كوپ بالالى ءۇي ورتكە ورانىپ، اناسى مەن بالالارى ارەڭ دەگەندە قۇتىلىپ شىققان. ءقازىر ولار شەنەۋنىكتەر بولگەن ۋاقىتشا ۇيدە تۇرىپ جاتىر، دەپ جازادى Qamshy.kz اقپارات اگەنتتىگى موي گورود سايتىنىڭ دەرەگىنە سۇيەنىپ.

9 ناۋرىز كۇنى اقتوبەدە 5 بالاسى بار ءۇي ورتكە ورانعان. بەلگىلى بولعانداي، بالالارىنىڭ ەڭ كىشكەنتايى 4 جاسار بولسا، ەڭ ۇلكەنى 15 جاستا ەكەن. بۇل وتباسىنىڭ تەك وتاعاسى عانا جۇمىس ىستەيدى ەكەن، سوندىقتان ءورت شىققان كەزدە ول ۇيىندە بولماعان، ال اناسى بالالارىمەن ارەڭ دەگەندە ورتتەن قۇتقارىلىپ شىققان.

بەس بالانىڭ اناسى تەرەزەنى سىندىرىپ ءتورت بالاسىن سىرتقا شىعارعان، بەسىنشىسىن ەندى شاعارايىن دەپ جاتقاندا تۇتىننەن ۋلانىپ، ەسىنەن تانىپ قالىپتى.

«مەن 9-ى كۇنى جۇمىسقا كەتكەن بولاتىنمىن، ال 15 جاستاعى ۇلكەن قىزىم كورشىلەرگە بارعان. ءورت ساعات 10:00 شاماسىندا باستالىپتى. قىزىم دەرەۋ ۇيگە كەلگەنى دۇرىس بولىپتى، سول ايەلىم مەن كىشكەنتاي قىزىمدى سىرتقا الىپ شىققان»، - دەيدى بەس بالانىڭ اكەسى زەينۋللا بەكماعامبەتوۆ.

ورتەنگەن ءۇيدىڭ تەك ك ۇلى عانا قالعان. جەرگىلىكتى شەنەۋنىكتەر بۇل وتباسىعا ۋاقىتشا ەكى بولمەلى پاتەر بەرىپتى.

«ورتتەن زارداپ شەككەن وتباسىعا جەر بەرەمىز، كەيىن دەمەۋشىلەردىڭ كومەگىمەن جاڭا ءۇي سالۋعا قۇرال-جابدىقتار الامىز»، - دەدى اقتوبە اكىمدىگىندە.

بەلگىلى بولعانداي، ءورت ازس اۋدانىندا ورىن العان. سايجايلار ۋچاسكەسىندە 80 شارشى مەتر ورتەنگەن. ۋلى گازبەن ۋلانعان بولۋى مۇمكىن دەپ 16 جاستاعى ءجاسوسپىرىم اۋرۋحاناعا جاتقىزىلدى. ءورتتىڭ ناقتى سەبەپتەرى انىقتالۋدا.

وبلىس اكىمى وڭداسىن ورازالين ءورت بولعان جەرگە كەلىپ، جاعدايدى ءوز كوزىمەن كوردى دە، اكىمدىكتەگىلەرگە زارداپ شەككەن وتباسىعا بارىنشا قولداۋ كورسەتۋگە تاپسىرما بەردى. بۇل ءۇشىن ارنايى كوميسسيا دا قۇرىلعان، زارداپ شەككەن وتباسى مۇشەلەرىمەن بۇگىندە پسيحولوگتار جۇمىس ىستەۋدە.

ۇسىنعان: نازەركە لابيحان