قازاقستان مۇسىلماندار ءدىني باسقارماسى بالالارعا ارنالعان راكوۆيناعا اياعىن جۋىپ تۇرعان ەر ادامعا بايلانىستى ونىڭ ىس-ارەكەتى دۇرىس ەمەستىگىن ايتتى، دەپ حابارلايدى Qamshy.kz اقپارات اگەنتتىگى tengrinews.kz سايتىنىڭ دەرەگىنە سۇيەنىپ.
بىرنەشە كۇن بۇرىن سەرىك اباس-شاح ءوزىنىڭ الەۋمەتتىك جەلىدەگى پاراقشاسىندا MEGA ويىن-ساۋىق ورتالىعىنداعى بالالار راكوۆيناسىنا اياعىن جۋىپ تۇرعان ەر ادام تۋرالى پوست جاريالاعان بولاتىن. بۇل جايت الەۋمەتتىك جەلى قولدانۋشىلارى اراسىندا قىزۋ تالقىعا ءتۇسىپ، ءبىرشاما سۇراقتار تۋىندادى. بەلگىلى بولعانىنداي، ەر ادام قوعامدىق دارەتحانادا اياعىن جۋىپ، دارەت الۋعا ويىن-ساۋىق ورتالىعى باسشىلىعىنان رۇقسات الىپتى.
قمدب ءوز كەزەگىندە، بۇل ىسكە قاتىستى ءمان-جايدى ءتۇسىندىرىپ، بالالارعا ارنالعان راكوۆيناعا اياق جۋۋدىڭ دۇرىس ەمەستىگىن ايتتى.
«ەتيكا مەن مادەنيەت تۇرعىسىنان قارايتىن بولساق، ەر ادامنىڭ بۇل قىلىعى دۇرىس ەمەس. قازاقستاندا ءتۇرلى ۇلت پەن ءدىن وكىلدەرى تۇرادى. ولارعا دا قۇرمەتپەن قاراۋىمىز كەرەك. سونداي-اق، پوست جاريالاعا اۆتور بۇل ماسەلەنى ءدال سول جەردە شەشۋى كەرەك ەدى. جازبا جاريالانعاننان كەيىن قوعامدا ەكى ءتۇرلى پىكىر قالىپتاسىپ، ءبىرى اياق جۋعان ەر ادامنىڭ ءىسىن دۇرىس دەپ قۇپتاسا، ەندى بىرەۋلەر وعان قاتىستى ءتۇرلى بىلاپىت سوزدەر ايتىپ، سىننىڭ استىنا الۋدا. مۇسىلماندار – ءوز ورتاسى مەن قوعامعا ەش زيانىن تيگىزبەيتىن ادامدار»، - دەپ مالىمدەدى قمدب ءباسپاسوز-حاتشىسى اعابەك قونارباي ۇلى.
ويىن-ساۋىق ورتالىعىنىڭ اكىمشىلىگى بولسا ءوز كەزەگىندە قوعامدىق دارەتحانادا اياق جۋۋعا ەشكىمگە دە رۇقسات بەرمەگەنىن ايتتى.
ايتا كەتەيىك، مۇسىلمانعا پارىز ەتىلگەن امالدىڭ ءبىرى – ناماز وقۋدىڭ الدىندا ادامدار دارەت الادى. دارەت الۋ بارىسىندا اياقتى دا جۋۋ كەرەكتىگى بەلگىلى. الايدا، قازىرگى تاڭدا بارلىق قوعامدىق جەرلەردە نامازعا جىعىلعان ادامدارعا جاعداي جاسالماعان، سونداي-اق، دارەت الاتىن جەرلەر دە جوقتىڭ قاسى.
«كوپتەگەن ويىن-ساۋىق ورتالىقتارىندا نامازحانالار بار، سوندىقتان دا سول جەردە ورنالاسقان دارەتحانادا دارەت العان دۇرىس. حالقىمىزدىڭ 70 پايىزدان استامى مۇسىلماندار بولعاندىقتان الداعى ۋاقىتتا نامازحانالار مەن دارەت الۋ بولمەلەرىنىڭ سانىن كوبەيتكەن دۇرىس بولار ەدى»، - دەپ ايتىپ ءوتتى اعابەك قونارباي ۇلى.
ۇسىنعان: نازەركە لابيحان
پىكىر قالدىرۋ