الەمگە "حيدجابتاعى مۇز حانشايىمى" رەتىندە تانىمال بولعان زاحرا لاري كىم؟ وقىرمان نازارىنا ۇسىنادى Qamshy.kz اقپارات اگەنتتىگى.

زاحرا لاري – بىرىككەن اراب امىرلىكتەرىنىڭ مانەرلەپ سىرعاناۋشىسى. حالىقارالىق جارىستارداعى بىرىككەن اراب امىرلىكتەرىنىڭ ءبىرىنشى فيگۋريستى. الەمگە "حيدجابتاعى مۇز حانشايىمى" رەتىندە تانىمال.

1995 جىلى 3 ناۋرىزدا دۇنيەگە كەلگەن زاحرانىڭ اكەسى – بىرىككەن اراب امىرلىگىنىڭ ازاماتى، ال اناسى امەريكالىق.

12 جاستان باستاپ كونكيمەن سىرعاناۋدى باستاعان. زاحرانىڭ ايتۋىنشا، ول الدىمەن اناسىنان وسى سپورت تۇرىمەن شۇعىلدانۋعا رۇقسات سۇرايدى. الايدا اناسى رۇقسات ەتپەگەن، ال اكەسى كەلىسكەندەي بولادى. زاحرا كاسىبي دەڭگەيدە سىرعاناۋ مۇمكىندىگىنە يە بولعان كەزدە، كەرىسىنشە اكەسى تۇبەگەيلى قارسى بولادى، ءبىراق اناسى وسى جولى قىزىن قولداپ، اكەسىن كوندىرۋگە كومەكتەسكەن.

زاحرانىڭ اناسى رۋكاي كارەن كۇيەۋىن قىزىنىڭ جارىستارعا قاتىسا الاتىنىنا جانە وعان قاتىسۋى كەرەك ەكەندىگىنە سەندىرۋ وڭاي بولماعانىن ايتادى. باستاپقىدا اكەسى زاحرانىڭ ونەرىن ەرلەر اۋديتورياسىنىڭ الدىنداعى قىزىنىڭ ءبيى رەتىندە قابىلداعان. ءبىراق كەيىن قىزىنىڭ مۇزدا قانشالىقتى ادەمى ەكەنىن كوردى. ول زاحرانى قاتتى جاقسى كورەتىنىن جانە ونىڭ باقىتتى بولعىسى كەلەتىنىن تۇسىنەدى. سونىمەن قاتار زاحرا حيدجابىن شەشپەدى، يسلامعا قارسى ەشتەڭە جاسامادى.

2007 جىلى زاحرا لارري ءوز ومىرىندەگى العاشقى سپورتتىق جارىسىن جەڭىپ الدى. 2012 جىلى يتاليادا حالىقارالىق دەڭگەيدە وتكەن ءبىرىنشى بايقاۋدا جەڭىمپاز اتاندى.

زاحرا لاري بىرىككەن اراب امىرلىكتەرىنىڭ حالىقارالىق دەڭگەيگە شىققان جانە ءبىرىنشى بولىپ حيدجابپەن بيلەگەن العاشقى مانەرلەپ سىرعاناۋشى اتاندى، سونداي-اق زاحرا ءلاريدىڭ ارقاسىندا بىرىككەن اراب امىرلىكتەرى حالىقارالىق مانەرلەپ سىرعاناۋشىلار وداعىنىڭ تۇراقتى مۇشەسى اتانعان العاشقى تاياۋ شىعىس ەلى بولدى.

بۇقارالىق اقپارات قۇرالدارىنا  زاحرا لاري «حيدجابتاعى مۇز حانشايىمى» رەتىندە تانىلدى. مانەرلەپ سىرعاناۋشىنىڭ ايتۋىنشا، بۇل لاقاپ وعان وتە ۇنايدى، سەبەبى ول مۇز ايدىنىنا امەريكالىق "Ice Princess" ءفيلمىن كورگەننەن كەيىن كەلگەن.

"مەن بۇل ءفيلمدى قاتتى ۇناتامىن، ونى جۇزدەن اسا رەت كوردىم! مەن وزىمە: "مىنە، مەن دە وسىلاي ىستەگىم كەلەدى" دەدىم".

 "مەن بارلىق قىزدارعا وزدەرىنىڭ ۇناتاتىن ىستەرىمەن شۇعىلدانۋىن جانە دەنساۋلىقتارى مىقتى بولىپ، ساتتىلىك سەرىگى بولسىن دەپ تىلەيمىن. سپورتپەن شۇعىلدانسا دەيمىن. كىشكەنتاي تاستاي كەدەرگىلەر تاۋداي بولىپ كورىنبەسىن. بارلىعى ءوز ارماندارىنا قول جەتكىزىپ، ادامدار اراسىنداعى ايىرماشىلىقتاردى ىزدەۋگە ەمەس، ۇقساستىقتاردى كورۋگە تىرىسسا ەكەن. بۇل مەنىڭ بارلىق تىلەگىم"، - دەيدى ول.

زاحرا ءلاريدىڭ ايتۋى بويىنشا، ونى العا جەتەلەيتىن قانشاما قۇلاپ، تالپىنىپ جاساعان جاتتىعۋ مەن ەڭبەكتەن كەيىن ەڭ سوڭىندا ءمىنسىز تريۋك جاساپ، قيىندىقتى جەڭۋ سەزىمى ەكەن.

"مەنىڭ ەلىمدە قىزدار سپورتپەن از شۇعىلدانادى، اسىرەسە مانەرلەپ سىرعاناۋمەن. مەن مۇزدا كۇندە ساعات 7:30-عا دەيىن جانە ساعات 16:00-دە تاعى ءبىر جارىم ساعات سىرعانايمىن" دەيدى زاحرا. "بۇل قيىن ەمەس، مەن كونكيمەن سىرعاناۋدى وتە جاقسى كورەمىن جانە تابىسقا جەتۋدى قالايمىن".

قازىرگى كۇنى زاحرا لاري ابۋ-دابي ۋنيۆەرسيتەتىندە وقيدى جانە ول بۇرىنعى رەسەيلىك مانەرلەپ سىرعاناۋشى الەكساندرا ييەۆليەۆانىڭ شاكىرتى.