كوڭىلسىزسىڭ بە؟ ەشنارسەگە زاۋقىڭ سوقپايدى ما؟ اينالاداعىنىڭ ءبارى دە مازاڭدى الىپ جىبەردى مە؟ ءتوزىمىڭ تاۋسىلىپ بارا ما؟ ءۇمىتىڭ ءۇزىلىپ، ساعىڭ سىنعانداي حالدەمىسىڭ؟ جانىڭنىڭ سىرىن ۇعىنعانداي بولىپ كىم جاۋدىرەي قاراسا، سونىڭ يىعىنا باسىڭدى قويىپ، ەگىلىپ، جىلاعىڭ كەلە مە؟ ەشنارسەگە ۇلگەرتپەيتىن ۋاقىتقا اشۋلىسىڭ با؟ كوپ نارسەنى جوسپارلاپ، ءبىراق ءبىرى دە ورىندالماي جاتقاندىقتان، بارىنە قولدى ءبىر سىلتەپ، بارىنەن قاشىپ كەتكىڭ كەلە مە؟ الدە ءبىراز ۋاقىتقا جەر تۇبىنە بارىپ-قايتقىڭ كەلەتىن شىعار؟ سىيلامايتىن، باردى ءقادىر تۇتپايتىن، سەنى تۇسىنۋگە دە تىرىسپايتىن، سەنىڭ بار-جوعىڭا قىزىقپايتىن، ىزدەمەيتىن، ىزدەۋىڭدى قالامايتىن ادامدار شارشاتتى ما؟ سىناپ-سىناپ، سىنىنا شىداساڭ، كەرەمەتتەي سىيلىق ۇسىنار تاعدىرمەن تايتالاسۋدان جالىقتىڭ با؟...

الدە جۇرەككە جول تاپقان باقىتتان باسىڭ اينالىپ ءجۇر مە؟ جادىراي شىققان كۇنگە كۇلە قاراپ، جەلمەن بىرگە تەربەلىپ ءجۇرمىسىڭ؟ كوشەدە كەزدەسكەن ءار جانعا جىميا قاراپ، وزىڭنەن ءوزىڭ ءمازسىڭ بە؟ جوسپارلارىڭنىڭ ءبىرازى عانا ورىندالسا دا، سابىرىڭ ساندىق تۇبىندە مە؟ رەنجىتكەندەرگە، رەنجىتكىسى كەلگەندەرگە اشۋلى ەمەسپىسىڭ؟ بارىڭدى، ءبارىڭدى تارتىپ العان ادامدارعا دا وكپەلى ەمەسپىسىڭ؟ ەشكىمدى دە جەك كورمەيمىسىڭ؟ بارىڭدى قاناعات تۇتىپ، ءار كۇننەن تەك جاقسىلىق كۇتەمىسىڭ؟ «ءۇمىتسىز – شايتان عانا» ەكەنىنە بەك سەنىمدى تۇردە، تەك العا قادام اتتاپ كەلەمىسىڭ؟...

 جو-جوق. سەن، ءسىرا، جازدا گۇلدەي جايناپ، قۇستارمەن بىرگە سايراپ جۇرگەن شىعارسىڭ؟ ال، كۇزدە جاپىراقتارمەن بىرگە سارعايىپ، جەلدىڭ جوتاسىنا ءمىنىپ، قالىقتاپ، كۇز جاڭبىرىمەن قوسىلىپ جىلاپ ءجۇرسىڭ، ءيا؟ الدە قاتەلەستىم بە؟ مۇمكىن قىستا اپپاق قارداي اق جۇرەگىڭمەن كۇللى الەمگە اق پەيىلىڭمەن نۇرلى شۋاق سىيلايتىن شىعارسىڭ؟ قىستىڭ ۇلپا قارىمەن بىرگە ەرىپ، اعاشتاردىڭ تامىرىنا ءنار بەرەر تامشى سۋ بولىپ، سوسىن اعاشتىڭ ءون بويىنا ءسىڭىپ، كوكتەمدە بۇرشىك بولىپ جارىلامىسىڭ؟ وسىلايشا، جاڭا ومىرگە قادام اتتاپ ءجۇر مە ەكەنسىڭ؟..

تىڭداشى، مەنىڭ ساعان ايتار جاڭالىعىم بار!!! قۇلاق اسشى، سوزىمە؟ ەگەر، ەگەر... بىلەسىڭ بە، ەگەر وسى اتالعانداردىڭ ءبارى سەنىڭ باسىڭنان وتكەن بولسا، ءوتىپ جاتسا... دەمەك، سەن، سەن، بىلەسىڭ بە....(!) دەمەك، سەن ءومىر ءسۇرىپ جاتىرسىڭ! قۇتتىقتايمىن! سەن ءومىر ءسۇرىپ جاتىرسىڭ! سەن بارسىڭ! سەن ءتىرىسىڭ! سەن، سەن، ءيا، ءيا، سەن! سەن مىنا جالعاندا، مىنا ومىردە، جازبامدى وقىپ وتىرساڭ، دەمەك، مەنىڭ ومىرىمدە دە بارسىڭ! بىلەسىڭ بە، سول ءۇشىن دە كوپ راحمەت، ەكراننىڭ ارعى جاعىندا وتىرعان بەيتانىس تانىسىم! 

 ماقپال سەمباي