كۇنى كەشە كورشى بالالارمەن اسىر سالىپ ويناپ جۇرگەن بالاقاي بۇگىندە ءومىر مەن ءولىمنىڭ اراسىندا قالدى. 4 جاستاعى استانا تۇرعىنى نۇرقادىل حيباداتتىڭ بويىنان قاتەرلى ىسىك تابىلعان. قازاقستاندىق دارىگەرلەر بارىن سالعانىمەن اسقىنىپ بارا جاتقان اۋرۋدىڭ بەتىن قايتارا المايمىز دەپ اشىق ايتىپتى. ەندىگى ءۇمىت شەتەلدىك مامانداردا. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى.
 
اماندىق حيباداتتىڭ شاڭىراعىنا كەنجە بالاسىنىڭ اۋىرعانى قاتتى باتقان. وسىدان بىرنەشە اي بۇرىن عانا ورتالارىندا ويناپ جۇرگەن پەرزەنتى اياق استى اۋىرىپ، بويىنان قاتەرلى ىسىك تابىلعانىن ەستىگەندە ەسەڭگىرەپ قالىپتى. اۋەلدە نۇرقادىلدىڭ بەتى بەرى قاراعاندا ءبىر جاساپ قالعانىمەن، قۋانىشتارى ۇزاققا سوزىلماعان.

«انا مەن بالادا كۇردەلى ەكى وتا جاسالدى. التى كۋرس جوعارى دوزالى حيميا تەراپيا بەرىلدى. سوعان قاراماستان ىسىكتىڭ قايتا ءوسىپ جاتقانىن انىقتاپ وتىر. ءبىزدىڭ وتاندىق دارىگەرلەر قولدارىنان كەلگەنىن جاسادى. ەندى ايتىپ وتىر قايتالانىپ وسكەن جاعدايدا بىزدە ونى ەمدەيتىن پروتوكول جوق دەيدى. ءبىزدىڭ قولىمىزدان كەلمەيدى دەيدى»، - دەيدى بالانىڭ اكەسى اماندىق حيبادات ۇلى.

ومىرلەرىنىڭ قىزىعىن دەرتكە قيماعان اتا-انا دەرەۋ شەتەلدىك كلينيكالارعا حابارلاسىپ قۇجاتتارىن جىبەرگەن. بالانى ەمدەۋگە بولادى، ءبىراق قۇنى ارزان ەمەس ەكەن. مىسالى، گەرمانيادا 280 مىڭ دوللار، يزرايلدە 300 مىڭ، ال امەريكادا 500-700 مىڭ دوللار ارالىعىندا سۇراعان. قالتا كوتەرەدى-اۋ دەپ تۇركيانى تاڭداپتى. ەم-دومعا 140 مىڭ دوللارداي قاجەت ەكەن.   

«قازىرگى تاڭدا 30 مىڭ دوللار تۋىسىمنان قارىز الدىم. سونىڭ سىرتىندا قولىمىزدا بار اقشا 50 مىڭ دوللار جينادىق. ونىڭ 30 مىڭىن قارىزعا الىپ وتىرمىز. ەندى ەمىنە ار جاعىندا 29 مىڭ دوللار كەرەك. ترانسپلانتاسيا جىلىك مايىن اۋىستىرۋ، ەگەر وزىنىكىن اۋىستىرسا، 40 مىڭ دوللار، ەگەر تۋىسىنىكىن اۋىستىرسا، دونور وندا 65 مىڭ دوللار»، - دەپ ايتتى اماندىق حيبادات ۇلى.

كىشكەنتاي نۇرقادىلدىڭ اعاسى مەن اپكەلەرى دە ونى ساعىنىپ جۇرگەنى بايقالادى. ونىڭ ويىنشىقتارى ءبىر بۇرىشتا جينالىپ تۇرعانىنا ءبىراز بولعان. ءۇيدىڭ ءىشى دە تىم تىرىس.  

«نۇرقادىلدىڭ جاسى تورتتە. ول – ءبىزدىڭ كەنجە باۋىرىمىز. ءبىز ونى قاتتى ساعىندىق. ونىڭ ۇيگە قايتىپ كەلۋىن قالايمىز. ول ءوزى اشىق بالا. ۇيدە جۇگىرىپ ويناپ جۇرەدى»، - دەيدى ءتانزيلا حيبادات.

تەلەفون سوققان سايىن 4 جاستاعى بالاقاي اكەسىنە «مەن ۇيگە قايتىپ كەلەمىن. ماعان قۇدايىم كومەكتەسەدى» - دەپ ايتادى ەكەن.  

«ەڭ ءبىرىنشى تۋعان تۋىستارىمىزدىڭ جانە وسىنداي جاعدايعا بەيجاي قارامايتىن قايىرىمدى حالىقتىڭ ارقاسىندا، مىنە، العاشقى قاراجاتتى جۇمساپ ەمىمىزدى باستاپ كەتتىك. العىسىمىز شەكسىز»، - دەيدى نۇرقادىلدىڭ اناسى جۇلدىز الپامسا قىزى.

«كوپ تۇكىرسە كول دەگەن ءسوز بەكەر ايتىلماعان شىعار» -  دەيدى اماندىق حيبادات. بۇگىنگە دەيىن بارماعان جەرى، باسپاعان تاۋى قالماپتى. 140 مىڭ دوللار دەگەن از قاراجات ەمەس، ونى تابۋعا، جيناۋعا جاۋىق كەرەك. ءبىراق، قاتەرلى ىسىك كۇتپەيدى، كۇن ساناپ اسقىنا بەرەدى. 

«مالىم -  جانىمنىڭ ساداقاسى» - دەپ وتىرعان كىشكەنتاي نۇرقادىلدىڭ وتباسى بار دۇنيە مۇلكىن ساۋداعا شىعارعان. كولىك پەن تەحنيكادان باستاپ ءوز كۇشتەرىمەن سالعان ۇيلەرىنە دەيىن ساتۋدى كوزدەپ وتىر. ءبىراق ەسەپتەي كەلگەندە ونىڭ ءوزى ەمدەۋگە جەتپەيتىن كورىنەدى. ەندىگى ءۇمىت قايىرىمدى جانداردا. جومارت جاندار كومەكتەسىپ جاتسا، تۇركيادا ەمدەلىپ جاتقان بالا امان ەسەن ءوز ۇيىنە ءوز ەلىنە ورالۋى ابدەن مۇمكىن». 

ۇسىنعان: نازەركە لابيحان