اقش پرەزيدەنتىنىڭ ۇلتتىق ماسەلەلەر جونىندەگى كەڭەسشىسى دجون بولتون رەسمي ۆاشينگتون ۆەنەسۋەلاداعى مادۋرو بيىلىگىن ءبىرجولاتا قۇلاتۋ ءۇشىن حالىقارالىق كواليسيا قۇراتىنىن ءمالىم ەتتى. بۇل تۋرالى ول CNN اگەنتتىگىنە بەرگەن سۇحباتىندا ايتتى.
ناقتى ساياسي تۇجىرىمعا جۇگىنسەك، اقش-تىڭ جاقتاستارى «نيكولاس مادۋرونى «زاڭسىز سايلانعان پرەزيدەنت. سوندىقتان ول ورنىن بوساتۋى ءتيىس. ونىڭ ورنىنا وپپوزيسيا ليدەرى حۋان گۋايدو كەلۋى ءتيىس. ول ءۇشىن ءبىزدىڭ كواليسيا قولدان كەلگەننىڭ ءبارىن جاسايدى. الداعى ۋاقىتتا مادۋرو رەجيمىنە قارسى تۇراتىن كواليسيالىق كۇشتەردىڭ سانىن كوبەيتەمىز. مادۋرو بيلىگى ورنىنان كەتۋى ءتيىس»،– دەپ وتىر.
بولتوننىڭ اڭگىمەسىنە قاراعاندا، شىن مانىندە ولار نيكولاس مادۋرو بيلىگىن ءسوزسىز كەتىرەتىن سياقتى. ولاي بولعان جاعدايدا ەلدە ازامات سوعىسى باستالادى. سىرتقى كۇشتەر وپپوزيسياعا دەم بەرەدى. حۋان گۋايدوعا كومەك كورسەتەدى. ءقازىردىڭ وزىندە اقش بيلىگى وپپوزيسيا ليدەرى گۋايدونى قولداپ وتىر. ال رەسەي قايتپەك؟ جاعداي شيەلەنىسسە، سەنارييدىڭ قالاي ءوربيتىنىن رەسمي ماسكەۋ اشىق ايتپاي وتىر.
ال ءوزىن «ۋاقىتشا پرەزيدەنت» ساناعان گۋايدو بۇگىندە شەكارالىق ەل كولۋمبيادا ءجۇر. ەگەر ول ەلگە ورالاتىن بولسا، مادۋرو گۋايدونى تۇتقىنداۋى مۇمكىن. بۇل تۋرالى ۆەنەسۋەلانىڭ رەسمي بيلىگى ءمالىم ەتتى. ءبىراق وقيعانىڭ قالاي ءوربيتىنى ءالى بەلگىسىز. ەگەر گۋايدو ۇستالاتىن بولسا، وندا اق ءۇي دە قاراپ قالمايدى. ال وپپوزيسيا باسشىسى ەل تۇرعىندارىن تاعى دا مادۋرو بيلىگىنە قارسى كوشەگە شىعۋعا شاقىردى.
ال بيلىك باسىنداعى پرەزيدەنت «حۋان گۋايدونىڭ 30 جىل مەرزىمگە اباقتىعا قامالاتىنىن» ءمالىم ەتتى.
قالاي ايتقاندا دا، جاعداي بارعان سايىن كۇردەلەنىپ بارادى. ءبىراق وتكەن اپتادا نەمىستىڭ Frankfurter Allgemeine باسىلىمى مادۋرو بيلىگىن قۇلاتۋ وڭاي ەمەستىگىن، ال حۋان گۋايدو ءقازىر حالىقتىڭ قولداۋىنان ايرىلىپ بارادى» دەگەن تۇجىرىم جاسادى.
...ال الداعى ۋاقىتتا جاعداي قالاي ءوربيدى، ونى ەندى ۋاقىت كورسەتەر. ءبىراق ۆەنەسۋەلاداعى ساياسي تۇراقسىزدىقتىڭ باستالعانىنا ءبىر اي ۋاقىت وتسە دە، مادۋرو بيلىگى مىزعىماي تۇرعانى ول ەندى اقيقات.
پىكىر قالدىرۋ