اقتاۋداعى «اينالايىن» جەكەمەنشىك بالاباقشاسىنىڭ ديرەكتورى تاربيەشىلەردىڭ ءبىرىن سوققىعا جىققانى ءۇشىن جاۋاپقا تارتىلدى. بۇل تۋرالى Qamshy.kz اقپارات اگەنتتىگى Lada.kz باسىلىمىنا سىلتەمە جاساپ حابارلايدى.

اقتاۋ قالاسىنىڭ مامانداندىرىلعان اكىمشىلىك سوتىندا مەكەمە باسشىسى گۇلجانات مۇراتبايعا قاتىستى اكىمشىلىك ءىس قارالدى.

«سوتتىڭ انىقتاۋىنشا، 14 اقپان كۇنى ساعات 17:00-دە «اينالايىن» بالاباقشاسىنىڭ ديرەكتورى تاربيەشىنىڭ كومەكشىسى ۋ.-مەن سوزگە كەلىسىپ قالىپ، ىدىسپەن باسىنان ۇرىپ جىبەرگەن. سولايشا، دەنساۋلىعىنا جەڭىل زارداپ كەلتىرگەن. ديرەكتوردىڭ كىناسى مەديسينالىق ساراپتامانىڭ قورىتىندىسىمەن جانە وقيعا كۋاگەرلەرىنىڭ سوزدەرىمەن دالەلدەندى»، - دەلىنگەن سوتتىڭ حابارلاماسىندا.

♦اقتاۋدا بالاباقشا ديرەكتورى تاربيەشىنى قانجوسا ەتىپ ساباپ تاستادى

ق ر اكىمشىلىك قۇقىق بۇزۋشىلىق تۋرالى كودەكسىنىڭ 73-1-بابىنىڭ («دەنساۋلىققا قاساقانا جەڭىل زيان كەلتىرۋ») 1-تارماعىنا («دەنساۋلىقتىڭ قىسقا مەرزىمگە بۇزىلۋىنا نەمەسە جالپى ەڭبەك قابىلەتىن تۇراقتى تۇردە بولماشى جوعالتۋعا اكەپ سوققان، دەنساۋلىققا قاساقانا جەڭىل زيان كەلتىرۋ») سايكەس، سوتتىڭ شەشىمىمەن بالاباقشا ديرەكتورىنا 37 875 تەڭگە كولەمىندە ايىپپۇل سالىندى.

سوت قاۋلىسى زاڭدى كۇشىنە ەنگەن جوق. 

ۇسىنعان: گۇلىم جاقان