كۇلاش شامشيدينوۆا كەلەسى جىلى جاڭا ءبىلىم باعدارلاماسى قابىلداناتىنىن مالىمدەدى.

ءبىلىم جانە عىلىم ءمينيسترى كۇلاش شامشيدينوۆا مەملەكەتتىڭ ءبىلىم سالاسىنداعى ساياساتىن ودان ءارى جالعاستىراتىنىن جەتكىزدى، دەپ حابارلايدى Qamshy.kz اقپارات اگەنتتىگى Sputnik قازاقستانعا سىلتەمە جاساپ.

"بىرىنشىدەن، ءار مينيستر ءوز رەفورماسىن ەنگىزبەيدى. جالپى مەملەكەتىمىزدە ءبىلىم ساياساتىنا قاتىستى قالىپتاسقان شارالار بار. مىنە، ءبىز وسى شارالاردى ەنگىزەمىز. ءبىراق، ءار مينيستر كەيبىر ماسەلەلەردە اسىعۋى نەمەسە كەي ماسەلەلەردى تەجەۋى مۇمكىن، كەيبىر ماسەلەلەردى ءوز تۇرعىسىنان قاراۋى مۇمكىن"، - دەدى شامشيدينوۆا ۇكىمەت كۋلۋارىندا.

ۆەدومستۆو باسشىسى كەلەسى جىلى جاڭا ءبىلىم باعدارلاماسى قابىلداناتىنىن جەتكىزدى.

"قازاقستاننىڭ ءبىلىم باعدارلاماسى بيىل اياقتالىپ، كەلەسى جىلعا جاڭا ءبىلىم باعدارلاماسى قابىلدانادى. ءبىراق، جاڭا ءبىلىم باعدارلاماسى اياسىندا ۇلكەن كۇردەلى وزگەرىستەر تۋرالى اڭگىمە ايتىلىپ وتىرعان جوق. ءبىز باستالعان شارۋانى ءوز بيىگىنە شىعارۋىمىز كەرەك"، - دەدى مينيستر.

ال جۋرناليستەردىڭ "مينيسترلىك ساعادييەۆتىڭ ساياساتىن جالعاستىرادى دەپ ايتا الامىز با؟" دەگەن سۇراعىنا:

"ءبىز ساعادييەۆتىڭ ساياساتىن ەمەس، مەملەكەتتىڭ ءبىلىم سالاسىنداعى ساياساتىن جالعاستىرامىز"، - دەپ جاۋاپ بەردى.

ۇسىنعان: نازەركە لابيحان