ق ر پرەزيدەنتى ىستەرىنىڭ باسقارماسى مەديسينالىق ورتالىعىنىڭ ديرەكتورى ءامىر احەتوۆتىڭ قايتىس بولعانىنا ءبىر اي بولدى. جۋرناليستەرگە «دارىگەر ولىمىنە جۇرەك تالماسى سەبەپ بولدى» دەپ ايتىلىپ كەلدى. الايدا سەنۋ قيىن: ۇزاق ءومىر ءسۇرۋ جايلى زەرتتەپ جۇرگەن 49 جاستاعى مەديك قالايشا ءوز دەنساۋلىعىنداعى اقاۋدى بايقاماي قالعان دەپ ويلايسىڭ... سول سەبەپتى «ۆرەميا» گازەتى ءامىر احەتوۆتىڭ ءولىمىنىڭ ناقتى سەبەپتەرىن انىقتاۋعا كىرىستى. بالكىم، قۇقىق قورعاۋ ورگاندارى جىبەرىپ العان، بايقاماي قالعان ءبىر تۇستارى بولعان شىعار...

انىقتالعانداي، احەتوۆ اۋرۋحاناعا اۋىر جاراقاتپەن تۇسكەن ءارى كوپ قان جوعالتقاندىقتان قايتىس بولدى. جۇرەكتىڭ بۇل ولىمگە ەش قاتىسى جوق.

ءامىر احەتوۆتىڭ ولىمىنە بايلانىستى تەرگەۋ ىستەرى 2019 جىلدىڭ  3 اقپانىندا باستالدى. سول كۇنى ەلگە تانىمال دارىگەر ومىردەن وزعان ەدى. ازىرگە استانا قالالىق پوليسيا دەپارتامەنتىنىڭ تەرگەۋشىلەرى «سۋيسيد» دەگەن بولجام جاساپ وتىر. ءىس 105-باپتىڭ 1-بولىمىنە سايكەس «ءوزىن-وزى ولتىرۋگە دەيىن جەتكىزۋ» بويىنشا قارالۋدا. مۇنداي قىلمىس ءۇشىن بەرىلەتىن جازا – كۇدىكتىنى 3 جىلعا دەيىن باس بوتاندىعىنان ايىرۋ.

باستى ماسەلەگە كوشەلىك...

3 اقپانعا قاراعان ءتۇنى دارىگەردىڭ پاتەرىندە نەندەي جاعداي بولدى؟ مارقۇمنىڭ جارى ناتاليا احەتوۆا ءمان-جايدى تۇسىندىرۋگە تىرىستى. ايتۋىنشا، وقيعا ورىن الماس بۇرىن كەشكە دوستارىمەن مەيرامحانادا تاماقتانعان. ەر ادامدار ىشىمدىك ىشسە، ايەلدەر شاراپ ءىشتى. الايدا دوستاردىڭ ساعىنىشى باسىلماعان بولۋى كەرەك، مەيرامحانادان شىعىپ ءبارى احەتوۆتەردىڭ ۇيىنە بارادى. كەيىن ب. مەن ايەلى كەتىپ قالدى، ءامىر مەن ناتاليا پاتەردە جالعىز قالدى. سۇمدىقتىڭ ءبارى ەندى باستالدى. ناتاليا احەتوۆا كۇيەۋىمەن قاتتى ۇرىسىپ قالعانىن ايتتى. ناتيجەسىندە ءامىر ءوزىن جارالايدى. ناتاليانىڭ ايتۋىنشا، العاشىندا كۇيەۋىنىڭ ەسى بولعان ەكەن، ايەلىنەن جەدەل-جاردەم شاقىرۋىن ءوتىنىپتى.

ناتاليا 103-كە حابارلاستى، الايدا تۇتقانى ەشكىم كوتەرمەدى. ءسويتىپ كۇيەۋىنىڭ ورىنباسارى راۋشان قارابايەۆاعا حابارلاسادى. ول تەز ارادا جەدەل جاردەم بريگاداسىن جىبەردى. دارىگەرلەر كەلگەنشە، احەتوۆا كۇيەۋىنە العاشقى كومەك كورسەتۋگە تىرىستى. جۇرەگىنە ماسساج جاساپ، جارانى تاڭباق بولدى.

ءدال وسى ساتكە دەيىن ناتاليا احەتوۆا سەنىمدى سويلەدى. ءارى قاراي...

ءامىر احەتوۆتى دارىگەرلەر الىپ كەتتى. ال ايەلى قانعا بويالعان كيىمىن شەشىپ، اس ءۇي سۇلگىسىمەن پاكەت ىشىنە سالا سالعان. ەگەر وقيعا دالىزدە بولسا، اس ۇيدە قاننىڭ قالاي پايدا بولعانى تۇسىنىكسىز... ناتاليا زاتتاردى كولىك جۇرگىزۋشىسى ايتجان يبرايەۆتان بەرىپ جىبەرەدى. قان جۇققان كيىمدەرى بار پاكەتتى ناتاليانىڭ بۇيرىعىمەن يبرايەۆ قوقىسقا تاستايدى. تەرگەۋ بارىسىندا پوليسيا مۇشەلەرى الگى زاتتاردى تاۋىپ الىپ، تالداما جاساۋعا وتكىزەدى.

ناتاليانىڭ سوزىنە سەنسەك، ول جاراقات جاسالعان پىشاقتى ءسۇرتىپ، پاتەردىڭ ەدەنىن جۋىپ شىققان. نەگە بۇلاي ىستەگەنىن شوك جاعدايدا وتىرعان ايەل ايتپادى.

ەرلى-زايىپتىلار اراسىندا بولعان جانجالدى احەتوۆتاردىڭ كورشىلەرى راستادى. الايدا ءامىر احەتوۆكە پىشاق سۇققان كىم؟ مۇنىڭ جاۋابىن پوليسيا ءالى الا الماي وتىر. ماماندار دا جارىتىپ ەشتەڭە ايتپاعان. تەك بەلگىلىسى، مارقۇمنىڭ وڭ جاق كەۋدەسى جارالانعان. ءارى سۋىق قارۋ 5-7 سانتيمەتر تەرەڭ سۇعىلعان ەكەن. كوپ قان جوعالتىپ الۋى – دارىگەردىڭ ولىمىنە اكەلىپ سوققان.

تەرگەۋ بارىسىندا احەتوۆتەردىڭ وقيعاسىنا تاعى ءبىر ايەلدىڭ قاتىسى بار ەكەنى انىقتالدى. قىمبات كولىكپەن جۇرەتىن 30-دان ەندى اسقان ايەل تۇرمىس قۇرماعان. استانا مەن الماتىدا ءۇيى بار، ەكى قالادا دا جۇرە بەرەدى. الايدا جانجالعا ونىڭ قاتىسى بار-جوعىن ايتۋ ازىرگە ەرتە،

مۇنداي دەرەكتەردى كەلتىرگەن time.kz ءىىم باسشىسى ەرلان تۇرعىمبايەۆتىڭ قانداي دا ءبىر پىكىر بەرۋىن تالاپ ەتىپ وتىر.

Time.kz سايتىنان اۋدارعان گۇلىم جاقان