وقۋشىلار اراسىنداعى ەڭ بەلسەندى وقىرمان اكىمنىڭ قولىنا ەرەكشە سىيلىق الدى، دەپ جازادى Qamshy.kz اقپارات اگەنتتىگى  Sputnik قازاقستان سايتىنىڭ دەرەگىنە سۇيەنىپ.

پاۆلودار وبلىسىنداعى اۋدان ورتالىعى – تەرەڭكول اۋىلىندا №2 مەكتەپتىڭ 5-سىنىپ وقۋشىسى ولەگ ايتپايەۆ باستى سىيلىق رەتىندە ەشكى ۇتىپ الدى. ول بىلتىر 125 كىتاپ وقىپ شىققان، دەپ حابارلادى اۋىلدىڭ جاڭا اكىمى اجدار ءجۇسىپوۆ.

ونىڭ مالىمەتىنە سۇيەنسەك، بۇل سايىستى اكىمدىك تەرەڭكول اۋىلىنىڭ كىتاپحاناسىندا وتكىزگەن. زەينەتكەرلەر مەن جاستار اراسىنداعى بەلسەندى وقىرماندارعا ءبىر قورجىن ازىق-تۇلىك تارتۋ ەتىپتى. زەينەتكەرلەر اراسىندا ۇزدىك وقىرماندار – سۆەتلانا ميحايلوۆنا بابايسيەۆا (215 كىتاپ) مەن بوتاباي قابىلبەك ۇلى ساعيتوۆ (120 كىتاپ)، جاستار اراسىندا – 11-سىنىپ وقۋشىسى الينا ماكوۆەس (76 كىتاپ). مەملەكەتتىك تىلدە ەڭ كوپ كىتاپ (جەتەۋ) وقىعان 6-سىنىپ وقۋشىسى اقنۇر زەينەعالييەۆا بولدى.

وقىرمانداردى ماراپاتتاۋ سالتاناتى اۋىل كىتاپحاناسىندا 23 اقپاندا وتكەن.

ەستەرىڭىزگە سالا كەتسەك، بۇعان دەيىن پاۆلودارسكوە اۋىلىن باسقارعان اجدار ءجۇسىپوۆ قىزىقتى ناۋقاندار وتكىزىپ، تۇرعىندارعا دەگەن ەرەكشە قامقورلىعىمەن كوپشىلىككە تانىلعان ەدى.

ماسەلەن، ول "ۇزدىك اۋلا" بايقاۋىن وتكىزىپ، جەڭىمپازعا اتەش سىيعا تارتقان بولاتىن. اۋىلداعى باسقا سايىستاردا جەڭىسكە جەتكەندەر لاق، قوزى، ءتىپتى توراي ۇتقان ەدى. ماسلەنيسا مەرەكەسىن تويلاعان كەزدە اكىم جەرگىلىكتى اسپاز ايەلگە ۇلكەن تورت ازىرلەتىپ، اۋىلدىڭ بۇكىل تۇرعىنى مەن قوناقتارىنا تەگىن اۋىز تيگىزگەن. ال بىلتىر 9 مامىردا ۇلى وتان سوعىسىنىڭ ارداگەرلەرىن ۇلكەن ليمۋزينگە وتىرعىزىپ قىدىرتتى.

اجدار ساعىنتاي ۇلى اگەنتتىككە حابارلاعانداي، تەرەڭكول اكىمدىگى 8 ناۋرىز مەرەكەسىنە دايىندىقتى باستاپ كەتتى. جەرگىلىكتى كاسىپكەرلەرمەن بىرگە اۋىلدىڭ كوپبالالى انالارىنا توسىنسىي ازىرلەپ جاتىر ەكەن.

ۇسىنعان: نازەركە لابيحان