ءبىر اپتا بۇرىن عانا فوزيلا دوسمەتوۆانى كوپشىلىگى ۇشەمنىڭ تۋىلۋىمەن قۇتتىقتاعان بولاتىن. ەكى قىزى مەن ءبىر بالاسى بار ايەل ۇشەم بوسانىپ، كوپبالالى انالار قاتارىنا قوسىلعان ەدى، دەپ جازادى Qamshy.kz اقپارات اگەنتتىگى otyrar.kz سايتىنىڭ مالىمەتىنە سۇيەنىپ.

وتكەن اپتادا دۇنيەگە كەلگەن بالالار ۋاقىتىنان ەرتە تۋىلعان، اناسىنىڭ دا جاعدايى اۋىر بولىپتى، الايدا دارىگەرلەر بالالار مەن انانىڭ ءومىرىن ساقتاپ قالعان. ال بۇگىندە فوزيلا دوسمەتوۆا بالالارىن جالعىز ءوزى باعىپ وتىرعانى بەلگىلى بولدى. سونداي-اق، بۇل وتباسىنىڭ كۇنكورىس جاعدايى تىم تومەن، وزدەرىنىڭ جەكە باسپاناسى دا جوق ەكەن. ەڭ قورقىنىشتىسى، التى بالا اناسىمەن كوشەدە قاڭعىپ قالۋدىڭ ءسال-اق الدىندا تۇر، ولاردى جالدامالى پاتەرلەرىنەن قۋىپ جاتقان كورىنەدى.

ونىڭ قۇربىسى ۇلبولسىن ابداۋالييەۆا كوپبالالى انانىڭ قانداي جاعدايدا كۇنەلتىپ جۇرگەنىن كورسەتتى. جاقىندا عانا بوسانىپ شىققان ايەلدى بالالارىمەن ەكى كۇننەن كەيىن تاعى دا اۋرۋحاناعا الىپ كەتىپتى. دارىگەرلەر ۇشەمنىڭ دەنساۋلىعىنا الاڭداپ وتىر ەكەن، ەكى بولمەلى پاتەردىڭ ءىشى سۋىق، ال جىلىتاتىن قۇرالدى پايدالانۋ تىم ءقاۋىپتى دەيدى. ايەلدىڭ قالعان ءۇش بالاسى اعاش تاقتايدىڭ ۇستىندە ۇيىقتايتىن كورىنەدى جانە ءۇيدىڭ ىشىندە شومىلىپ، كىر جۋادى ەكەن. ءبىر سوراقىسى، جاقىن ارادا كوپبالالى وتباسى بۇل پاتەرلەرىنەن دە ايىرىلماق. جالدامالى پاتەردىڭ يەسى وتباسىنان جاقىن كۇندەرى ءۇيدى بوساتۋىن تالاپ ەتىپتى.

«ولار بۇل ۇيدە ەكى جىلدان بەرى تۇرىپ كەلەدى. ال ءقازىر بۇلارعا كوشىڭدەر دەپ ايتىپ جاتىر. بىرىنشىدەن، بۇل وتباسىنىڭ ۇلكەن قارىزى بار. ەكىنشىدەن، ولار جىلىتاتىن پەشتى قولدانىپ وتىر. ءۇيدىڭ يەسى استاناداعى قايعىلى وقيعا قايتالانا ما دەپ قورقۋدا. ەندى بۇل وتباسى قايتپەك؟ قاي جەردى پانالايدى؟» - دەيدى قۇربىسى.

بالالارىنىڭ ۇلكەنى 17 جاستا – گۋزال دوسمەتوۆا، كەيىن 16 جاستاعى شاديار – ەكەۋى جاقىن ماڭداعى دۇكەننەن ازىق-تۇلىكتى قارىزعا الادى ەكەن. ەكى ءجاسوسپىرىم مەكتەپتە وقيدى، ءبىراق ولاردىڭ اۆتوبۋسقا مىنەتىن اقشالارى دا جوق. انالارى اۋرۋحانادا كەزدە كورشىلەرى قولدارىنان كەلگەنشە كومەكتەسىپ وتىرىپتى. گۋزالدىڭ ايتۋىنشا، مۇنداي اۋىر جاعدايدا تۇرىپ جاتقاندىقتان، مەكتەپتە وقۋ ۇلگەرىمدەرى دە ايتارلىقتاي جاقسى ەمەس ەكەن.

«ءبىزدىڭ جاعدايىمىز تىم قيىن، ءبىز دە بارلىق ادامدار سەكىلدى جاقسى ءومىر سۇرگىمىز كەلەدى، انامىزدى قاتتى ساعىندىق. ولمەستىڭ كۇيىن كەشىپ ءجۇرمىز. مەكتەبىمىز ۇيدەن تىم الىستا ورنالاسقان، اۆتوبۋسقا مىنەتىن اقشامىزدى ازىرگە انامنىڭ قۇربىسى بەرىپ وتىر. ازىق-تۇلىكتى دە قارىزعا الىپ وتىرمىز، ءبىراق ونى دا قاشانعا دەيىن قارىزعا بەرە بەرەدى ەكەن... ماعان ۇبت-عا دايىندالۋ كەرەك، ءبىراق ءقازىر وعان ءتىپتى مۇمكىندىك جوق. مەكتەبىمىز الىستا بولعاندىقتان ەكى اۆتوبۋسپەن بارامىز. ال ەندى باسپانامىزدان دا ايىرىلايىن دەپ وتىرمىز...» - دەيدى گۋزال دوسمەتوۆا.

زاڭگەر نۇربول نۇرحانوۆ بۇل وتباسىنىڭ جاعدايىن ەستي سالا كومەكتەسۋگە نيەت بىلدىرگەن. ول كوپبالالى اناعا مەملەكەتتەن الەۋمەتتىك كومەك الۋ ءۇشىن قۇجاتتارىن دايىنداۋعا كومەكتەسىپ ءجۇر.

ايتا كەتەيىك، فوزيلا دوسمەتوۆا بىرەر جىل بۇرىن ەكى بالاسىمەن جەسىر قالعان. كەيىن ەكىنشى رەت قۇرعان وتباسى ءساتسىز بولسا، ءۇشىنشى كۇيەۋى بۇل ايەلدىڭ اياعى اۋىر ەكەنىن بىلگەننەن كەيىن وزبەكستانعا قاشىپ كەتىپتى. بۇدان بولەك، وتباسىنىڭ 800 مىڭ تەڭگە نەسيەسى بار ەكەن، ءبىراق ونى تولەۋگە كوپبالالى انانىڭ جاعدايى جەتپەيدى.

ۇسىنعان: نازەركە لابيحان