دينارا (ەسىمى وزگەرتىلگەن) ەسىمدى جۋرناليست وسىدان 10 جىل بۇرىن پرەزيدەنت رەزيدەنسياسىنا ءۇي تازالاۋشى بولىپ بارعان ەكەن. سونداعى كورگەندەرى مەن باسىنان كەشكەندەرى جايلى Esquire تىلشىسىنە ايتىپ بەردى.

بۇل وقيعا وسىدان 10 جىل بۇرىن بولعان. ول كەزدە اجىراسقان جاس انا ەدىم. ۋنيۆەرسيتەت ءبىتىرىپ، جارناما گازەتىندە جۇمىس ىستەپ ءجۇردىم. مىقتى جۋرناليست بولۋدى ارمانداپ جۇرگەن بالاۋىز كەزىم. ءوزىم تۇرىپ جاتقان لاشىقتان بوساپ، مەگاپوليسكە كوشۋدى ماقسات تۇتقان كەزىم. ايتەۋىر ۇلىمنىڭ بالاباقشاسى مەن تاماققا اقشا تابىلسا، توبەم كوككە جەتىپ قۋانىپ جۇرگەن كەزىم. وسىلايشا جۇمىسقا ورنالاستىرۋ اگەنتتىگىن باسقارعان قارلىعاشپەن تانىسپىن.

كوكتەمنىڭ سالقىن كەشى ەدى. ءبىزدىڭ رەداكسيادا جۇمىس قىزىپ جاتىر. سەبەبى قالاعا رەسمي ساپارمەن پرەزيدەنت كەلەدى دەگەن حابار تارادى. سۇحبات الماساق تا، بارلىق قالالىق ب ا ق اكىمدىككە جۇمىس ىستەۋى ءتيىس ەدى. ماسەلەن، قالاداعى نەگاتيۆتى جاڭالىقتاردى جازۋعا تىيىم سالىندى.

ءدال سول ساتتەردىڭ بىرىندە ماعان قارلىعاش حابارلاستى. ول دەمالىستىڭ ءبىر كۇنىندە باقانداي 3 مىڭ تەڭگە تابىس تابۋدى ۇسىندى: پرەزيدەنت رەزيدەنسياسىن تازالاۋ. ءسويتىپ ومىرىمدە العاش رەت وزگە عيماراتتى تازالاۋعا اتتانىپ كەتتىم. ويىما نەشە ءتۇرلى قۋلىقتار كەلە باستادى. رەزيدەنسيا ءىشىن سۋرەتكە ءتۇسىرىپ، بەلگىلى باسىلىمعا ساتىپ جىبەرسەم بە ەكەن؟..

عيماراتقا كىرۋ ماسەلەسى شەشىلدى، ال فوتواپپارات ماسەلەسى قيىنداۋ بولدى. مەنى قۋىپ جىبەرسە قايتەمىن، ال فوتواپپاراتىمدى تارتىپ السا شە، ءالى تولەنبەگەن نەسيەسى بار.

ءجا، ۇيالى تەلەفونىممەن-اق كىرە بەرەمىن، ساپاسىز تۇسىرسە دە، كامەراسى بار. ەڭ باستىسى فوتونىڭ ەكسكليۋزيۆ بولعانى. جولىم بولاتىنىنا سەنىمدى بولدىم. سەبەبى «ءۇي تازالاۋشىلار، باقتاشىلار مەن تاكسيشىلەردى ەشكىم بايقامايدى، ولار كوزگە كورىنبەيدى دە» دەگەن فرازا ەسىمە ءتۇستى.

بەلگىلەنگەن كۇنى قالالىق اكىمدىككە باردىم. سوندا جينالعان 20 شاقتى ايەلدىڭ ىشىندە قايدا باراتىنىمىزدى مەن عانا بىلەتىن سەكىلدىمىن. بويىمدى ءبىر ءدىرىل بيلەدى، قورقىنىشتان ەمەس، قوبالجىعاندىقتان بولۋ كەرەك. بىردە ءتۇرلى تىلسىمداردى ويلاي باستادىم.

مىنە، جولعا شىقتىق. اينالامىزدا نە ءۇي، نە عيمارات جوق. قالادان ون شاقتى شاقىرىمعا قاشىق ورنالاسقان ۇلكەن قاقپاعا كىردىك. جىلىنا ميلليونداعان سالىق تولەنەتىن مەكەنگە كەلدىك.

ايتپاقشى، ۆيدەو باقىلاۋ بولعان جوق. مەتالل ىزدەگىش تە بولمادى، ەركىن كىردىك. سوندا فوتواپپاراتىمدى الماي شىققانىم ءۇشىن قاتتى وكىندىم.

العاشقى پرەزيدەنتىمىزدىڭ رەزيدەنسياسى قانداي؟ ءىشى دوڭگەلەك. كۇمبەزدى شاتىر. اۋلاسىندا دوڭگەلەك حاۋىز، ال جانىندا اركا، نە ءۇشىن تۇرعانى بەلگىسىز. اركا ەسىكتەر مەن دوڭگەلەنگەن باسپالداقتار.

جالعىز جاتىن بولمە بار، ءدال ورتاسىندا ورنالاسقان دوڭگەلەك توسەك. قاتتى ۇلكەن ەمەس، قاراپايىم ەكەن. قاتتى كۇرەڭ بارقىت پەردە. قىزىقتىڭ ءبارى جۋىناتىن بولمەدە. توبەسى ادەمى موزايكالارمەن قاپتالعان. التىن تۇسكە بويالعان راكوۆينا مەن دارەتحانا. ءبارى التىن!

مۇنداي عاجاپتى ومىرىمدە كورگەن ەمەسپىن. بۇل ءساتتى ءتيىمدى پايدالانۋعا تىرىستىم. بولمەنىڭ ەسىگىن جاپتىم دا، بىرنەشە كادر جاسادىم. ەڭ باستىسى، ۇلكەن اينادا ءوزىم كورىنىپ قالماسام بولعانى. ءبىراق ءبىر مينۋت بولماي، بولمەگە ءجۇزى سۋىق قاۋىپسىزدىك قىزمەتىنىڭ قىزمەتكەرى كىرىپ كەلدى. ول ەسىكتى ىشىنەن جاپپاۋىمدى سۇرادى. ەگەر قىسىلىپ تۇرسام، استىندا قىزمەتكەرلەرگە ارنالعان ارنايى بولمەنىڭ بار ەكەنىن مادەنيەتتى تۇردە ءتۇسىندىردى.

تۇسكى ۋاقىتتى دا ءساتتى پايدالاندىم. مەنىمەن بىرگە كەلگەن تاتەلەرىم تۇستەنىپ جاتقاندا، جاتىن بولمەنى دە ءتۇسىرىپ الدىم. ۆاننانى دا، ماعىناسىز اركانى دا، حاۋىزدى دا ءتۇسىردىم. تاتەلەرىم مەنى "ەرىگىپ ءجۇر" دەپ ويلاپ، باسپالداقتى جۋۋعا ماجبۇرلەدى. سول كۇنى اۋىرىپ قالعانىمدى ايتىپ، دوسىما حابارلاسىپ، الگى جەردەن كەتىپ قالدىم. شىعار كەزدە دە مەنى ەشكىم تەكسەرگەن جوق.

ال بۇل وقيعا قالاي اياقتالدى دەيسىزدەر عوي؟ قارلىعاشتىڭ نومىرىنەن ءبىر ەر ادام حابارلاسىپ، تەلەفونداعى سۋرەتتەردىڭ ءبارىن ءوشىرۋىمدى تالاپ ەتتى. ەشكىم تەكسەرمەدى، قورقىتپادى، ءتىپتى اڭدىمادى دا. ال سۋرەتتەردى باسپاعا وتكىزىپ قويسام، نە بولار ەدى؟ شۇكىر، وعان جەتپەدى. ءتىپتى بۇل جاعدايلاردى انام دا بىلمەدى. جاي عانا سۋرەتتەردى وشىرە سالدىم.

اۋدارعان: گۇلىم جاقان