"قازاق-قىرعىز شەكاراسىنان تابىلعان قىزدىڭ تۋىستارى ىزدەستىرىلىپ جاتىر" دەپ جازادى Qamshy.kz اقپارات اگەنتتىگى ktk.kz سايتىنىڭ دەرەگىن نەگىزگە الىپ. تارازدا ءاتى-جونى عانا بەلگىلى بويجەتكەننىڭ تۋىستارى ىزدەستىرىلىپ جاتىر. ءقازىر قازاق-قىرعىز شەكاراسىنان تابىلعان جاس شاماسى 22-دەگى قىز بەيىمدەۋ ورتالىعىندا. مۇنداعى ماماندار ونىڭ قۇجاتتارىن راسىمدەي الماي قينالۋدا. سەبەبى تۇرعىلىقتى مەكەن جايىن بىلمەيدى. سوندىقتان ورتالىق قىزمەتكەرلەرى بويجەتكەندى تانىعاندارعا حابارلاسۋدى سۇرايدى.

ءاتى-جونىن ەمىس-ەمىس ەسىنە تۇسىرگەن التىناي تۇرسىنوۆاعا ەجىكتەپ سويلەۋدىڭ ءوزى قيىن. اقىل ەسىندە اۋىتقۋشىلىعى بار، ءارىپ تانىمايتىن، ساناۋدى دا بىلمەيتىن بويجەتكەننىڭ وقىماعانى بايقالادى. ال جاس شاماسى 20-دان اساتىن قىز ءوزىن "ۇشتەمىن" دەيدى.    

التىناي تۇرسىنوۆا:

— ۇيدەن نە ءۇشىن شىعىپ ەدىڭ؟

— انام اراق ءىشىپ، ۇرعاسىن شىعىپ كەتتىم.

— ۇرا ما سەنى؟

— اكەڭ ەكەۋى بىرگە ىشە مە؟

— ءيا.

قىزدىڭ اكە-شەشەسى، ەكى باۋىرى بار كورىنەدى. ونىڭ ايتۋىنشا، ىشكىلىككە جاقىن اتا-اناسىنان ءجيى ءجابىر كورگەندىكتەن، قاشىپ قۇتىلعان. ءسويتىپ اداسىپ جۇرگەن التىنايدى شەكارا شەبىنەن ءتارتىپ ساقشىلارى تاۋىپ الىپتى. 

بوتاكوز قالقابايەۆا، تاراز قالالىق ومىرلىك قيىن جاعدايدا قالعان ادامداردى قايتا الەۋمەتتەندىرۋگە ارنالعان ورتالىق پسيحولوگى:

— قىزدا قورقىنىش سەزىمى بار، ەموسيالىق جاعىنان تۇراقسىز. بويىندا قورقىنىش سەزىمى قالىپتاسىپ قالعان. ءتىپتى جاۋاپ بەرۋگە قورقاقتايدى. ورتالىققا ەكى جەتى بۇرىن تاپسىرىلعان مىنا قاريانىڭ دا تاعدىرى قيىن، - دەيدى. 

اقىل ەسىنىڭ اۋىتقۋى بار اقساقال "وتكەن عاسىردىڭ 20-جىلدارى تۋىلعانمىن" دەيدى. ءبىراق جاسىم 20-دا دەپ وتىر. الماتىدا جالدانىپ جۇمىس جاسادىم دەگەن ول تارازدا قايدان جۇرگەنىن تۇسىندىرە المادى. كۇش-قۋاتى ءالى سارقىلا قويماعان باحۋددين اتا تەڭگەنى تۇڭعىش كورىپ تاڭقالدىردى.

— مىناۋ قانشا تەڭگە؟

— 10 مىڭ

— ال مىناۋ شە؟

— 5 مىڭ

— مىناۋ ون، مىناۋ بەس مىڭ دەيسىز بە؟

— تاپتىم مەن.

التىناي مەن باحۋددين اقساقال دا تۇرعىلىقتى مەكەن -جايىن بىلمەيدى. سوندىقتان ەكەۋدىڭ جەكە باسىن انىقتاپ، قۇجات راسىمدەۋ قيىندىق تۋعىزۋدا. ال ورتالىق قىزمەتكەرلەرى بۇلاردى تانىعاندار بولسا، حابارلاسۋدى سۇرايدى. 

ۇسىنعان: اسەل بولات قىزى