كەشە تاڭعى ساعات ءتورت شاماسىندا «مەتاللۋرگ-3» باۋ-باقشا قوعامداستىعىنىڭ اۋماعىندا ءورت شىقتى. جانىپ جاتقان ۇيدە قالىپ قويعان التى جاستاعى بالا مەن ايەل ادامدى كورشىسى قۇتقارىپ قالدى، دەپ حابارلايدى Qamshy.kz اقپارات اگەنتتىگى Altaynews.kz سايتىنا سىلتەمە جاساپ.

انىقتالعانداي، جەر ءۇيدىڭ اعاشتان تۇرعىزىلعان قابىرعالارى مەن شاتىرى جانعان ەكەن.

وسى ۋاقىتتا كورشى ۇيدە بولعان مەرۋەرت تەمەربايەۆا ەسىمدى ازاماتشا ءورتتى دەر كەزىندە بايقاپ، ءوزى جالعىز جانىپ جاتقان ۇيدەن ايەل مەن بالانى تىسقا الىپ شىعىپتى.

بولعان وقيعا جايلى ەكى ادامدى قۇتقارىپ قالعان مەرۋەرت تەمەربايەۆا بايانداپ بەردى:

- ءورت شامامەن تۇنگى ساعات ۇشتەردەن كەتە، تورتكە تاياۋ باستالعان ەكەن. انامنىڭ ۇيىندە قوناقتا بولعانمىن، ءوزىم ول ۇيدە تۇرمايمىن. ورتەنگەن ءۇي بىزگە قاراما قارسى ورنالاسقان. انامنىڭ ۇيقىسى ساق. تۇندە تەرەزەگە جارىق تۇسكەندە بىردەن ويانىپ كەتىپتى. مەنى دە وياتتى. ءۇيدىڭ ورتەنىپ جاتقانىن كورە سالا مەن ەش كيىمسىز تۇنگى ءىش كويلەگىممەن تىسقا جۇگىرىپ شىقتىم. ول كەزدە ءورت ەندى باستالىپ كەلە جاتقاندىقتان، ءۇيدىڭ ىشىنە كىرىپ كەتە الدىم. وتە قورقىنىشتى. كىشكەنە بالا قاتتى كۇيىپ قالعان. ونى كوتەرىپ تىسقا الىپ شىعىپ، ىلە-شالا جاس كەلىنشەككە بولىستىم، - دەيدى مەرۋەرت تەمەربايەۆا.

جانىپ جاتقان ۇيدەن الىپ شىققان ايەل ادام: «ۇيدە كۇيەۋىم قالىپ قويدى، وعان كومەكتەسىڭىزشى»، - دەپ جالىنعان ەكەن. ءبىراق قىزىل جالىننىڭ قارقىنى كۇشەيە تۇسكەندىكتەن، مەرۋەرت ۇيگە قايتا كىرە الماعان.

- ونىڭ ۇستىنە ەر ادامدى جالعىز ءوزىم كوتەرىپ شىعارۋعا شامام دە كەلمەيدى. مەنىڭ ورنىمدا ەر ادام بولسا، مۇمكىن ونى دا امان الىپ قالار ما ەدى، كىم ءبىلسىن،  - دەيدى ول.

مەرۋەرت داۋىستاپ ايعايلاپ، ماڭايداعى كورشىلەردى كومەككە شاقىرا باستاعان. الايدا تاڭعى تورتتە شىرت ۇيقىدا جاتقاندار ەستىمەگەن بولۋ كەرەك، ەشكىم كومەككە كەلمەيدى.

- قايتا انامنىڭ ۇيىنە كىرىپ، اپايىمدى وياتتىم. ەكەۋىمىز بىرگە جەدەل جاردەم مەن ءورت ءسوندىرۋ قىزمەتىن شاقىرتتىق.

زارداپ شەككەندەر بالالار اۋرۋحاناسى مەن 1ء-شى قالالىق اۋرۋحانانىڭ جانساقتاۋ بولىمىنە جەتكىزىلگەن. جاعدايلارى اۋىر.

جالىن جويقىن بولعاندىقتان، باسپانا تولىقتاي ورتەنگەن. ءورتتى اۋىزدىقتاۋ ءۇشىن قوسىمشا تاعى ءبىر اۆتوسيستەرنا جىبەرىلىپتى. ءورت ءسوندىرۋ بارىسىندا ورتەنىپ كەتكەن ەر ادامنىڭ ءمايىتى تابىلىپ وتىر. ءقازىر ونىڭ جەكە باسى انىقتالۋدا.

ۇسىنعان: نازەركە لابيحان