اقش-تىڭ مەملەكەتتىك حاتشىسى مايك پومپەو كاراكاستاعى ەلشىلىكتەن قىزمەتكەرلەرىن شىعاراتىنىن ايتتى. مۇنداي شەشىمگە «ۆەنەسۋەلاداعى جاعدايدىڭ ناشارلاۋى» سەبەپ بولعان. پومپەو سونىمەن قاتار ەلدە امەريكالىق ديپلوماتتاردىڭ بولۋى اقش ىس-ارەكەتتەرىنە شەكتەۋ ەكەنىن جەتكىزدى.

الايدا، ۆەنەسۋەلاداعى اقش ديپلوماتتارىنىڭ جۇمىسى ۆاشينگتوننىڭ سىرتقى ساياساتىنا قالاي كەدەرگى كەلتىرەتىنىن پومپەو اشىق ايتپاعان.

«اقش كاراكاستاعى ءوز ەلشىلىگىندەگى بارلىق قىزمەتكەرلەرىن وسى اپتادا شىعارادى» دەپ مالىمدەدى مەملەكەتتىك حاتشى. مەملەكەتتىك دەپارتامەنت مۇنى سەيسەنبى كۇنى حابارلاعان.

پومپەو، سونداي-اق، قىزمەتكەرلەرىن شىعارۋ جانە ەلشىلىك قىزمەتكەرلەرىنىڭ ازايتىلۋى تۋرالى 24 قاڭتاردا قابىلدانعان شەشىمدى ەسكە سالدى. مەملەكەتتىك دەپارتامەنت كەيىننەن شتاتتان تىس شۇعىل ارەكەت ەتەتىن قىزمەتكەرلەردى، سونداي-اق كاراكاستاعى ەلشىلەردىڭ وتباسىلارىن قايتارىپ الۋ تۋرالى بۇيرىق بەرگەن.

23 قاڭتاردا ۆەنەسۋەلا وپپوزيسياسىنىڭ جەتەكشىسى حۋان گۋايدو ءوزىن ۆەنەسۋەلا پرەزيدەنتى مىندەتىن اتقارۋشى دەپ جاريالاعان بولاتىن. اقش، لاتىن امەريكاسى ەلدەرى جانە ەۋروپاداعى كەيبىر امەريكالىق وداقتاستار ونى ۋاقىتشا مەملەكەت باسشىسى دەپ تانىدى.

ال رەسەي مەن جۇڭگو نيكولاس مادۋرونى زاڭدى پرەزيدەنت دەپ ەسەپتەيدى.

نيكولاس مادۋرو قاڭتاردا اقش-پەن ديپلوماتيالىق قارىم-قاتىناسىن ۇزەتىنىن مالىمدەپ، امەريكالىق ديپلوماتتاردىڭ ەلدەن شىعۋىنا 72 ساعات ۋاقىت بەرگەن. ءبىراق ول كەزدە ەلشىلىك قىزمەتكەرلەرى بۇل بۇيرىققا باعىنباعان.

دۇيسەنبى كۇنى پومپەو رەسەيلىك «روسنەفت» كومپانياسىنىڭ اقش-تىڭ سانكسيالارىنا قاراماستان PDVSA-دان مۇناي ساتىپ الۋدى جالعاستىرۋدا ەكەنىن ايتتى. ونىڭ ويىنشا،  «روسنەفت» باسشىسى يگور سەچين مادۋرو جۇيەسىن ساقتاپ قالۋعا كۇش سالىپ جاتىر. «روسنەفت» بۇعان قاتىستى ءالى مالىمدەمە جاساعان جوق.

ۆەنەسۋەلاداعى جاعداي

ۆەنەسۋەلا بەسىنشى كۇن قاتارىنان ەلەكتر جارىعىنسىز وتىر. ەلدىڭ كوپ بولىگىن ەلەكتر قۋاتىمەن قامتاماسىز ەتەتىن گيدروەلەكتروستانسيالاردىڭ بىرىندە اقاۋ پايدا بولعان. ءبىراق، مادۋرو ەلەكتر جارىعىنىڭ ءوشىرىلۋى اقش-تىڭ ىس-ارەكەتى ەكەنىن العا تارتتى. وپپوزيسيا، ءوز كەزەگىندە، زاۋىت پەن ەلەكتر تورابىندا تەحنيكالىق قىزمەت كورسەتۋدىڭ جوقتىعىن ايتىپ، بيلىكتى كىنالاۋدا.

ۆەنەسۋەلانىڭ ەكونوميكاسى قۇلدىراۋدىڭ التىنشى جىلىن، 1920 جىلدارى ۆەيمار رەسپۋبليكاسى مەن 2000 جىلدارى زيمبابۆەدە بولعان كريزيستى باستان وتكەرۋدە. ميلليونداعان ۆەنەسۋەلالىقتار ەلدەن كەتىپ قالعان.

سالتانات ءشىنادىل