اقپاننىڭ 6-سى كۇنگى استانادا انالار جيىلىپ، بيلىككە قوياتىن تالاپتارىن جاريا ەتتى. ولار "استانا" كونسەرت زالىندا جينالدى. جيىن اۋەلدە كونسەرت زالىندا كەزدەسۋ تۇرىندە باستالعان. الايدا جينالعاندار بيلىك وكىلدەرىنە ءوز ماسەلەلەرىن جەتكىزۋ ءۇشىن بىرىنەن سوڭ ءبىرى ساحناعا شىعىپ، سويلەدى.
جينالعان ادامدار كەزەك-كەزەگىمەن ءوز تالاپتارىن بىلدىرگەن. ولاردىڭ كەيبىرى وزدەرىن كوپ بالالى انا رەتىندە تانىستىرعان. اراسىندا وزدەرىن "التىن القا"، "كۇمىس القا" يەسى ەكەنىن ايتقاندار بار. شىعىپ سويلەگەندەردىڭ كەيبىرى مۇگەدەك بالالارى بار ەكەنىن ايتقان.
كوپ بالالى انالاردىڭ ماسەلەسى استانادا بەس بالا ورتتەن قازا تاپقان وقيعادان كەيىن قوزعالىپ وتىر.
الماتىدا دا انالار ءوز ماسەلەسىن كوتەرىپ قالا اكىمدىگىنە بارعان. اكىمدىك عيماراتىنا كەلگەن بىرنەشە ادامدى شەنەۋنىكتەر ىشكە كىرگىزگەنىمەن جۋرناليستەردىڭ كىرۋىنە رۇقسات ەتپەگەن.
بەلگىلى بولعانداي، شەنەۋنىكتەر ىشكە كىرگىزىپ العانداردىڭ اراسىندا بۇعان دەيىن استانادا بەس بالانىڭ اجالىنا سەبەپ بولعان جەكە ۇيدەگى ورتتەن كەيىن الەۋمەتتىك جەلىدە انا مەن بالانى قورعاۋ تۋرالى اكسيا وتكىزۋ تۋرالى باستاما كوتەرگەن بەلسەندىلەر دە بولعان.
انالار شىمكەنت قالاسى اكىمدىگىنە دە بارعانىمەن، اكىمدىك رۇقسات ەتسە دە ىشكە كىرمەي جارتى ساعاتتاي سىرتتا تۇرىپ تاراپ كەتكەن. مۇندا قالا اكىمدىگىن پوليسەيلەر كۇزەتىپ تۇردى. الايدا بۇل شارانىڭ قانداي ماقساتتا جۇرگىزىلىپ جاتقانى ايتىلمادى.
4 اقپانعا قاراعان ءتۇنى استانانىڭ كوكتال-1 شاعىن اۋدانىندا جەكە ءۇيدىڭ اۋلاسىنداعى ۋاقىتشا باسپانا ورتەنىپ، ءبىر وتباسىنداعى 2006، 2008، 2013، 2015 جانە 2018 جىلى تۋعان بەس قىز بالا وپات بولعان. قازا بولعان بالالار 5 اقپاندا جەرلەندى. جەرگىلىكتى بيلىكتىڭ دەرەگىنشە، ءورت بالالاردىڭ اتا-اناسى جۇمىسقا كەتكەن كەزدە بولعان. وتباسى كوپبالالى شاڭىراق رەتىندە تىركەۋدە تۇرعان.
قازاقستاننىڭ ءار ايماعىندا بولعان كوپ بالالى انالار شاعىمىنان سوڭ ۇكىمەتتە ارنايى جۇمىس توبى، كەيبىر وبلىستاردا كوميسسيالار قۇرىلعانى حابارلاندى.
AzattyqLIVE حابارىندا «كوپ بالالى انالاردىڭ تالابى قانداي؟ بۇل باستامانى كوتەرۋشىلەردىڭ ماقساتى نە؟ ماسەلەلەردى شەشۋ ءۇشىن بيلىك نە ىستەپ وتىر؟» دەگەن سۇراقتار تالقىلاندى. حابار قوناقتارى - بيلىك وكىلدەرىمەن كەلىسسوز جاساپ جۇرگەن بەلسەندىلەر ساۋلە ءابىلداحان قىزى مەن كوپ بالالى انا اقمارال باسيروۆا.
ۇسىنعان: نازەركە لابيحان
