2019 جىلدىڭ 27 اقپان كۇنى ءبىلىمنىڭ قاراشاڭىراعى ءال-فارابي اتىنداعى  قازاق ۇلتتىق ۋنيۆەرسيتەتىندە فيلولوگيا جانە الەم تىلدەرى فاكۋلتەتى قازاق ءتىل ءبىلىمى كافەدراسىنىڭ ۇيىمداستىرۋىمەن «مەن – قازاقپىن» اتتى جىر بايقاۋى ءوتتى. 

اتالمىش بايقاۋ مەملەكەتتىك سىيلىقتىڭ لاۋرەاتى، قازاقستاننىڭ حالىق جازۋشىسى، اقيىق اقىن جۇبان مولداعالييەۆتىڭ تۋعانىنا 100 جىل جانە «مەن قازاقپىن» پوەماسىنىڭ جارىق كورگەنىنە 55 جىل تولۋىنا وراي ۇيىمداستىرىلدى.

مەن – قازاقپىن مىڭ ءولىپ، مىڭ تىرىلگەن.
جورگەگىمدە تانىستىم مۇڭ تىلىمەن
جىلاعاندا جۇرەگىم، كۇن تۇتىلىپ،
قۋانعاندا كۇلكىمنەن ءتۇن تۇرىلگەن، - دەپ جىر جازىپ، جۇرەگىمىزدە ۇلتتىق رۋحتى وياتقان.

اقىنعا دەگەن قۇرمەتتىڭ وراسان بولعاندىعى سونشا، 4-11 سىنىپ اراسىندا ۇيىمداستىرىلعان شاراعا ءجۇز ەلۋگە جۋىق مەكتەپ وقۋشىلارى قاتىسىپ، ب ا ق سىناستى. 

بايقاۋدى ۇيىمداستىرۋداعى ماقسات – اقىن جىرلارىنداعى پاتريوتتىق سەزىمدى جاستاردىڭ ساناسىنا ۇيالاتۋ، ۇلتتىق رۋحتى كوتەرۋ بولسا، سول ماقسات ورىندالدى دەۋگە بولادى. سەبەبى، ورىمدەي ۇلانداردىڭ ءورشىل رۋحتا ولەڭ وقىپ، بايگەدەن وزا شاپقاندارى وتە كوپ بولدى. وسى كەشتە «مەن – قازاقپىن» پوەماسىنىڭ قازاقتىڭ رۋحىنا سوزبەن تۇرعىزىلعان ەسكەرتكىش ەكەنىن جاستار تاعى ءبىر دالەلدەدى. 

بيىل قازۇۋ-دىڭ قۇرىلعانىنا 85 جىل تولۋىنا بايلانىستى بايقاۋدا ۇزدىك ونەر كورسەتكەن تالاپكەرلەرگە مەرەيتويلىق وسى سانمەن استاستىرىلا 85 جۇلدەلى ورىن (ءى، ءىى، ءىىى ورىندار جانە العىس حاتتار) تاعايىندالدى. كافەدرا اياسىندا قۇرىلعان «لينگۆوارنا» عىلىمي-زەرتتەۋ ورتالىعىنىڭ اتىنان اقشالاي، زاتتاي سىيلىقتار بەرىلدى. بيىل مەكتەپ بىتىرەتىن تۇلەكتەرگە ەلىمىزدەگى ماڭدايالدى وقۋ ورنى قازۇۋ-گە وقۋعا تۇسۋلەرىنە يگى تىلەكتەر ايتىلدى. 

ارناۋ ايتىلىپ، قوناقكادە رەتىندە وقۋشىلاردىڭ ءوز ونەرلەرىن تارتۋ ەتكەن، انمەن، كۇيمەن استاسقان پوەزيا كەشى وقۋشىلاردىڭ ويىندا ۇزاق ساقتالارى ءسوزسىز.

ومار بالنۇر، كامال اقەركە