ۇلت ۇستازى احمەت بايتۇرسىن ۇلىنىڭ قازان قالاسىنداعى فوتوسى تابىلدى. بۇل تۋرالى عالىم قايىربەك كەمەڭگەر ەگەمەن قازاقستان گازەتىنە جاريالانعان ماقالاسىندا ايتتى.
قۇندى سۋرەت قىركۇيەك ايىنىڭ باسىندا تاتارستان استاناسىنداعى ۇلتتىق مۋزەيدەن شىققان. ءبىراق ول جەردە احمەت بايتۇرسىن ۇلىنىڭ ەسىمى جازىلماپتى. تەك تاتار زيالىسى مۇحاممەد يدريسوۆتىڭ ءاتى-جونى كورسەتىلگەن. ايتسە دە، ءبىزدىڭ عالىمدار ۇلت ۇستازىن بىردەن تانىعان. مۋزەي ماماندارى العاشىندا سۋرەتتى تۇسىرۋگە رۇقسات بەرمەي، كەيىن كەلىسىمگە كەلەدى.
قايىربەك كەمەڭگەردىڭ ايتۋىنشا، احمەت بايتۇرسىن ۇلىنىڭ قازان قالاسىندا بۇرىن-سوڭدى بولعانى تۋرالى بۇعان دەيىن اقپارات ايتىلماعان.
«احمەت بايتۇرسىن ۇلى قازان قالاسىنا كەلدى دەگەن اقپاراتتى بۇرىن ەستىمەدىك... «كەلگەنى ءسوزسىز، مۇنى وسى سۋرەت راستايدى» دەپ وي تۇيدىك. ءبىر ەسەپتەن، مۇراعات ماتەريالىنا مۇقيات تاتار اعايىن سۋرەتتىڭ قايدا جانە قاشان تۇسىرىلگەنى جايىندا ولقىلىق جىبەرە قويماس دەپ تە ويلادىق»،–دەيدى ول.
