ق ر اقپارات جانە كوممۋنيكاسيا ءمينيسترى داۋرەن ابايەۆ اككرەديتاسيانىڭ جاڭا ەرەجەلەرى جايىندا «حابار» تەلەارناسىنداعى «اشىق سۇحبات» باعدارلاماسىندا ايتىپ بەردى، دەپ جازادى Qamshy.kz اقپارات اگەنتتىگى.

ابايەۆتىڭ ايتۋىنشا، مۇنداي ەرەجەنى ۇسىنعان باق-تاعى باس رەداكتورلاردىڭ وزدەرى ەكەن.

«ءبىز ەشقانداي ەرەجەنى قاتاڭداتپادىق. ول ەرەجەلەر 2013 جىلى قابىلدانىپ قويعان. ءبىز تەك اككرەديتاسيا بويىنشا ەكى پۋنكت ەنگىزدىك. ءبىرىنشىسى – ءجۋرناليستىڭ قانداي دا ءبىر شاراعا قاتىسۋى ءۇشىن رەگلامەنتتىڭ ساقتالۋىنا جازباشا كەلىسىمى كەرەك. بۇل، مەنىڭشە، قالىپتى پراكتيكا. ءسىز مۇراجايعا، كىتاپحاناعا بارعاندا، نەگىزگى ەرەجەلەردى ساقتايسىز عوي؟ مەملەكەتتىك ورگاندارمەن دە سولاي. ءارقايسىسىنىڭ ءوز رەگلامەنتى بار. ونى ورىنداۋدىڭ ەش قيىندىعى جوق»، - دەدى ول.

ال اككرەديتاسيا ەرەجەسىنە ەنگىزىلمەك ەكىنشى پۋنكت – جۋرناليسپەن بىرگە باق-پەن كەلىسىمىن ناقتىلايتىن قۇجاتتىڭ كوشىرمەسى بولۋى مىندەتتى. ابايەۆ مۇنداي باستاماعا كەيبىر باس رەداكتورلار سەبەپكەر بولعانىن ايتادى. سەبەبى، كوپ جاعدايدا جۋرناليست ەشبىر رەداكسيادا جۇمىس ىستەمەگەنىمەن شارالارعا سول ۇيىمنىڭ ءجۋرناليسى رەتىندە قاتىسا بەرەدى ەكەن.

«جۋرناليستەر بۇل ەرەجەلەرگە جاپپاي قارسىلىق تانىتىپ جاتىر. ءار اككرەديتاسيا سايىن ەڭبەك كەلىسىمشارتىن بەرۋگە قارسى. بىرىنشىدەن، بۇعان تەك جۇمىس ىستەيتىن ورىننان انىقتاما، قىزمەت كورسەتۋ تۋرالى كەلىسىم جانە ەڭبەك كەلىسىمشارتى. ەكىنشىدەن، جۋرناليست بۇلاردى كۇن سايىن الىپ جۇرمەيدى. وسى ەرەجەلەرگە ساي، بارلىق شاراعا اككرەديتاسيا جىلىنا ءبىر رەت قانا بولادى. بۇل ءجۋرناليستىڭ دە، مەملەكەتتىك ورگاننىڭ دا پروسەدۋراسىن قىسقارتادى»، - دەدى مينيستر.

 نورماتيۆتىك قۇقىقتىق اكتىلەر ەلەكتروندىق بازاسىندا اقپاننىڭ 13-كۇنى جاريالانعان بۇيرىق جوباسىندا مينيسترلىكتىڭ 2013 جىلعى ماۋسىمداعى "جۋرناليستەردى اككرەديتاسيالاۋ قاعيدالارىن بەكىتۋ تۋرالى" №138 بۇيرىعىنا ءبىرقاتار تولىقتىرۋ ەنگىزۋ قاراستىرىلعان.

قۇجات جوباسى بويىنشا، ءىس-شارادان حابار دايىندايتىن جۋرناليست اككرەديتاسيا بەرۋشى مەكەمەگە جەكە باس كۋالىگىنىڭ كوشىرمەسىن تاپسىرىپ، مەكەمەنىڭ ىشكى ءتارتىبىن ساقتاۋعا جانە مودەراتور بەلگىلەگەن رەگلامەنتتىڭ ساقتالۋىنا جازباشا كەلىسىم بەرۋى جانە جۋرناليست پەن ب ا ق اراسىنداعى كەلىسىم-شارتتىق قارىم-قاتىناستىڭ بارىن راستايتىن قۇجات كوشىرمەسىن ۇسىنۋى ءتيىس.

ەگەر تىلشىدە وسى قۇجاتتار جەتىسپەگەن جاعدايدا نەمەسە ءوتiنiشتiڭ مازمۇنى تالاپتارعا سايكەس بولماسا، سونىمەن بىرگە جيىن، وتىرىستار مەن باسقا دا ءىس-شارالار وتەتىن عيماراتتا جۋرناليستەردى ورنالاستىرۋ مۇمكىندىگى بولماعان جاعدايدا مەكەمە ءجۋرناليستى تىركەۋدەن باس تارتۋى مۇمكىن ەكەنى ايتىلعان.

ۇسىنعان: گۇلىم جاقان