جاسى جۇزدەن اسسا دا شي توقىپ، قۇرت جايادى. ادالدىق پەن ەڭبەكتى تۋ ەتكەن بەسقاراعايلىق قاينيكەش اجەنىڭ عيبراتتى عۇمىرى كىمگە دە بولسا ۇلگى-ونەگە. 11 قۇرساق كوتەرگەن ارداقتى انا وتكەن عاسىرداعى قازان توڭكەرىسى، اشتىق جانە سوعىس جىلدارى، ساياسي قۋعىن-سۇرگىن سياقتى تاريحي وقيعالارعا كۋا بولعان، - دەپ حابارلايدى Qamshy.kz اقپارات اگەنتتىگى "حابار 24" ارناسىنا سىلتەمە جاساپ.

105-كە قادام باسقان قاينيكەش اجەنىڭ قۇلاعى جاقسى ەستيدى، كوزاينەك كيمەيدى ەكەن. جاستايىنان ەڭبەككە ارالاسقان ول وتباسىندا مەيىرىمدى انا، شارۋاشىلىقتا ەڭبەكقور بولا ءبىلدى.

"جۇمىسىمىزدى جاسادىم، جۇمىستان قالعان جوقپىن ەشۋاقىتتا. جاياۋ پار تۇيەنى جەگىپ ەكى اياق ارباعا جۇمىسشىلارعا تاماق تا تاسىدىم. وسى قىزىمنىڭ قولىندامىن، الپەشتەپ وتىر بىلاي. ۇلى بار جالعىز، بار تىلەگىم سول، سول ۇيلەنىپ، سونىڭ كىشكەنتايىن كورسەم دەيمىن. ناۋرىز مەرەكەلەرىڭ قايىرلى بولسىن! اللا تاعالا قايىرلى عىپ، قۋانىشپەن، ويىن كۇلكىمەن وتكىزىڭدەر ناۋرىزدى! مەن سەكىلدى بالالى-شاعالى بولىڭدار!"، - دەيدى 104 جاستاعى اجەي قاينيكەش مۇسابايەۆا.

عاسىر كۋاسىنىڭ ءوزى كوپ جاساۋدىڭ كىلتى ەڭبەك پەن ادالدىق، ادامدارعا جاقسىلىق ويلاۋ دەپ ۇعىندىرسا، كورشىسى ءارى 20 جاس كىشى بولسا دا قۇربىسىنداي ويناپ، كۇلەتىن باقىت اپاي باسقا دا قۇپيالار بارىن ايتتى. 

"ەرتىس جاعاسىندا بولىپ، جەگەنىنىڭ ءبارى بالىق. بالىق جەگەن كىسى كوپ جاسايدى، قىمىز ىشكەن كىسى كوپ جاسايدى، مەن ءوزىم سونى بىلەمىن. بۇل كىسى ءالى ءدارى ءىشىپ كورگەن جوق. جاستار بالا اكەلۋگە قورعانادى ءقازىر، سوندا دا بىزدەن دەنساۋلىقتارى تومەن. ال مىنا اۋىلدىڭ ەرتەدەگى اپالارى كوپ بالا كوتەرگەندەرىنىڭ ءبارى 90-عا، 95-كە كەلىپ قايتىس بولىپ جاتىر. 100-دەن اسقان كىسى انا جەردەن شي اكەلگەن قانشا ەڭبەك، سىپىرتقى اكەلۋ دەگەن. سىپىرتقىدان قالعالى وسى ءبىر جىل بولدى عوي دەيمىن. - بيىل جازدا بارايىق سىپىرتقىعا؟ "بارايىق، ءجىپ الىپ ارقالاپ اكەلەمىز". - ۇيالماي ەل كورسىن، جاستار، ءيا؟ "ەشكىمگە رەنجىمەدىم، ادامدارعا تەك جاقسىلىق تىلەدىم. بارىنشا كەشىرىمدى بولىڭدار، اعايىننىڭ اراسىندا بەرەكە-بىرلىكتى ساقتاڭدار" دەيدى كەيۋانا"، - دەيدى قاينيكەش اجەيدىڭ كورشىسى باقىت يساتايەۆا.

"عاسىر جاساعان قاينيكەش اجە قارتايدىم دەپ ۇيدە قاراپ وتىرعان جوق. اراسىندا اۋلاعا شىعىپ، شارۋاشىلىققا كومەكتەسىپ تۇرادى. ال ونىڭ ەڭبەك جولى بۇگىندە اۋىل تۇرعىندارىنا عانا ەمەس، بۇكىل اۋدان حالقىنا ونەگە دەيدى جەرلەستەرى. بۇگىندە بەسقاراعاي اۋدانىندا 90-نان اسقان 100-دەن استام قاريا بار ەكەن. ونىڭ ۇشەۋى عاسىر كۋاسى. ولاردىڭ ءبارى ءبىزدىڭ اسىل قازىنامىز، باعا جەتپەس بايلىعىمىز دەپ ەسەپتەيدى جاس ۇرپاق"، - دەيدى جۋرناليست. 

ۇسىنعان: نازەركە لابيحان