قۋاندىق بيشىمبايەۆ شىمكەنتكە اۋىستىرىلدى. ەكس-مينيستر جازاسىنىڭ قالعان بولىگىن قاۋىپسىزدىگى ورتاشا تۇزەۋ مەكەمەسىندە وتەيتىن بولادى دەپ جازادى Qamshy.kz اقپارات اگەنتتىگى استانا تەلەارناسىنىڭ دەرەگىن نەگىزگە الىپ. بيشىمبايەۆقا مۇندا ەكىنشى قاباتتاعى 14 ادامعا ارنالعان بولمەدەن ورىن بۇيىرىپتى. جاتاتىن جەردىڭ اۋماعى نەبارى ەكى شارشى مەتر. ءۇش مەزگىل تاماقتى دا كوپشىلىك سوتتالعاندارمەن بىرگە ىشەدى. تۇرمە باسشىلارىنىڭ ايتۋىنشا، قۋاندىق بيشىمبايەۆ بۇل جەرگە 15 اقپاندا كەلگەن. ول ازىرگە قارا جۇمىسقا ارالاسا قويماپتى. ءبىراق، مادەني شارالارعا قاتىسۋعا كەت ءارى ەمەس. ەكس-مينيستر سۇحبات بەرۋگە دە، تاسپاعا تۇسۋگە دە كەلىسكەن جوق.   

قازىرگى تاڭدا № 2 جاساققا باسقا دا سوتتالعاندارمەن بىرگە ورنالاستىردىق. بۇگىنگى تاڭدا وعان ەشقانداي ەرەكشە كوزقاراس، ەرەكشە جاعداي جاسالىنعان جوق. ءتارتىپ بارىنە ءبىر. سونىمەن قوسا ايتارىمىز بارلىق زاڭدى تالاپتاردى اتقارىپ جاتىر. ءتارتىپ بۇزعان ەمەس. سوتتالعان بيشىمبايەۆ ءالى كۇنگە دەيىن جۇمىسقا ورنالاسۋعا نيەت بىلدىرمەدى. ءبىراق، مەكەمەنىڭ مادەني ءىس-شارالارىنا قاتىسۋعا نيەت ءبىلدىرىپ، ءوتىنىش جاسادى، - دەيدى تۇزەتۋ مەكەمەسىنىڭ باستىعى باعدات اسىلبەكوۆ.

ايتا كەتەيىك، بيشىمبايەۆ بۇعان دەيىن تۇركىستان وبلىسىنا قاراستى تولە بي اۋدانىنداعى قاۋىپسىزدىگى بارىنشا جوعارى تۇزەۋ مەكەمەسىندە وتىرعان. ونىڭ قورعاۋشىسى ەكس-مينيستردىڭ جازاسىن وتەۋ ءتارتىبىن جەڭىلدەتۋدى سۇراپ سوتقا تالاپ-ارىز تۇسىرگەن. ءتىپتى، ونى قونىس كولونياسىنا اۋىستىرۋدى دا سۇراعانى ايتىلعان. ءبىراق، سوت تەك ءىشىنارا قاناعاتتاندىردى. ەسكە سالايىق، بۇرىنعى ۇلتتىق ەكونوميكا ءمينيسترى بىلتىر 10 جىلعا سوتتالعان.  

ۇسىنعان: اسەل بولات قىزى