ەلباسى «قازاقستاننىڭ 100 جاڭا ەسىمى» جوباسىنىڭ جەڭىمپازدارىمەن كەزدەسۋى بارىسىندا حالىقارالىق اسكەري جۋرناليست، فوتوگراف نازگۇل كەنجەتاي سيرياداعى سوعىس جايلى ايتىپ بەردى، دەپ جازادى Qamshy.kz اقپارات اگەنتتىگى.

بۇۇ جانە يۋنيسەف-پەن سەرىكتەس بولعان نازگۇل كەنجەتاي تۇركيا مەن سيرياعا ءجيى ساپارلايتىن. ماقساتى دا ايقىن – سوعىستىڭ شىنايى كەلبەتىن كورسەتۋ.

«وزدەرىڭىزگە ءمالىم، الەمنىڭ ءار بۇرىشى ءتۇرلى ساياسي، ديپلوماتيالىق، ستراتەگيالىق تاعى دا باسقا كونفليكتىگە تولى. سونىڭ ءبىرى – تاياۋ شىعىستاعى سيريا. 2014 جىلدان بەرى ستۋدەنت بولسام دا قيىن ماسەلەلەردى تەرەڭىنەن زەرتتەۋدى جاقسى كوردىم. نازىك عانا بويىم ۇلكەن جاۋاپكەرشىلىكتى ارقالايتىن دا جۇرەتىن. وسى جولدا «جۇماقتا تاماق كوپ پە؟» دەپ سۇراعان بالانى دا، وزەننەن اعىپ بارا جاتقان بالانىڭ ءولى دەنەسىن دە، ءوز تۋىن جەرگە تاپتاعان حالىقتى، ولاردى قورعاۋعا كۇشى جەتپەگەن ەركەكتەردى دە كوردىم. مۇنىڭ ءبارىن كورىپ قانا قويعان جوقپىن، الەمگە كورسەتۋگە تىرىستىم. ءوز وتانى بولماۋ دەگەننىڭ قانداي قاسىرەت ەكەنىن كورسەتۋدى ماقسات تۇتتىم»، - دەدى نازگۇل كەنجەتاي.

ءجۋرناليستىڭ زەرتتەۋلەرى شەتەلدە جوعارى باعالانعان.

«بۇگىن ءبىزدىڭ قازاقستان تەك ورتالىق ازيادا ەمەس، ناعىز قازاقتار، قازاق جۋرناليستەرى، قازاق ءتىلى ءومىر سۇرەتىن جەردە ورنالاسقان. جاھاندانۋ دەگەنىمىز – وسى»، - دەدى نازگۇل كەنجەتاي.

ۇسىنعان: گۇلىم جاقان