شىمكەنتتە ورتتەن ەكى بالانى قۇتقارىپ قالعان ءجاسوسپىرىمدى قالانىڭ باس پوليسەيى قابىلدادى. پوليسيا دەپارتامەنتىنىڭ باستىعى 13 جاستاعى باقىتجان بەركىمبايەۆتى ق ر ىشكى ىستەر ءمينيسترى پوليسيا گەنەرال-مايورى ەرلان تۇرعىمبايەۆتىڭ بۇيرىعىمەن «ورتتە كورسەتكەن قايسارلىعى ءۇشىن» مەدالىمەن ماراپاتتادى، دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىن نەگىزگە الىپ.

پوليسيا دەپارتامەنتىنىڭ باستىعى ەرالى جۇماحانبەتوۆ باتىر بالا باقىتجاننىڭ اتا-اناسىنا دا «ادام ءومىرىن قۇتقارۋدا ەرلىك جاساعان بالاسىنا ۇلگىلى ءارى ونەگەلى تاربيە بەرگەنى ءۇشىن» العىس حاتىن تابىستادى. كەزدەسۋ بارىسىندا دەپارتامەنت باستىعى ءوزىنىڭ جانە جەكە قۇرامنىڭ اتىنان تاربيە بەرگەن اتا-اناسىنا جانە ۇستازدارىنا العىس ءبىلدىرىپ، باقىتجاننىڭ ەرلىگى مەن ەرجۇرەكتىگىنىڭ ارقاسىندا بارلىق قۇرداستارىنا ۇلگى بولعانىن اتاپ ءوتتى. سونداي-اق، ۆەدومستۆو باسشىسى باقىتجانعا بولاشاقتا پوليسەي ماماندىعىن تاڭداسا، ءوز تاراپىنان قولداۋ كورسەتىپ، ىقپال ەتەتىنىن جاسىرمادى.

ەسكە سالا كەتەيىك، سەگىزىنشى سىنىپتا وقيتىن باقىتجان وتقا ورانعان ۇيگە قورىقپاي كىرىپ، ءبىر شەتتە ءبۇرىسىپ وتىرعان 6 جاسار قىزدى جانە 3 جاسار بالانى دالاعا الىپ شىققان بولاتىن. بۇل وقيعاعا دەيىن قولىن سىندىرىپ العانىنا قاراماستان ول وسىلايشا ەر ازاماتقا ءتان ەرلىك جاسادى.

ۇسىنعان: اسەل بولات قىزى