35 جاستاعى نارگيزا راحيموۆا 8 ناۋرىز مەرەكەسى قارساڭىندا ازاتتىقتىڭ وزبەك قىزمەتىنىڭ Facebook-تاعى پاراقشاسىندا مۇسىلمانداردىڭ كوپ ايەل الۋى جايلى جازبا استىنا پىكىر قالدىرعاننان كەيىن سىنعا ۇشىراعان.
داۋدىڭ باسى...
داۋ Hayot Baxtiyor O'gli ەسىمدى قولدانۋشىنىڭ تومەندەگىدەي پىكىرىنەن باستالعان.
“ءتىپتى ءبىر ايەلگە يە بولا الماعان ىنجىق ەرلەر مەن كۇيەۋىنىڭ موينىنا ەسەككە مىنگەندەي وتىرىپ الاتىن كوكبەت ايەلدەر عانا كوپ ايەل الۋعا قارسى شىعادى” دەپ جازدى ول.
ال نارگيزا راحيموۆا وعان “حاديشا انامىز ءتىرى كەزىندە پايعامبارىمىز ەكىنشى ايەل العان جوق. بىلمەيمىن، بالكىم ول كەزدە اڭقاۋ بولعان شىعار، مۇمكىن حاديشا انامىز شاتاق شىعارۋعا بەيىم بولدى ما ەكەن، بۇل جاعىن ءسىز جاقسىراق بىلەسىز عوي. حازىرەت ءالي دە فاتيما انامىز ءتىرى كەزىندە ەكىنشى ايەل الماعان. بۇل ارينە، وتە كۇلكىلى جاعداي عوي” دەپ جاۋاپ بەرگەن.
وسىدان سوڭ شەنەۋنىككە قارسى ونداعان كوممەنتاريي مەن ۆيدەومالىمدەمە پايدا بولىپ، كەيبىرى راحيموۆانى "ولتىرەمىز" دەپ تە قورقىتقان. قوقان-لوقى سيپاتىنداعى پىكىرلەر اراسىندا ونىڭ كۇيەۋى مەن ءتورت بالاسىنا قارسى باعىتتالعان كوممەنتارييلەر دە بولعان.
ال وزبەكستاننىڭ قۇقىق قورعاۋ ورگاندارى كوممەنتاريي اۆتورلارىن انىقتاي باستاعان.
كەيىنىرەك ناۋرىزدىڭ 9-ى كۇنى جەرگىلىكتى Azon TV ارناسى نارگيزا راحيموۆانىڭ كوپتەن كەشىرىم سۇراعان ۆيدەومالىمدەمەسىن جاريالادى.
“مەن، قۇدايدىڭ قاراپايىم ق ۇلى رەتىندە بارشا مۇسىلماندارعا كوپتىڭ اشۋىن تۋعىزعان پىكىرلەرىم ءۇشىن شىن نيەتپەن كەشىرىم سۇرايمىن” دەگەن ول ۆيدەومالىمدەمەدە.
قوقان-لوقىعا بايلانىستى ول الەۋمەتتىك جەلىدەگى بارلىق اككاۋنتتارىن ءوشىرىپ تاستاعان.
Fergana سايتى وزبەكستان پرەزيدەنتى شاۆكات ميرزيەيەۆتىڭ ۆيرتۋالدى قابىلداۋىنا راحيموۆانى جازالاۋدى تالاپ ەتكەن جۇزدەگەن شاعىم تۇسكەنىن جازدى.
ال وزبەكستاننىڭ ءدىن ىستەرى جونىندەگى كوميتەتى "ازاماتتاردىڭ ءدىني سەنىمىنە ءتىل تيگىزۋ زاڭدا كورسەتىلگەن تارتىپپەن جازالاناتىنى" تۋرالى مالىمدەمە جاساعان.
ازىرگە شەنەۋنىكتىڭ "جازالانعان-جازالانباعانى" تۋرالى دەرەك جوق.
ۇسىنعان: فاريزا جومارت قىزى
پىكىر قالدىرۋ