بۇگىن ءماجىلىستىڭ قارجى جانە بيۋدجەت كوميتەتىنىڭ وتىرىسى ءوتىپ، وندا پرەمەر-مينيستردىڭ ءبىرىنشى ورىنباسارى - قارجى ءمينيسترى لاۋازىمىنا ءاليحان سمايلوۆتىڭ كانديداتۋراسى كەلىسىلدى، دەپ حابارلايدى Qamshy.kz اقپارات اگەنتتىگى ق ر پارلامەنتى ءماجىلىسىنىڭ باسپا ءسوز قىزمەتىنىڭ دەرەگىن نەگىزگە الىپ. 

بۇل ماسەلە «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» قازاقستان رەسپۋبليكاسى كونستيتۋسيالىق زاڭىنىڭ 22-1-بابىنا سايكەس كوميتەت وتىرىسىندا قارالدى. قازاقستان پرەمەر-مينيسترىنىڭ اتىنان كانديداتۋرانى پرەمەر-مينيستر كەڭسەسىنىڭ باسشىسى نۇرلان الدابەرگەنوۆ تانىستىردى. ءماجىلىس دەپۋتاتتارىنىڭ الدىندا ءسوز سويلەگەن ن.الدابەرگەنوۆ ا.سمايىلوۆتىڭ قارجى سەكتورىندا مول تاجىريبەسى بار ەكەندىگىن اتاپ ءوتتى.

ءماجىلىس كوميتەتىنىڭ مۇشەلەرى ءا.سمايىلوۆقا ءبىرقاتار سۇراقتار قويدى. تالقىلاۋدان كەيىن ءتيىستى قورىتىندى قابىلدادى. كوميتەت وتىرىسىنىڭ قورىتىندىسى بويىنشا «قازاقستان رەسپۋبليكاسى پارلامەنتى ءماجىلىسىنىڭ قارجى جانە بيۋدجەت كوميتەتى «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» قازاقستان رەسپۋبليكاسى كونستيتۋسيالىق زاڭىنىڭ 22-1-بابىنا سايكەس قازاقستان رەسپۋبليكاسىنىڭ پرەمەر-مينيسترى ۇسىنعان ءاليحان اسحان ۇلى سمايىلوۆتىڭ كانديداتۋراسىن قاراپ، اتالعان كانديداتۋرانى پرەمەر-مينيستردىڭ ءبىرىنشى ورىنباسارى - قازاقستان رەسپۋبليكاسىنىڭ قارجى ءمينيسترى لاۋازىمىنا تاعايىنداۋ ءۇشىن ۇسىنۋعا بولادى دەپ ەسەپتەيدى. وتىرىس سوڭىندا دەپۋتاتتار كانديداتتىڭ الداعى جۇمىسىنا ساتتىلىك تىلەدى.