ماجىلىستەگى ۇكىمەت ساعاتىندا دەپۋتات بەرىك دۇيسەنبينوۆ قىتايداعى قانداستار ماسەلەسىن كوتەردى. ماجىلىسمەن سىرتقى ىستەر ءمينيسترى بەيبىت اتامقۇلوۆتان تۇزەتۋ لاگەرلەرى مەن قورلىق كورگەن، ەلىنە جەتە الماي جاتقان قانداستاردىڭ ماسەلەسىن شەشۋ بويىنشا قانداي كەشەندى شارالار قولعا الىنعانىن سۇرادى.

"بىزگە كۇن سايىن قىتايدان ءبىرتالاي مالىمەت كەلىپ تۇسەدى. بۇل ماسەلە ءبىزدىڭ ەرەكشە نازارىمىزدا. بىلتىر 2،5 مىڭ قانداسىمىز قازاقستانعا ورالۋعا رۇقسات الدى. ال بيىل قوس ازاماتتىق ءۇشىن 33 ادام قاماۋعا الىنعان. ديپلوماتيالىق جۇمىستاردىڭ ناتيجەسىندە سونىڭ 20-سىن ەلگە قايتاردىق"، - دەدى مينيستر دەپۋتاتقا بەرگەن جاۋابىندا.

سونىمەن قاتار، ونىڭ ايتۋىنشا، مينيسترلىككە قاماۋدا وتىرعان قازاقتار تۋرالى 1387 ارىز تۇسكەن. ءار تۇسكەن ارىزدى جەكە-جەكە قاراستىرىپ جاتىرمىز، - دەپ سەندىردى اتامقۇلوۆ.

"بۇل ماسەلە بۇكىل الەمدەگى مۇسىلمانداردىڭ قۇلاعىن شۋلاتىپ جاتىر. قىتايدىڭ ءوز ساياساتى بار، ءبىرقاتار ديپلومات سول لاگەرگە بارىپ، ءوز كوزدەرىمەن كورىپ قايتتى. بۇگىنگى تاڭدا، بىزگە تۇسكەن مالىمەت بويىنشا، سول جەردە ۇستالعان قازاقتاردىڭ سانى 80 پروسەنتكە ازايعان، ءبارىن شەتىنەن بوساتىپ جاتىر. بيىل دا قانداستارىمىز جەڭىلدىك الدى"، - دەدى ول.

اتامقۇلوۆ سىرتقى ىستەر مينيسترلىگىمەن عانا ەمەس، ىشكى ىستەر جانە باسقا دا قۇزىرلى ورگاندارمەن ۇلكەن جۇمىس جۇرگىزىلىپ جاتقانىن اتاپ ءوتتى.

ۇسىنعان: ماقپال سەمباي