قازاقستاندا 1 شىلدەدەن باستاپ از قامتىلعان وتباسىلارعا ارناۋلى الەۋمەتتىك كومەك كورسەتۋ ءۇشىن قاجەتتى قۇجاتتار ءتىزىمىن قىسقارتادى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ مالىمدەدى دەپ حابارلايدى Qamshy.kz اقپارات اگەنتتىگى Tengrinews.kz سايتىنىڭ دەرەگىنە سۇيەنىپ. 

2019 جىلدىڭ 1 شىلدەسىنە دەيىن قاجەتتى قۇجاتتار پاكەتى سەگىز پۋنكتتەن تۇرادى: وتباسىنىڭ ءاربىر مۇشەسىنىڭ جەكە كۋالىگى، جەكە قوسالقى شارۋاشىلىق تۋرالى مالىمەتتەرى، بانكتىك شوت ءنومىرى، بالالاردىڭ تۋۋ (قايتىس بولۋ) تۋرالى كۋالىگى، نەكە قيۋدى (بۇزۋدى) تىركەۋ تۋرالى كۋالىك، جۇمىس ىزدەۋشى تۇلعا رەتىندە تىركەۋ الىنعانى تۋرالى ءوتىنىش، ەڭبەك قىزمەتىن راستايتىن قۇجات (بار بولسا)، ءبىلىمى، بىلىگى، ارنايى ءبىلىمى نەمەسە كاسىپتىك دايارلىعى تۋرالى قۇجاتى (بار بولسا).

مينيسترلىك تالاپ ەتىلەتىن قۇجاتتار تىزبەسىن قىسقارتادى. 2019 جىلدىڭ 1 شىلدەسىنەن كەيىن وتباسى ءۇشىن قۇجاتتار پاكەتى ءبىر قۇجاتتان تۇرادى - جەكە كۋالىك.

بەردىبەك ساپاربايەۆتىڭ ايتۋىنشا، قاجەتتى قۇجاتتار جيناۋمەن جەرگىلىكتى اتقارۋشى ورگاندار اينالىسادى. كەيىن ولار مالىمەتتەردى بازاعا ەنگىزەتىن بولادى.

ەسكە سالايىق، پرەزيدەنت نۇرسۇلتان نازاربايەۆ كوپبالالى انالارعا كومەك كورسەتۋدى كۇشەيتۋدى تاپسىرعان ەدى. "ۇكىمەتكە از قامتاماسىز ەتىلگەن وتباسىلاردى، اسىرەسە كوپبالالى وتباسىلاردى قامتۋدى كەڭەيتۋ ءۇشىن اتاۋلى كومەك كورسەتۋ كريتەرييلەرىن ەڭ تومەنگى كۇنكورىس دەڭگەيىنىڭ 70 پايىزعا دەيىن (14 849 تەڭگەدەن 20 789 تەڭگەگە دەيىن) ارتتىرۋدى تاپسىرامىن"، - دەگەن بولاتىن مەملەكەت باسشىسى.

از قامتىلعان كوپبالالى وتباسىلارعا 20 789 تەڭگەدەن بەرۋ - 2019 جىلدىڭ 1 شىلدەسىنەن باستالادى.

سونىمەن قاتار، ۇكىمەتكە كوپ بالالى وتباسىلاردان شىققان از قامتىلعان وتباسىلار ءۇشىن 40 مىڭنان اسا جالعا بەرىلەتىن پاتەر سالۋ تاپسىرىلدى. سونداي-اق، قازاقستاندا "تۇرعىن ءۇي قۇرىلىس جيناق بانكى" جۇيەسىنىڭ 2-3 پايىزىمەن تۇرعىن ءۇي قارىز بەرۋ جۇيەسى قۇرىلادى.

ۇسىنعان: نازەركە لابيحان