ەتنيكالىق قازاق سايراگۇل ساۋىتباي كۇنى كەشە ابزال قۇسپاننىڭ ادۆوكاتتاعىنان باس تارتاتىنى تۋرالى ۆيدەو مالىمدەمە جاريالاعان ەدى. ەندىگى ونى ايمان وماروۆا قورعايتىن بولدى. وسى ۋاقىتقا دەيىن ءتۇرلى ۆيدەولار جاريالاپ، ابزال قۇسپانعا رەنىشىن ءبىلدىرىپ جۇرگەن سايراگۇل ساۋىتبايدىڭ مۇنداي شەشىم قابىلداۋىنا نە سەبەپ بولدى؟ مۇنىڭ جاۋابىن بۇرىنعى ادۆوكاتى ابزال قۇسپاننان دا سۇراۋدى ءجون كوردىك. ادۆوكاتتىڭ قورعالۋشىسىنا دەگەن وكپەسى قارا قازانداي.

♦سايراگۇل ساۋىتبايدىڭ كۇيەۋى: قىتايعا قايتارسا، ونى ءولىم جازاسىنا كەسەدى

♦حالىقارالىق قۇقىق نەگىزگە الىنىپ، سايراگۇل ساۋىتباي بوستاندىققا شىقتى

«جاسىراتىنى جوق، ساۋلە (ءابىلداحان قىزى – رەد.) مەن سايراگۇلدىڭ جاعدايىندا مەن تولىق ساۋلەنىڭ جاعىنداعى اداممىن. ويتكەنى، ساۋلەنىڭ ەڭبەگىنە، ىنتاسىنا كۋامىن. ەڭ باستىسى، ادامدا كوڭىل دەگەن بولادى. ساۋلەنى جاقسى بىلەمىن. سول ءۇشىن كەزىندە سايراگۇلگە «مۇنىڭ ادامگەرشىلىككە جاتپايدى» دەپ رەنىشىمدى ايتقان ەدىم. ءارى وزىنە تىكەلەي «مەنىڭ ادۆوكاتتاعىمنان ءوزىڭ باس تارتپاساڭ، مەن سەنى سوڭىنا دەيىن قورعايمىن» دەدىم. ءبىراق قاتتى رەنجىگەنىمدى جاسىرمادىم. سوعان بايلانىستى بولار دەپ ويلايمىن، بىلمەيمىن.

♦سايراگۇل ساۋىتباي: ابزال قۇسپاننىڭ ادۆوكاتتىعىنان باس تارتامىن (ۆيدەو)

ءوزى ماعان ەش وكپەسى جوق ەكەنىن ايتتى. باستاپقى كەزدەردە "تەلەفون كوتەرمەدىڭ" دەپ رەنجىگەن. سوندا مەن سايراگۇلگە: «كوز الدىڭا ەلەستەتشى، قىزىڭ ۇكىلىاي و دۇنيەلىك بولسا، ەشتەڭە بولماعانداي جۇمىس ىستەپ، تەلەفونمەن سويلەسىپ وتىرا الاسىڭ با؟» دەدىم. ال مەن سايراگۇلدىڭ ءبىر دە ءبىر سوتىنا، ءبىر دە ءبىر جينالىسىنا بارماي قالماق تۇگىلى، كەشىگىپ تە كورگەن ادام ەمەسپىن. ءبارىن ۋاقىتىلى ۇيلەستىرىپ ءجۇردىم. ال قاڭتاردىڭ 4 كۇنى رەسپۋبليكالىق كوشى-قون كوميتەتىنەن "قاناعاتتاندىرماۋ" تۋرالى جاۋاپ الدىم، وسىعان قاتىستى سوتقا شاعىم جازباق بولدىم. اۋىر قازاعا تاپ بولعانىما قاراماستان، سايراگۇلدىڭ ماسەلەسى جونىندە تالاپ-ارىز جازىپ، سوتقا تىركەتتىم. سول كەزدە ول حالىققا ۆيدەو مالىمدەمە جاسايدى. ايتقانى – ابزال قۇسپان مەن حابارلاسقاندا تۇتقانى كوتەرمەدى. ارينە، اشۋلاندىم. سوتقا دايىنداپ قويعان تالاپ-ارىزىمدى اكەلدىم. سوندا سايراگۇل كەشىرىم سۇراپ، قايتادان مەنىڭ قورعاۋىمدى ءوتىندى. كەلىستىم. ال نەگىزى، قاتتى رەنجىگەنمىن.

♦تۇرمەدەگى سايراگۇل ساۋىتباي ەلباسىعا حات جازدى: وتباسىممەن قاۋىشقىم كەلەدى

15 اقپان كۇنى سوت بولۋى ءتيىس. ەندى قازاق دەگەن كوڭىلى اشىق حالىق قوي، اۋىر قازاعا دۋشار بولساڭ، كوڭىل شايعا شاقىرادى. ءسويتىپ 12 اقپان كوڭىل شايعا بارىپ، داستارحان باسىندا وتىرسام، سايراگۇل حابارلاستى. تۇتقانى كوتەرىپ، كەيىن حابارلاساتىنىمدى، قولىمنىڭ بوس ەمەستىگىن ايتتىم. ول سوت تۋرالى سۇراستىرىپ، حابارلاما جازىپ جىبەرىپتى. مەن 15 اقپان بولاتىنىن ايتتىم. سويتسەم، "سوت بولىپ كەتىپتى" دەيدى، وندا ەكەۋمىز دە بولمادىق. بۇعان الاڭداعان مەن سوت ءبولىمىنىڭ حاتشىسىنا حابارلاسىپ ەدىم، ول  «ەشقانداي وزگەرىس جوق، سوت 15 اقپان بولادى» دەدى. ال مەن 14 اقپانعا بيلەت الىپ قويعان ەدىم. ال ول كەشە تاعى ۆيدەو جاريالاپ قويىپتى. تاعى رەنجىدىم. كەشە تۇسكى ۋاقىتقا دەيىن سايراگۇلمەن تەلەفون ارقىلى سويلەسىپ ءجۇردىم، ويىمدا ەشتەڭە جوق. كەشە ورالدان ۇشاققا وتىرىپ، استاناعا ۇشىپ باردىم، استانادان تاڭعى ساعات 4-تە الماتىعا ۇشىپ كەلدىم. الماتىعا كەلىپ، الگى ۆيدەونى كوردىم.

بۇل – بالانىڭ ويىنى ما، الدە كۇردەلى ويىندار ءجۇرىپ جاتىر ما، بىلمەدىم. مەنىڭ بىلەتىنىم، مەن اشىق اۋىز، اڭقاۋ ادۆوكات ەكەنمىن.

امال جوق، 3000 شاقىرىم جەردى ارتقا تاستاپ كەلگەن سوڭ تالدىقورعانعا باردىم. باردىم دا، كوزىنە تۋرا قاراپ ءبارىن ايتتىم. ماعان تالابى بار ما، ايتارى بار ما، ءبارىن سۇرادىم. «جوق» دەيدى. اشۋلانامىن، ارينە.

ءسويتىپ، جاڭا ادۆوكاتى ايمان وماروۆاعا ساتتىلىك تىلەدىم دە، ءقازىر قايتىپ بارامىن. بۇل ءىستى وسىمەن ءتامامدادىم. مەن ويىنشىق ەمەسپىن عوي.

سايراگۇلگە تىلەرىم – تەك قانا ساتتىلىك. كۇيەۋىنىڭ، بالالارى – ۇلاعات پەن ۇكىلىايدىڭ جانىندا قالىپ، انالىق مەيىرىمىن توگە بەرۋىنە، قازاقستاندا قالۋىنا قاشان دا تىلەكتەسپىن»، - دەدى ابزال قۇسپان Qamshy.kz اقپارات اگەنتتىگىنىڭ تىلشىسىنە.

♦ابزال قۇسپان سايراگۇل ساۋىتبايدىڭ ىسىنە قاتىستى: كۇدىكتەن ءۇمىت باسىم

ايتا كەتەيىك، «شەكارادان زاڭسىز ءوتتى» دەپ ايىپتالعان ەتنيكالىق قازاق سايراگۇل ساۋىتباي 2018 جىلدىڭ 1 تامىزى سوت زالىنان بوساتىلدى. وعان دەيىن سايراگۇل ساۋىتبايعا قازاقستان قىلمىستىق كودەكسىنىڭ 392 - بابى شەكارانى زاڭسىز بۇزىپ ءوتۋ بويىنشا ايىپ تاعىلعان.

♦حالىقارالىق قۇقىق نەگىزگە الىنىپ، سايراگۇل ساۋىتباي بوستاندىققا شىقتى