اقتاۋ قالاسى سولدات اۋدانىنىڭ جاعالاۋىنا جۇزدەگەن شاياندار شىعىپ قالعان دەپ حابارلايدى Qamshy.kz اقپارات اگەنتتىگى inAktau.kz سايتىنىڭ دەرەگىن نەگىزگە الا وتىرىپ.

بۇل جاعداي 2019 جىلدىڭ 11 ناۋرىز كۇنى تاڭەرتەڭگى ۋاقىتتا ورىن العان. ماڭعىستاۋ وبلىستىق ورمان جانە جانۋارلار دۇنيەسى اۋماقتىق ينسپەكسياسىنىڭ بالىق اۋلاۋ ءبولىمىنىڭ باستىعى اديسال شيحمەتوۆتىڭ ايتۋىنشا، بۇل قۇبىلىس داۋىلدى اۋا-رايىنا بايلانىستى بولعان. 

«اۋا-رايىنىڭ قولايسىزدىعىنا بايلانىستى تەڭىز ششايانداردى جاعاعا شىعارىپ تاستاعان.  بۇل قالىپتى قۇبىلىس جانە ولار سۋعا قايتا ورالادى»، - دەدى بالىق شارۋاشىلىعى باسقارماسىنىڭ باستىعى.

سونداي-اق، ول  2019 جىلدىڭ 1 ساۋىرىنەن  باستاپ 15 ماۋسىمعا دەيىنگى كەزەڭدە بۇل ايماققا قازىرگى ۋاقىتتا بالىقتاردىڭ  ۋىلدىرىق شاشاتىن مەزگىلى ەكەنىن ەسكەرە وتىرىپ، تەڭىز بالىقتارىن ۇستاۋعا تىيىم سالدى. قۇقىق بۇزۋشىلارعا قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 383-بابىنىڭ 3-بولىگى بويىنشا (بالىق اۋلاۋ جانە بالىق رەسۋرستارىن جانە باسقا دا سۋ جانۋارلارىن قورعاۋ ەرەجەلەرىن بۇزۋ)  50 500 تەڭگە (20 اەك) كولەمىندە ايىپپۇل سالىناتىندىعىن ەسكەرتە كەتتى.

اۋدارعان: فاريزا جومارت قىزى