Kyzylorda-news.kz رەداكسياسىنا پولشا ازاماتشاسى ۋلا كوتاربا الەۋمەتتىك جەلى ارقىلى حابارلاسىپ، قازاقستاندىق وتباسىن ىزدەپ جاتقانىن ايتقان ەكەن، دەپ جازادى Qamshy.kz اقپارات اگەنتتىگى.

اناسى يزابەللا برەست قالاسىندا دۇنيەگە كەلىپ، 30 جىلداردىڭ سوڭىندا اكەسى قاماۋعا الىنعان سوڭ اناسى جانە اپكەسىمەن بىرگە قازاقستانعا جەر اۋدارىلادى. باستاپقىدا يتيۋمەن كەڭەسىنە جىبەرىلىپ، كەيىن اپكەسىنىڭ دەرتىنە بايلانىستى ماكينكاداعى اۋرۋحاناعا جەتكىزىلەدى.

بارار جەر، باسار تاۋى بولماعان وتباسىعا جەرگىلىكتى تۇرعىن ۋستينيا ميرەنچۋك كومەكتەسىپ، پانا بولىپتى. ول ايەل مەن بالا-شاعاسىن ۇيىنە كىرگىزىپ، قامقورلىق جاساپ، ءبىر ءۇزىم ناندى ءبولىسىپ جەگەن ەكەن.

سوعىستان سوڭ يزابەللا پولشاعا ورالادى، ءبىراق ۋستينيانى ءبىر ءسات جادىنان شىعارعان ەمەس. ول قانشا ۋاقىت حات جازسا دا، ەشبىر جاۋاپ بولماپتى. 1970 جىلى عانا ماكينكاعا شاقىرۋ قاعازىن الادى.

كوكشەتاۋداعى اۋەجايدان يزابەللامەن اناسىن ۋستينيانىڭ ۇلى پەتر كۇتىپ الىپتى. ماكينكاعا دەيىن كولىكپەن جەتىپ، كوپتەن كۇتكەن كەزدەسۋ بولادى. كەيىنىرەك پەتر ىنىسىمەن بىرگە پولشاعا دا بارىپ قايتقان.

قوس وتباسى تاعى ءبىراز ۋاقىت حات-حابار الماسىپ تۇرىپ، كۇندەردىڭ كۇنىندە ارادا بايلانىس ۇزىلەدى، ال حاتتار بۇگىنگە دەيىن ساقتالماعان ەكەن.

قىزىنىڭ ايتۋىنشا، يزابەللا ۋستينيانى ءجيى ەسكە الادى، ونى مەن بالالارى تۋرالى ءبىر حابار ەستىسەم" دەپ ارمانداپ ءجۇر. قىزى ۋلانىڭ قازاقستاندىق وتباسىنى ىزدەۋگە كىرىسكەنىن بىلگەندە، قارت ايەل كوزىنە جاس الىپتى.

ينتەرنەتتەن قانشا ىزدەپ تاپپاعان ۋلا Kyzylorda-news.kz باسىلىمى ارقىلى بۇكىل قازاقستاندىقتاردان ۋستينيا ميرەنچۋكتىڭ وتباسىن تابۋعا كومەكتەسۋدى سۇرايدى.

باسىلىم ءوز تاراپىنان اقمولا وبلىسى ەڭبەكشىلدەر اۋدانى اكىمدىگى مەن تۇرعىندارىنا ۇندەۋ جاساپ، سول وتباسى تۋرالى بىلەتىن جانداردان حابارلاسۋدى ءوتىندى.

تەلەفون نومىرلەرى: 8/7242/400251، 87002328933

ۇسىنعان: گۇلىم جاقان