ ءبىرىنشى توقسانىندا ەلدىڭ كولىك جانە لوگيستيكا سەكتورىنداعى ءجىو 8،2% -دى قۇرادى، ءبىز كولىك جانە ينفراقۇرىلىم مينيسترلىگىن قۇردىق.  2018 جىلدىڭ ءبىرىنشى توقسانىندا ەلىمىزدىڭ كوتەرمە جانە بولشەك ساۋدا ۇلەسى جاعىنان ءجىو شامامەن 15% قۇرادى. ءبىراق ءالى ساۋدا مينيسترلىگى جوق»، - دەدى داريعا نازاربايەۆا.

نازاربايەۆانىڭ سوزىنشە، قازاقستان – ەۋرازيا كونتينەنتىندەگى ەڭ ءىرى ترانزيتتىك، كولىك-لوگيستيكالىق ورتالىق. سول سەبەپتى ساۋدا ماسەلەسىن دە جوعارى دامىتىپ الۋعا ابدەن مۇمكىن. ال ەلدەگى ساۋدا ىستەرىمەن اينالىسىپ وتىرعان ساۋدا دەپارتامەنتى ىشكى جانە سىرتقى ساۋداعا اسەر ەتەتىن قۇرالداردىڭ جوقتىعىن ايتىپ «شاعىمدانىپتى». مۇنى ەسكەرگەن داريعا نازاربايەۆا «ساۋدا ۇلەسى جاعىنان ءجىو جوعارى پايىزدى قۇرايتىن ەلدە نەگە ءالى ساۋدا مينيسترلىگى جوق؟" دەگەن سۇراقتى قويا سالدى. سۇراققا جاۋاپتىڭ قانداي بولاتىنىن بولاشاقتا بىرگە كورەمىز. 

ۇسىنعان: گۇلىم جاقان