بۇل جايىندا اتالعان تەلەارنانىڭ ديرەكتورى قانات ەرجىگىتوۆ بۇگىن جۋرناليستەرمەن كەزدەسۋ بارىسىندا اتالعان تەلەارنانى اشۋ كوپتەن كوڭىلدە جۇرگەنىن، وسىدان 2،5 جىل بۇرىن «جۇلدىز» ارناسىن اشقانىن، ەندى سونىڭ جانىنان «دومبىرا» تەلەارناسى اشىلىپ وتىرعانىن ايتتى، – دەپ حابارلايدى Qamshy.kz اقپارات اگەنتتىگى.

ديرەكتوردىڭ ايتۋىنشا، العاش «جۇلدىز» تەلەارناسىن اشقاندا حالىق تاراپىنان «سىزدەر قازاقتىڭ ءداستۇرلى ان-كۇيلەرىن بەرسەڭىزدەر» دەگەن وتىنىشتەر كەلىپ تۇسكەن. كەيىن زەرتتەي كەلە راسىمەن دە ءداستۇرلى مۋزىكا بويىنشا تەلەارنا جوق ەكەنىنە كوز جەتكىزىپتى.

«ءقازىر بۇل سالادا تىڭ دۇنيەلەر وتە از، سوندىقتان، ەكى اي بولدى الماتى مەن استانا قالالارىندا تۇسىرىلىمدەردى باستاپ كەتتىك. تەلەارنا ءقازىر ID tv كابەلدىك جۇيەسىندە تەستىلى رەجيمدە تۇر. جۇما نەمەسە دۇيسەنبى كۇنى تولىقتاي قوسىلادى. نەگىزگى ماقساتىمىز - ءار قازاق ءداستۇرلى ونەردى كەز-كەلگەن ۋاقىتتا تەلەديداردى قوسىپ كورە الاتىنداي جاعدايعا جەتكىزۋ. تەلەارنادا تەك دومبىرا جايلى ەمەس، جالپى ۇلتتىق مۋزىكا اسپاپتارى جايلى حابار تارايدى»، – دەدى قانات ەرجىگىتوۆ.

تەلەارنا 100 پايىز قازاق تىلىندە 24 ساعات بويى قازاق ونەرى جايلى حابار تاراتادى.

«بۇل قۋانىشتى ۇلكەن شارا. ءقازىر داڭعازا مۋزىكانىڭ جاۋلاپ بارا جاتقانى جانىڭدى اۋىرتادى. ەسترادا جەڭىل جانر ەكەنى بەلگىلى، الايدا ونىڭ بارلىعىن جوققا شىعارعىمىز كەلمەيدى. ءار قازاقتىڭ ۇيىندە كۇمبىرلەگەن دومبىرانىڭ ءۇنى ەستىلىپ جاتسا ول بالاعا سىڭە بەرەر ەدى. قولعا الىنىپ وتىرعان بۇل شارۋانىڭ ءوزى «رۋحاني جاڭعىرۋعا» ءتان دەپ ويلايمىن»، – دەيدى قازاقستانعا ەڭبەگى سىڭگەن ارتيست سەكەن تۇرىسبەكوۆ.

ۇسىنعان: ماقپال سەمباي