1940 جىلى گيتلەر الەمدى قالتىراتىپ تۇرعاندا، ۇلىبريتانيانىڭ پرەمەر-مينيسترى ءارى قورعانىس ءمينيسترى بولىپ 65 جاستاعى ۋينستون چەرچيلل سايلانادى. ونىڭ پارلامەنتتە ءوز ۇلتىنا ارناعان العاشقى ءسوزى بىلاي باستالعان: «مەنىڭ سەندەرگە قان مەن تەردەن، كوز جاسى مەن اۋىر ەڭبەكتەن باسقا ۇسىنارىم جوق». ونىڭ وسى ءسوزىنىڭ ناتيجەسى بۇكىل الەمگە بەلگىلى. چەرچيلل 1951 جىلى 77 جاسىندا ەكىنشى رەت پرەمەر-مينيستر بولىپ سايلانىپ، 1955 جىلعا دەيىن 81 جاسىنا دەيىن تاقتا وتىردى.

 ەكىنشى دۇنيەجۇزىلىك سوعىستان سوڭ فرگ-نىڭ تۇڭعىش كانسلەرى بولىپ 73 جاستاعى كونراد ادەناۋەر تاققا وتىردى. قازىرگى گەرمانيانىڭ نەگىزىن سالعان  ول 14 جىل تاقتا وتىرىپ، 1963 جىلى 87 جاسىندا دوعارىسقا كەتكەن. وسى ۋاقىت ىشىندە ول سوعىستان قيساپسىز قيراپ شىققان  ەلىنە الەمدىك جەتەكشى دەرجاۆا دارەجەسىن  قايتارىپ بەردى.

 1953 جىلى اقش-تىڭ 34-پرەزيدەنتى بولىپ 63 جاستاعى دۋايت ەيزەنحاۋەر تاققا وتىردى. 1956 جىلى 66 جاسىندا ول ەكىنشى قايتارا پرەزيدەنت بولىپ سايلانادى. كارى تارلاننىڭ كورەياداعى سوعىستى توقتاتىپ، كوممۋنيستىك سەنىمدەگى عالىمدار مەن قايراتكەرلەردى قۋعىنداۋدى توقتاتقانىن ايتساق تا جەتەدى.

 گەنەرال شارل دە گولل 68 جاسىندا فرانسيانىڭ باسشىسى بولىپ سايلانعان. ناتو-مەن بايلانىسىن ءۇزىپ، فرانسۋزعا باعىنىشتى ەلدەرگە تاۋەلسىزدىك اپەرگەن ول 1965 جىلى 75 جاسىندا فرانسيا پرەزيدەنتى بولىپ ەكىنشى قايتارا سايلانادى.

 جۇڭگو رەفورماسىنىڭ اتاسى سانالاتىن دەن سياوپين 1976 جىلى 72 جاسىندا كوممۋنيستىك قىتايدى باسقارعان. جۇڭگو ءقازىر الەمدەگى ەكىنشى دەرجاۆا بولسا، ول – وسى دەن ءسياوپيننىڭ ەڭبەگىنىڭ ارقاسى. 1989 جىلى 85 جاسىندا بيلىك بۇتاعىنان ءبىرجولا كەتسە دە ول  ۇلتىنىڭ رۋحاني كوسەمى بولىپ قالدى. جۇڭگو حالقى ءۇشىن ول تەڭدەسسىز بەدەل يەسى.

          رونالد رەيگان 1980 جىلى 69 جاسىندا اقش پرەزيدەنتى بولىپ سايلاندى. ەكىنشى رەت قايتا سايلانىپ، 1989 جىلى 77 جاسىندا تاقتى بوساتتى. ونىڭ ورنىنا 65 جاستاعى  دجوردج بۋش وتىردى. 2008 جىلى 72 جاستاعى دجون ماككەيننىڭ باراك وبامامەن بىرگە اقش پرەزيدەنتتىگىنە تاققا تالاسقانىن ۇمىتقان جوقپىز. فرانسيانى فرانسۋا ميتتەران 78 جاسىنا دەيىن بيلەدى.

 ءيزرايلدى پرەزيدەنت  شيمون پەرەس 91 جاسىنا دەيىن بيلەپ، 93 جاسىندا قايتىس بولدى. جاھاندىق وكىمەتتىڭ ۇشار باسىندا ءدال ءقازىر 96 جاستاعى گەنري كيسسيندجەر مەن بۇدان ەكى جىل بۇرىن   102 جاسىندا قايتىس بولعان ديەۆيد روكفەللەردىڭ تۇرعانىن دا ۇمىتپايىق. 89 جاسىندا قايتىس بولعان  بجەزينسكييدى ايتپاعاندا، ءقازىر 89 جاستاعى سوروستىڭ  الەمدىك اقشا ساياساتىندا قالاي اتوي سالىپ جۇرگەنىن ايداي الەم بىلەدى.  مىنە، امەريكانىڭ اقيقاتى.

  وسى مىسالدارعا قاراپ-اق مەملەكەتتىك قايراتكەرلەردىڭ تابىستى بولۋىندا جاس مولشەرى ەمەس، جەكە ساپالىق قاسيەتتەرى باستى ءرول اتقاراتىنىنا  كوز جەتكىزۋگە بولادى. ەل باسىنا اۋىر قيىنشىلىق تۋعاندا كوپتەگەن مەملەكەتتەردىڭ جاسى شاۋ تارتسا دا اسا تاجىريبەلى قايراتكەرلەردى بيلىك باسىنا وتىرعىزعاندارىنا كارى تاريحتا مىسال كوپ.