ءماجىلىس دەپۋتاتى ازات پەرۋاشيەۆ استانادا بەس بالانىڭ ءومىرىن قيعان جويقىن ءورت پەن وعان كىنالىلەر تۋرالى پىكىرىن ءبىلدىردى، دەپ حابارلايدى Qamshy.kz اقپارات اگەنتتىگى Sputnik قازاقستان ءتىلشىسى سايتىنىڭ دەرەگىن نەگىزگە الىپ. 

دەپۋتات كىنالى ادامدى ىزدەۋ دۇرىس ەكەنىن، مۇنداي دۇنيەنى بەي-جاي قالدىرۋعا بولمايتىنىن ايتتى.

"استاناداعى تراگەديامەن قاتار، قىزىلوردادا ءۇش بالا، ەكى كۇننەن كەيىن پاۆلوداردا بۇتىندەي ءبىر وتباسى قازا بولدى، سودان كەيىن شىمكەنتتەگى قايعىلى وقيعا. كوپتەگەن ميللياردتاعان بيۋدجەتى بار قىزمەتتەر بولسا دا، وكىنىشكە قاراي، ءورت قاۋىپسىزدىگى، ادامداردىڭ قاۋىپسىزدىگى ماسەلەسى بىزدە ەكىنشى ورىنعا سىرعىپ كەتىپ جاتىر"، دەدى پەرۋاشيەۆ.

پەرۋاشيەۆ ءاربىر مينيستر ساياساتكەر رەتىندە ءوز سوزىنە جاۋاپ بەرۋى كەرەكتىگىن اتاپ ءوتتى.

"ءاربىر شەنەۋنىك ءوز جۇمىسى ءۇشىن جاۋاپكەرشىلىكتەن باس تارتپاۋى كەرەك. ءابىلقاسىموۆا 16 مىڭ تەڭگە كوپ دەدى. مەنىڭشە، بۇل - ۇلكەن قاتەلىك. ءبىراق، بۇل قاتەلىكتىڭ جۋىرداعى تراگەدياعا تىكەلەي قاتىسى جوق...ول ءۇي بۇل سوزدەن كەيىن جانىپ كەتكەن جوق، ءبىز وسىنى ءتۇسىنۋىمىز كەرەك"،  دەدى ماجىلىسمەن.

دەسە دە، دەپۋتات ءابىلقاسىموۆا مينيستر رەتىندە الەۋمەتتىك سالاعا جاۋاپتى ەكەنىن، سوندىقتان حالىقتى مازالاعان پروبلەمالاردى ۇكىمەت الدىنا قويۋ قاجەتتىگىن قاداپ ايتتى.

"ول ۇكىمەتتە وتىرعان ويىنشىق ەمەس. مەن ءابىلقاسىموۆا حانىمدى قۇرمەتتەيمىن، ءبىراق مينيستر رەتىندە ول الەۋمەتتىك سالاعا جاۋاپتى. سوندىقتان حالىقتىڭ تالابى ورىندى دەپ سانايمىن. ءمينيستردى وتستاۆكاعا كەتىرۋ كەرەك پە؟ جۇرتشىلىق مينيستردەن قانداي دا ءبىر ارەكەتى ءۇشىن جاۋاپكەرشىلىكتى تالاپ ەتۋگە قۇقىلى. ءاربىر مينيستر ءوز سالاسىنا جاۋاپ بەرۋى ءتيىس"، - دەدى پەرۋاشيەۆ.

ول ەڭبەك جانە حالىقتى الەۋمەتتىك قورعاۋ ۆيسە-مينيسترى سۆەتلانا جاقىپوۆانىڭ "اتا-انالاردىڭ تۇندە جۇمىس ىستەۋى – ولاردىڭ تاڭداۋى" دەگەنىنە قاتىستى دا پىكىرىن ءبىلدىردى.

"اتا-انا شاراسىزدىقتان بارىپ وتىر مۇنداي قادامعا. ەڭبەك جانە حالىقتى الەۋمەتتىك قورعاۋ مينيسترلىگى نەگە كوپ بالالى اتا-انالاردى تۇندە جۇمىس ىستەۋگە جىبەرەدى؟"،  دەپ اشۋلاندى دەپۋتات.

ونىڭ ايتۋىنشا، ءماجىلىستىڭ جالپى وتىرىسىندا "اق جول" فراكسياسى كوپبالالى وتباسىلارعا تولەنەتىن الەۋمەتتىك جاردەماقى، باسپانا ماسەلەسىن تاعى دا كوتەرەدى.

پەرۋاشيەۆ ءورت قاۋىپسىزدىگى ماسەلەسى ايماقتىق ەمەس، بارلىق وڭىردە كەزدەسەتىن جۇيەلى پروبلەما ەكەنىن اتاپ ءوتتى.

"ورتكە قاتىستى ايتار بولساق، بۇل توتەنشە جاعدايلار كوميتەتىنىڭ تىكەلەي جاۋاپكەرشىلىگى. وتستاۆكا تۋرالى ءسوز قوزعاساق، ىشكى ىستەر مينيسترلىگىنىڭ توتەنشە جاعدايلار كوميتەتىنىڭ وتستاۆكاسى تۋرالى ايتۋىمىز كەرەك. بۇل ولاردىڭ تىكەلەي جۇمىسى"، - دەدى دەپۋتات.

ەستەرىڭىزگە سالا كەتەيىك، ءبىر وتباسىنداعى بەس بالانىڭ ءومىرىن جالماعان ءورت استانادا كوكتال-1 اۋدانىندا بولدى. ءاپالى-سىڭلىلى بەس قىز تۇندە ۇيدە جالعىز قالعان، اتا-اناسى جۇمىستا بولىپتى. ءورت سالدارىنان 2006، 2009، 2014، 2016 جانە 2018 جىلدارى تۋعان بەس بالا كوز جۇمدى.

ۇسىنعان: اسەل بولات قىزى