تايقازاننىڭ تۇركىستانعا قايتا ورالعانىنا وتىز بەس جىلدان استى. 1989 جىلى پەتەربۋرگتەن ازىرەت سۇلتانعا جەتكىزىلگەن ۇلى جادىگەرمەن بىرگە تاريحي ادىلەت تە ەلگە قايتتى.

بۇل شەشىمگە ءبىر قۇجاتتىڭ قۇنى جەتتى، ال ونى جولعا سالۋعا تۇتاس بۋىن جانىن سالدى.

ارحيۆتەن باستالعان ورالۋ

تۇركىستاننىڭ كونە تاريحىن زەرتتەگەن تاريحشى زىكىريا جانداربەك ەرميتاجعا ەكى مارتە بارىپ، دەرەك ىزدەدى. سول ساپارلاردا مۋزەي ديرەكتورى، شىعىستانۋشى ميحايل پيوتروۆسكيي قازاق زەرتتەۋشىسىنە تايقازاندى كورسەتتى. ماسەلەنىڭ كىلتى مۇراعاتتا جاتقان قولحاتتى تابۋعا تىرەلدى، ويتكەنى وندا قازاننىڭ ۋاقىتشا ساقتاۋعا الىنعانى جازىلعان ەدى.

قۇجات تابىلدى. سودان كەيىن كەلىسسوزدەر ءجۇردى، 1989 جىلى تايقازاندى قازاقستانعا قايتارۋ تۋرالى تاريحي شەشىم قابىلداندى.

ەكى جۇرگىزۋشى، ون كۇندىك ساپار

ءزاۋلىم قازاندى تاسۋ مىندەتى سول كەزدە قۇرىلىس مەكەمەسىندە جۇرگىزۋشى بولعان مولداحان جولىمبەتكە جۇكتەلدى. ول سەرىگىمەن قىركۇيەكتە جولعا شىقتى. پەتەربۋرگكە ولار 4 كۇندە جەتتى، ال ەڭ اۋىر كەزەڭ تايقازاندى تيەۋ كەزىندە تۋدى.

مۋزەي اۋلاسىنداعى كران كۇشكە شىدامادى، سالماعى 2 تونناعا جۋىق قازان كوتەرىلمەدى. ارنايى تەحنيكا فينليانديادان كۇتىلدى، ۋاقىت سوزىلدى. قايتار جولعا ولار تەك ون كۇن دەگەندە شىقتى.

ساپارعا قاتىسقان شەرالى بەركىنبايەۆ بۇل ءىستى ەل الدىنداعى بورىش سانادى، ال بۇگىن ول كۇن وتباسىلارى ءۇشىن ۇرپاققا ايتىلاتىن ماقتانىشقا اينالدى.

قايتارعان قايسار قايراتكەرلەر

تايقازاندى ەلگە اكەلۋ ىسىنە مەملەكەت جانە قوعام قايراتكەرى وزبەكالى جانىبەكوۆ ايرىقشا ىقپال ەتتى. ول ەرميتاج باسشىلىعىمەن بىرنەشە رەت كەزدەسىپ، ءىستىڭ ىلگەرىلەۋىنە جول اشتى. سول ۋاقىتتا «ازىرەت سۇلتان» مۋزەي-قورىعىن نۇرماحان نازاروۆ باسقاردى، ۇلكەن ۇيىمداستىرۋ جۇمىسىن وسى ۇجىم اتقاردى.

مۋزەي-قورىقتىڭ ۋاقىتشا ديرەكتورى نۇرلان دۇكەنبايەۆتىڭ ايتۋىنشا، قازان ءقازىر كەسەنەنىڭ قاق ورتاسىنا قويىلدى، ونى جىل سايىن شامامەن 1 ميلليون ادام كورەدى.

نەگە تايقازان ماڭىزدى؟

تايقازان – جاي عانا مادەني مۇرا ەمەس، بەرەكە، بىرلىك، ىنتىماقتىڭ بەلگىسى سانالدى. تۇتاس تۇركى دۇنيەسىنىڭ رۋحىن تانىتقان وسى رەليكۆيانىڭ تاريحي ورنىنا قايتۋى ۇلت جادىنا دەم بەردى، تاۋەلسىزدىككە بەت العان تۇستا قازاق قوعامىنىڭ ەڭسەسىن تىكتەدى.

بۇل تۋرالى Qamshy.kz اقپارات اگەنتتىگى حابارلايدى.