الماتىدا بەلگىسىز بىرەۋلەر كوشەدە كەتىپ بارا جاتقان بويجەتكەندى بۋىندىرىپ، توناپ كەتكەن، دەپ حابارلايدى Qamshy.kz اقپارات اگەنتتىگى.

بلوگەر دۋمان ءجۇمادىلوۆ ءوزىنىڭ Facebook پاراقشاسىندا ەكى جىگىتتىڭ ءبىر قىزعا تاپ بەرىپ، بۋىندىرعان ۆيدەوسىن جاريالادى. ۆيدەودا كورىنگەندەي، ولار قىزدى بۋىندىرىپ، كەيىن شۋباسىن شەشىپ سومكەسىمەن بىرگە الىپ كەتكەن.

«قىزدار ابايلاپ جۇرىڭىزدەر! جىگىتتەر دە. جەتىسۋ ميكرواۋدانى 4، كازكوم بانكىنىڭ ماڭى»، - دەپ جازادى بلوگەر.

ۆيدەوداعى كادرلاردان وقيعانىڭ تۇنگى 1:30 شاماسىندا بولعانى كورىنەدى. ءبىر جىگىت قىزدى بۋىندىرىپ، ول ەسىنەن تانىپ قالعاننان كەيىن جەرگە جاتقىزىپ شۋباسىن شەشىپ العان، ال ونىڭ سىبايلاسى بەرگى شەتتە كۇتىپ تۇرعان.

الماتى پوليسيا دەپارتامەنتىندە بۇل جايتقا بايلانىستى پىكىر ءبىلدىردى. بەلگىلى بولعانداي، زارداپ شەككەن ايەل امان قالعان.

«15 اقپاندا تۇنگى ۋاكقىتتا 35 جاستاعى ايەلگە قاراقشىلىق شابۋىل جاسالعان فاكتىسى بويىنشا اۋەزوۆ اۋداندىق پوليسيا باسقارماسىندا ق ر قك-نىڭ 192 بابى  بويىنشا قىلمىستىق ءىس قوزعالىپ، سوتقا دەيىنگى تەرگەۋ جۇمىستارى جۇرگىزىلۋدە.

وسى قىلمىستى شەشۋگە باعىتتالعان ءبىرقاتار ءىس-شارالاردى جۇزەگە اسىرۋ ءۇشىن جەدەل-تەرگەۋ توبى قۇرىلدى: قىلمىستىق ءىس اشىلادى، كىنالى ادامدار لايىقتى جازالارىن الادى.

سونىمەن قاتار، قاراقشىلىق شابۋىلدان ايەل ادام زارداپ شەككەن جوق، ول دارىگەرلەردىڭ كومەگىنە جۇگىنبەدى: ونىڭ ءومىرى مەن دەنساۋلىعىنا ەشتەڭە ءقاۋىپ توندىرمەيدى»، - دەدى الماتى پوليسيا دەپارتامەنتىنىڭ ءباسپاسوز-حاتشىسى سالتانات ازىربەك.

ۇسىنعان: نازەركە لابيحان