جاڭاوزەندەگى جۇمىسشىلار نارازىلىعىنان حابار تاراتىپ جۇرگەن ازاتتىق ءتىلشىسى ءسانيا تويكەن ۇستالدى. ءجۋرناليستىڭ ۇستالعانى تۋرالى «سول ساتتە قاسىندا بولدىم» دەگەن قالا تۇرعىنى گۇلنار تاڭىربەرگەنوۆا حابارلادى. ونىڭ سوزىنشە، تويكەن ەكەۋىن 11 ناۋرىزدا كەشكىسىن قالاداعى ءدامحانالاردىڭ ءبىرىنىڭ الدىندا پوليسەيلەر ۇستاپ اكەتكەن. بۇل تۋرالى Qamshy.kz اقپارات اگەنتتىگى ازاتتىق راديوسىنىڭ دەرەگىنە سۇيەنىپ حابارلايدى. 

12 ناۋرىزدا تاڭەرتەڭ پوليسيادان شىققان تاڭىربەرگەنوۆا «ءسانيا تويكەندى پوليسيا ىشكە الىپ كەتتى. سودان بەرى ودان حابار جوق» دەيدى.

ماڭعىستاۋ وبلىستىق پوليسيا دەپارتامەنتى ءجۋرناليستىڭ ۇستالۋىنا قاتىستى ءالى پىكىر بىلدىرمەدى.  

تاڭىربەرگەنوۆانىڭ ازاتتىققا ايتۋىنشا، تويكەن ەكەۋى ءدامحانانىڭ ءبىر بۇرىشىندا سويلەسىپ وتىرعاندا سوندا وتىرعان بىرنەشە ازامات توبەلەسىپ قالعان. سالدەن سوڭ اكىمشىلىك كافەنىڭ جابىلعالى جاتقانىن ايتقان.

ءبىرشاما ۋاقىتتان سوڭ توبەلەس بولعان جەرگە كەلگەن پوليسيا جاساعى ءسانيا تويكەن مەن تاڭىربەرگەنوۆانى ۇستاپ اكەتكەن.   

«پوليسەيلەر «توبەلەس بولعان جەردە بولدىڭىزدار، بىزبەن جۇرىڭىزدەر» دەدى. قارسىلىعىمىزعا قاراماستان، ءبىزدى بولەك كولىككە وتىرعىزدا دا، بولىمشەگە الىپ كەتتى» دەيدى تاڭىربەرگەنوۆا.

ءسانيا تويكەننىڭ سوڭعى ءبىر ايدا وسىمەن ءۇشىنشى رەت ۇستالىپ وتىر.

27 اقپاندا جاڭاوزەندەگى جۇمىسشىلار نارازىلىعىنان حابار تاراتۋعا كەتكەن ازاتتىق تىلشىلەرى – تويكەن مەن ۆيدەووپەراتور سانات نۇربەكوۆتى پوليسيا ۇستاپ، اقتاۋ قالالىق دەپارتامەنتىنە جەتكىزگەن. ولارعا پروتوكول كورسەتپەستەن تەرگەپ، التى ساعات ۇستاعان سوڭ بوساتقان.

پوليسيا ول كەزدە «ۇستاۋعا شاۋديروۆا ەسىمدى ازاماتتىڭ ارىزى سەبەپ بولدى» دەگەن.

12 اقپاندا استانادا تويكەندى بىرنەشە انادان سۇحبات الماق بولىپ، ولاردىڭ ۇيىنە بارعاندا پوليسيا باسقارماعا الىپ كەتكەن. 

1 ناۋرىزدا ەۋروپاداعى قاۋىپسىزدىك پەن ىنتىماقتاستىق ۇيىمىنىڭ (ەقىۇ) باسپا ءسوز ەركىندىگى جونىندەگى وكىلى ارلەم دەزير 27 اقپاندا الماتى، جاڭاوزەن جانە ورال قالالارىندا بىرنەشە جۋرناليست پەن بلوگەردىڭ ۇستالۋىنا بايلانىستى الاڭداۋشىلىق بىلدىرگەن. 

ەقىۇ وكىلى مالىمدەمەسىندە «جۋرناليستەردىڭ كاسىبي مىندەتىن ورىنداۋعا كەدەرگى ەتەتىن از ۋاقىتقا ۇستاۋ تاجىريبەسىنە الاڭدايتىنىن» ايتقان. ونىڭ سوزىنشە، «الەۋمەتتىك نارازىلىق پەن قوعام ءۇشىن ماڭىزدى ماسەلەلەردى كوپشىلىككە جەتكىزۋ مىندەتىن اتقارعان جۋرناليست كاسىبي جۇمىسى ءۇشىن جازالانباۋى ءتيىس».

ۇسىنعان: گۇلىم جاقان