نازاربايەۆا "ءسوز بوستاندىعى يندەكسىندە" قازاقستان كورسەتكىشتەرىنىڭ ناشارلاعانى" جايلى سۇراعان جۋرناليسكە: "ءسوز بوستاندىعى جوق دەپ سانايسىز با؟" دەپ قايتارا ساۋال قويىپ: "قالاساڭىز، بارىنە ۇرىسىپ، سىناي بەرىڭىز. الەۋمەتتىك جەلىدە ءبارى اشىق جازىلادى. قانداي رەيتينگىنى ايتىپ تۇرعانىڭىزدى بىلمەيمىن" دەپ جاۋاپ بەردى.

نازاربايەۆانىڭ ايتۋىنشا، "رەيتينگىنىڭ بارىنە سەنە بەرۋگە بولمايدى - ءبارى رەيتينگىنى كىم، نە ءۇشىن قۇراستىراتىنىنا بايلانىستى".

"شەكاراسىز تىلشىلەر" (Reporters Without Borders) حالىقارالىق ۇيىمىنىڭ بىلتىر ساۋىردەگى ەسەبىنشە، قازاقستانداعى ءسوز بوستاندىعى مەن باسپا ءسوز ەركىندىگىنىڭ جاعدايى ناشارلاي تۇسكەن. استانا "باسپا ءسوز ەركىندىگى رەيتينگىندە" 54،41 ۇپايمەن 158-ورىندا تۇر.

"ەلدەگى رەپرەسسيا ءسپيرالى تومەندەگەن جوق. قازاقستاندى وتىز جىلعا جۋىق ۇزدىكسىز باسقارىپ وتىرعان نۇرسۇلتان نازاربايەۆتىڭ ءىزباسارى تۋرالى ايتىلمايدى. ال نازاربايەۆ بيلىكتى ءوز قولىنا الىپ، ونى ساقتاپ قالۋ ءۇشىن قىسىمدى كۇشەيتتى" دەپ جازادى ۇيىم.

زەرتتەۋ اۆتورلارىنىڭ ايتۋىنشا، قازاقستانداعى نەگىزگى وپپوزيسيالىق گازەتتەر 2012 جىلى جابىلدى. قالعاندارى كوپتەگەن ايىپپۇلداردان كەيىن جۇمىسىن توقتاتۋعا ءماجبۇر بولعان. "شەكاراسىز تىلشىلەر" ۇيىمى قازاقستاندا 2017 جىلى ب ا ق تۋرالى زاڭعا وزگەرتۋلەر ەنگىزىلگەنىن، بۇل زاڭ جۋرناليستەردىڭ جۇمىسىن قيىنداتا تۇسكەنىن جازادى.

"جۋرناليستەر كوپ قۋدالاۋعا ۇشىرايدى. ءقازىر ەل بيلىگى ينتەرنەتتى باقىلاۋعا العان. ەلدە سايتتار، الەۋمەتتىك جەلىلەر مەن مەسسەندجەرلەر كوپ بۇعاتتالادى" دەپ جازىلعان زەرتتەۋدىڭ قازاقستان تۋرالى بولىگىندە.

ۇسىنعان: نازەركە لابيحان