مەن جالعىز تۇرامىن، ءبىراق جالعىزدىقتا ەمەس... 

شيرلي ادەل مەيسون 1923 جىلى ميننەسوت شتاتىندا دۇنيەگە كەلدى. ءشيرليدىڭ اناسى مارتا حەيگمان شيزوفرەنيامەن اۋىرعان. تۇندە كوشە كەزىپ، ءتۇرلى داۋىستار شىعارادى ەكەن. كەيدە كۇلەدى، كەيدە جىلايدى، اشۋلانادى.

ال انا دەرتىنىڭ زاردابى وتباسىنىڭ جالعىز قىزىنا ءتيدى.  اناسى ونى ساندىققا قاماپ، تۇنشىقتىراتىن، قول-اياعىن بايلاپ الىپ كۇندە ۇراتىن. ءومىرى ۇرەيمەن، قورقىنىشپەن وتكەن قىز اناسىنىڭ قورلىعى جايىندا ەشكىمگە ءتىس جارىپ ايتپاعان، كەرىسىنشە «انام – الەمدەگى ەڭ جاقسى ادام» دەيتىن. ۋاقىت وتە كەلە شيرلي ەسىن جوعالتا باستايدى، نە ىستەپ، نە قويعانىن ءوزى دە بىلمەيتىن كۇنگە جەتەدى، پسيحولوگيالىق اۋىتقۋعا ۇشىرايدى.

ءشيرليدىڭ اناسى

1945 جىلى شيرلي العاش رەت پسيحياتور كورنەليا ۋيلبۋرمەن كەزدەسەدى، الايدا پسيحولوگتىڭ جۇمىسىنا اناسى كەدەرگى كەلتىرەدى. ەكەۋىن كەزدەستىرمەيتىندەي جاعدايعا تۇسىرەدى.

تەك 1954 جىلى ءشيرليدىڭ اناسى دۇنيەدەن وتكەن سوڭ پسيحولوگتىڭ قابىلداۋىنا قايا جازىلادى. ول كەزدە شيرلي مەيسون كولۋمبيا ۋنيۆەرسيتەتىندە ءمۇعالىم بولىپ قىزمەت اتقاردى. ايلىعى وزىنە جەتكىلىكتى بولاتىن، الايدا اقشانىڭ قايدا كەتىپ جاتقانى بەلگىسىز. ال كيىم سورەسى ءتۇرلى كويلەككە تۇنىپ تۇراتىن. ولاردىڭ دا قايدان كەلگەنى قىزعا بەيمالىم. بەلگىلىسى – شيرلي جالعىز بولدى، دوستارى دا، ارالاساتىن جاقىندارى دا جانىندا بولمادى.

كەيدە تۇندە ءوز كەرەۋەتىنە ۇيىقتاپ، تاڭەرتەڭ ءۇيىنىڭ سىرتىنداعى اۋلادا وياناتىن، كەيدە سىنعان اينەكتەردىڭ اراسىندا جاتقان جەرىنەن ويانادى.

پسحيولوگپەن اڭگىمەسى بارىسىندا ءشيرليدىڭ بويىندا بىرنەشە ادامنىڭ ءومىر سۇرەتىنى انىقتالدى. ولار:

پەگگي لۋ – اشۋلانعاندا اينەك سىندىراتىن ءشيرليدىڭ ءبىر ءتۇرى. ءدال وسى پەگگي دارىگەرگە اناسىنىڭ قانداي قاتىگەز بولعانىن ايتىپ بەردى.

ۆيكي (فرانسۋز قىزى) – تىنىش، سابىرلى، قىمبات كويلەكتەردى ساتىپ العاندى ۇناتادى ءارى باتىل.

پەگگي ەنن – شاشى اشىق ءتۇستى قىز.

اعاش شەبەرى مايك پەن اعاش شەبەرى سيد.

ۆانەسسا – مۋزىكانت.

كلارا – ءدىني، سىنشىل ادام، اناسىنىڭ ءوزىن عانا ەمەس، كورشىنىڭ قىزدارىن قورلاعانىن كلارا ايتىپ بەردى.

مەري اجەي.

مارسيا – جازۋشى جانە سۋرەتشى.

ەسىمى جوق اقسارى بويجەتكەن.

مۇنىڭ ءبارىن انىقتاۋ ءۇشىن دارىگەر ۋيلبۋر ناتريي تيوپەندى ينەكسيالاردى پايدالاندى. كەيىن انىقتالعانداي، ءشيرليدىڭ حيميالىق پرەپاراتقا تاۋەلد بولىپ قالعانى سونشالىق، وقيعالاردى ويدان قۇراستىرا باستاعان. العاشىندا دارىگەر مۇنى بايقاعان جوق، سول سەبەپتى ءشيرليدىڭ نەمەسە ونىڭ بويىنداعى وزگە دە تيپتەردىڭ ايتقاندارىنا بىرنەشە جىل بويى سەنىپ كەلدى.

ءبىراق شيرلي ءدارى ىشپەسە، جۇيكەسى جۇقارىپ، اشۋلانشاق بولىپ كەتەتىن كۇيگە تۇسكەن. دارىگەر مۇنى دا توقتاتۋدىڭ جولدارىن قاراستىرىپ كوردى. 1965 جىلدارى شيرلي پرەپاراتتان باس تارتا باستادى، بۇل قىزعا جاقسى جاعىنان اسەر ەتتى، ەسى قالپىنا كەلىپ، ساۋىققانداي بولدى.

دارىگەر مەن شيرلي جاقىن قۇربىلارعا اينالادى. ءشيرليدىڭ تاعدىرى ءبىر كىتاپتىڭ جازىلۋىنا دا ارقاۋ بولدى.

1973 جىلى اقش-تا «سيبيللا» اتتى فلورا رەتا شرايبەردىڭ جاڭا كىتابى جارىق كوردى. وندا ءشيرليدىڭ باسىنان كەشكەندەرى جازىلعان. كەيىپكەرلەردىڭ ەسىمدەرى وزگەرتىلگەن كىتاپتىڭ ميلليونداعان تيراجى شىقتى، حالىقارالىق بەستسەللەرگە اينالدى.

ال 2007 جىلى ءدال وسى اتپەن فيلم شىقتى.

الايدا ءشيرليدىڭ دەرتىنە قاتىستى ءتۇرلى بولجامدار دا جوق ەمەس ەدى. ماسەلەن، پسيحولوگ گەربەرت شپيگەل «ۋيلبۋر ءشيرليدى ءوز ماقساتىنا پايدالاندى» دەپ ەسەپتەدى. مۇنداي ويمەن بىرنەشە دارىگەر كەلىستى. الايدا شيرلي حالىق جادىندا «بويىندا 16 ادام ءومىر سۇرگەن قىز» رەتىندە ساقتالىپ قالدى.

1998 جىلدىڭ 26 اقپانىندا ول قاتەرلى ىسىكتەن قايتىس بولدى.

گۇلىم جاقان