قازاقستان پرەزيدەنتى نۇرسۇلتان نازاربايەۆ پارلامەنت ءماجىلىسىنىڭ پلەنارلىق وتىرىسىنا قاتىستى، دەپ جازادى Qamshy.kz اقپارات اگەنتتىگىاقوردانىڭ باسپا ءسوز قىزمەتىنە سىلتەمە جاساپ.

پارلامەنت ءماجىلىسىنىڭ پلەنارلىق وتىرىسىندا قازاقستان پرەزيدەنتى نۇرسۇلتان نازاربايەۆ ۇكىمەتتىڭ جاھاندىق دامۋداعى قيىن-قىستاۋ جاعدايدا ەكونوميكالىق وسىمگە قول جەتكىزگەنىن اتاپ ءوتىپ، ونىڭ مۇشەلەرىنە اتقارعان جۇمىسى ءۇشىن العىس ءبىلدىردى.

"پرەمەر-مينيستر باقىتجان ساعىنتايەۆ تۋرالى جەكە ايتىپ وتەيىن. ول بۇرىنعى قىزمەتىندە – پاۆلودار وبلىسىنىڭ اكىمى، ەكونوميكا ءمينيسترى، ۆيسە-پرەمەر جانە ءبىرىنشى ۆيسە-پرەمەر رەتىندە ءوزىن جاقسى جاعىنان كورسەتتى. ادال ءارى تاجىريبەلى ازامات. باسقا سالالاردا دا ەڭبەك ەتە الادى. الايدا جەكەلەگەن مينيسترلىكتەردىڭ جۇمىسىنداعى، اسىرەسە الەۋمەتتىك سالاداعى كەمشىلىكتەردىڭ سالدارىنان بۇكىل ۇكىمەت وتستاۆكاعا جىبەرىلدى"، - دەدى قازاقستان پرەزيدەنتى.

نازاربايەۆ اتاپ وتكەندەي، حالىقارالىق ارەناداعى تەرەڭدەپ بارا جاتقان تۇراقسىزدىق پەن سانكسيالىق قاقتىعىستار ەلىمىزدىڭ ءال-اۋقاتىن ارتتىرۋدا جاڭا قادامدار مەن شەشىمدەر ىزدەۋدى تالاپ ەتەدى.

بۇدان بولەك، مەملەكەت باسشىسى ساياسي جاڭعىرتۋدىڭ ناتيجەلەرىنە توقتالىپ ءوتىپ، سونىڭ اياسىندا بيلىك تارماقتارى اراسىنداعى وكىلەتتىكتىڭ قايتا بولىنگەنىن ايتتى.

"ۇكىمەت بارلىق قاجەتتى وكىلەتتىكتى الدى، حالىق الدىندا مىندەتتەرىن ناقتى ورىنداپ، ءوز جۇمىسى ءۇشىن جاۋاپكەرشىلىكتى مويىنىنا الۋعا ءتيىس. بۇل جاۋاپكەرشىلىك بۇكىل دەڭگەيدەگى اكىمدەرگە قاتىستى، ولار الەۋمەتتىك جانە ەكونوميكالىق باعدارلامالاردىڭ تيىمدىلىگىنە تىكەلەي جاۋاپ بەرەدى. حالىقتىڭ ارىز-شاعىمىنا تەز جاۋاپ بەرىپ، ەڭ باستىسى، شارالار قولدانۋى كەرەك"، - دەدى پرەزيدەنت.

نۇرسۇلتان نازاربايەۆ مەملەكەتتىڭ الەۋمەتتىك-ەكونوميكالىق ساياساتىن جۇزەگە اسىرۋداعى پارلامەنتتىڭ ءرولىن دە ەرەكشە اتاپ ءوتتى.

"اڭگىمە زاڭ جوبالارىن ساپالى ازىرلەۋ عانا ەمەس، سونداي-اق ماڭىزدى مەملەكەتتىك باعدارلامالار مەن جوبالاردى ىسكە اسىرۋ جونىندە بولىپ وتىر. بۇل سونىمەن قاتار تۇراقتى پارلامەنتتىك مونيتورينگ، ۇكىمەتتىك ەمەس سەكتورمەن ديالوگتىك الاڭقاي قۇرۋ، ازاماتتارعا مەملەكەت قابىلداپ جاتقان شارالاردى، ونىڭ ىشىندە زاڭنامالىق شەشىمدەردى تۇسىندىرۋگە دە قاتىستى"، - دەدى قازاقستان پرەزيدەنتى.

مەملەكەت باسشىسى اتاپ وتكەندەي، جاڭا ۇكىمەت مەملەكەتتىك باعدارلامالاردى جۇزەگە اسىرۋدى جالعاستىرىپ، قۇقىق قورعاۋ جانە سوت جۇيەسىندەگى رەفورمالاردى اياقتاپ، حالىقتىڭ پروبلەمالارىن شەشىپ بەرۋى ءتيىس.

نۇرسۇلتان نازاربايەۆ كونستيتۋسيانىڭ 44-بابىنا سايكەس قازاقستان رەسپۋبليكاسى پرەمەر-مينيسترى لاۋازىمىنا تاعايىنداۋعا كەلىسىم بەرۋ ءۇشىن اسقار ءماميننىڭ كانديداتۋراسىن پارلامەنت ءماجىلىسىنىڭ قاراۋىنا ۇسىندى.

"ول جۇمىس ىستەگەن جىلدارى وزىنە سەنىپ تاپسىرىلعان قىزمەتتەردە ناقتى ناتيجەلەرگە قول جەتكىزدى. اسقار ۇزاقباي ۇلى ءوزىن تاجىريبەلى مەنەدجەر رەتىندە كورسەتتى. جاڭا ۇكىمەتتىڭ ءتيىمدى جۇمىسىن قامتاماسىز ەتۋ ءۇشىن اسقار ۇزاقباي ۇلى ءماميننىڭ كانديداتۋراسىن لايىقتى دەپ سانايمىن"، – دەدى مەملەكەت باسشىسى.

پارلامەنت ءماجىلىسىنىڭ دەپۋتاتتارى پرەمەر-مينيستر لاۋازىمىنا اسقار ءماميننىڭ كانديداتۋراسىن ءبىراۋىزدان ماقۇلدادى.

پلەنارلىق وتىرىس بارىسىندا نۇرسۇلتان نازاربايەۆ اسقار ءماميندى قازاقستان رەسپۋبليكاسىنىڭ پرەمەر-مينيسترى لاۋازىمىنا تاعايىنداۋ تۋرالى ءتيىستى جارلىققا قول قويدى.

ەلباسى الەۋمەتتىك ساياساتىمىزدىڭ نەگىزگى باسىمدىقتارى جونىندە ايتىپ، يندۋستريالىق باعدارلامانى ورىنداۋ بارىسىندا وتاندىق ءوندىرىستى دامىتۋ قاجەتتىگىنە نازار اۋداردى.

ۇسىنعان: نازەركە لابيحان