ۇكىمەتتى باسقارعان ەكى شەنەۋنىك سىنىپتاستار بولعانىن ءبىلدىڭىز بە؟ 2007-2012 جىلدارى ق ر پرەمەر-مينيسترى بولعان كارىم ءماسىموۆ پەن بۇگىن عانا، ياعني 2018 جىلدىڭ 25 اقپانىندا ۇكىمەت باسشىسى بولىپ تاعايىندالعان اسقار مامين كيروۆ اتىنداعى №1 ەليتالىق مەكتەپتە ءبىر سىنىپتا وقىدى. الايدا ءماسىموۆ  ءتورتىنشى سىنىپتا باسقا مەكتەپكە اۋىسقان. بۇل تۋرالى «مەگاپوليس» باسىلىمىنىڭ 2007 جىلعى سانىندا جاريالاندى.

مەكتەپ سول كەزدەگى سەلينوگراد قالاسىنداعى ەڭ ۇزدىكتەردىڭ قاتارىنان تابىلدى ءارى ماتەماتيكالىق باعىتتى تەرەڭدەتىپ وقىتقان. ءتىپتى وندا وقۋدىڭ ءوزى وقۋشىلار ءۇشىن ارمان بولعان دەسەدى. سەبەبى قالانىڭ ەڭ ءبىلىمدى پەداگوگتارى سوندا جينالعان. ال بۇگىندە بيلىكتەن ورىن تەپكەن شەنەۋنىكتەر مەكتەپتى ۇزدىك بىتىرگەن.

مامين مەن ماسىموۆكە ساباق بەرگەن  ماريا يساك قىزى (قۇجات بويىنشا ەسىمى – ءمۇسلىم ايساق قىزى) باسىلىمعا سۇحبات تا بەرىپتى. سۇحبات بارىسىندا شەنەۋنىكتەردىڭ قانداي وقۋشى بولعانىن ايتىپ بەردى.

«بالالار جاقسى وقىدى. مامين ورتاڭعى قاتاردىڭ ءبىرىنشى پارتاسىندا وتىراتىن. ءتارتىپتى بالا بولدى، ءبىراق اندا-ساندا قىلىقتارىن كورسەتىپ قوياتىن. بىردە بارلىق وقۋشى «كارتوپ جيناۋعا» شىققاندا، اسقار دوستارىمەن قاشىپ كەتكەن. ال كەلەسى كۇنى مەكتەپكە اتا-اناسىمەن عانا كىرگىزىلدى. مەن قاتال بولاتىنمىن. بۇزىقتىق جاساعان وقۋشىلاردى بۇرىشقا تۇرعىزىپ قوياتىنمىن. اسقار دا سىنىپ بۇرىشىندا ءجيى تۇردى. ازداپ قۋلىعى بار ەدى. جانىندا وتىرعان وقۋشىلاردان كوشىرىپ الاتىن، سول ءۇشىن دە ونى ءجيى جازالايتىنمىن. ال جالپى تىنىش بالا بولدى.

كارىم دە جاقسى وقىدى. ءالى ەسىمدە، اۋىر سومكەمەن جاياۋ كەتىپ بارا جاتقانىمدا كارىم مەن دوستارى ماعان سومكەمدى كوتەرىسۋگە كومەكتەسكەن»، - دەپ ەسىنە ءتۇسىردى ماريا يساك قىزى.

ماريا حانىم قازاق ءتىلى پانىنەن ساباق بەرىپتى. 1972 جىلى ءماسىموۆ پەن مامين 1ء-ى سىنىپقا بارعاندا، يساك قىزى دا جۇمىسقا ورنالاسقان. سول كەزدە قازاق ءتىلىن ازداپ مەڭگەرگەن وقۋشىلاردىڭ ءبىرى مامين بولعان ەكەن.

«كوبى قازاق ءتىلىن بىلمەيتىن. ال مامين ءبىلدى، ءبىراق سويلەۋگە ۇيالاتىن. سۇراق قويساڭ، ۇندەمەي تۇرادى. نەمەسە «نە زنايۋ» دەپ جاۋاپ بەرەدى. ەكى دە، ءۇش تە الاتىن، ءبىراق تورتكە وقىدى. سەبەبى قازاق ءتىلىن بىلەتىن بىرەن-ساران وقۋشىلاردىڭ ءبىرى ەدى. ماسىموۆكە دە ءتورت قوياتىنمىن. ءبىراق ول باعاعا لايىقتى ەمەس ەدى. وزگە پاندەردىڭ ءبارى بەستىك بولعاندىقتان، امال جوق، ءتورت قوياتىنمىن. ال قازاق ءتىلىن بىلمەيتىن، ءقازىردىڭ وزىندە بىلمەيدى عوي. بىردە تانىسىم: «ماريا يساك قىزى، وقۋشىڭدى دۇرىس وقىتپاعان سەكىلدىسىڭ» دەپ ۇيالتقان بولاتىن. كارىمگە سول كەزدە قاتالدىق تانىتۋىم كەرەك ەدى»، - دەگەن ماريا ۇستاز وكىنىشىن دە ايتىپ قالدى.

ماريا يساك قىزى وقۋشىلارىنىڭ وسىنداي دارەجەگە كوتەرىلگەندەرى ءۇشىن ماقتانادى، ارينە. تەك ەكەۋى دە ءبىلىم العان مەكتەپتەرىنە بىتىرگەن سوڭ اياق باسپاعان ەكەن. سوعان قاپالى...

ايتا كەتەيىك، بۇگىن، 25 اقپان پارلامەنتتىڭ ماقۇلداۋىمەن اسقار مامين ق ر پرەمەر-مينيسترى بولىپ تاعايىندالدى.