نۇرسۇلتان نازاربايەۆ ءبىلىم سالاسىنداعى اقىلعا قونىمسىز كەمشىلىكتەرى تۋرالى پىكىر ءبىلدىردى دەپ حابارلايدى Qamshy.kz اقپارات اگەنتتىگى. ەلباسى ءۇش تىلدىلىكتى جۇرگىزۋ بارىسىندا دۇرىس باعىتتا كەلە جاتقانىن، الايدا اقىلعا قونىمسىز دۇنيەلەردىڭ بار ەكەنىن تىلگە تيەك ەتتى. 

"ءبىلىم سالاسىنداعى رەفورمالاردى دا لوگيكالىق ناتيجەلەرگە دەيىن جەتكىزۋ كەرەك. قازىرگى زامان بالالارىمىزدان جاڭا داعدىلاردى دامىتۋدى تالاپ ەتەدى. ۇشتىلدىلىك قالىپتى جاعدايعا اينالۋى ءتيىس ەكەنىن ايتقان ەدىم. ءبىزدىڭ بالالارىمىز – جاھان بالالارى. ولار بۇكىل الەمدىك كەڭىستىكتە، ۇزدىك جوعارى وقۋ ورىندارىندا ءبىلىم الادى، ءبىز بارماعان جەرلەرگە بارادى. سوندىقتان قازاق جانە ورىس تىلىمەن قاتار اعىلشىن ءتىلىن دە مەڭگەرۋى كەرەك. بۇل ماڭىزدى. فيزيكا، ماتەماتيكا، حيميادان ساباق بەرەتىن مۇعالىمدەرگە اعىلشىن ءتىلىن ۇيرەنۋگە قانشا ۋاقىت كەتەدى؟ ال ءبىزدىڭ مينيسترلىك مۇعالىمدەرگە ەرتەڭنەن باستاپ اعىلشىنشا وقىتۋدى تاپسىردى. جارايدى، ولاردى ءۇش ايعا شاقىرادى، وقىتادى، ءبىراق ءۇش ايدىڭ ىشىندە كىم ماتەماتيكانى اعىلشىنعا بەرىپ كەتە الادى؟ ال بۇعان قىرۋار قاراجات ءبولىنىپ وتىر. مۇمكىن، شەتەلدەن مۇعالىمدەر شاقىرىپ، ساباق بەرگەن دۇرىس بولار ما ەدى؟! سوندىقتان بۇل مىندەت قالادى. ءبىلىم مينيسترلىگى دۇرىس باعىتتا كەلە جاتىر، ءبىراق ءبارى اقىلعا قونىمدى بولۋى ءتيىس"، دەدى مەملەكەت باسشىسى. 

ۇسىنعان: اسەل بولات قىزى