از قامتىلعان وتباسىلاردىڭ كىرىسىن ساناۋ كەزىندە جاردەماقىنىڭ 4 ءتۇرى ەسەپتەلمەيتىن بولادى. بۇل تۋرالى پرەزيدەنت تاپسىرما بەرگەن دەپ جازادى Qamshy.kz اقپارات اگەنتتىگى استانا ارناسىنىڭ دەرەگىن نەگىزگە الا وتىرىپ. ءماجىلىستىڭ پلەنارلىق وتىرىسىندا مۇنى ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى سۆەتالانا جاقىپوۆا ايتتى.   

"پرەزيدەنتتىڭ تاپسىرماسىمەن وسى ماسەلە قارالىپ جاتىر. جاردەماقىنىڭ 4 ءتۇرى ەسەپتەلمەۋى مۇمكىن. ول - كوپبالالى وتباسىلارعا، «التىن» جانە «كۇمىس القا» يەگەرلەرىنە بەرىلەتىن مەملەكەتتىك جاردەماقى جانە مۇگەدەك بالاعا قاراستىرىلعان تولەم. جانە شاركىرتاقى دا كىرىسكە جاتپايتىن بولادى. ساۋىردەن باستاپ 832 مىڭ كوپبالالى جانە از قامتىلعان ازاماتتارعا بەرىلەتىن جاردەماقى ءۇشىن بيىل بيۋدجەتتەن 94 ملرد تەڭگە قاراستىرىلعان. تولەمدى كۇنكورىسى قيىن وتباسىلار الادى. ۆيسە-مينيستر ازاماتتار مەملەكەتتىك جاردەماقىعا يەك ارتىپ، ماسىلدىققا جول بەرمەيدى دەپ سانايدى. دەگەنمەن، ولاي بولسا، جۇمىسقا قابىلەتتى ازاماتتىڭ وتباسى اتاۋلى الەۋمەتتىك كومەك الا المايدى. ولار ۇسىنىلعان جۇمىستان ءبىرىنشى رەت باس تارتسا، تولەمنىڭ 50 پايىزىنان، ال ەكىنشى رەت جاردەماقىدان مۇلدە قاعىلادى. ءبىراق، ءار بالاعا بەرىلەتىن جاردەماقى تولەنە بەرەدى. ەگەر جالعىزباستى انا 4 بالا ءوزى باعىپ وتىرسا، بالالارى 20 789 تەڭگەدەن الادى. ءوزى بالاعا كۇتىم جاساپ وتىر عوي، ول اناعا دا 20 789 تەڭگە تولەنەدى. جالعىزباستى انا ءبىر بالامەن وتىرسا، ەكەۋىنە دە 20 789 تەڭگەدەن تولەنەدى"، - دەيدى سۆەتلانا جاقىپوۆا. 

ۇسىنعان: اسەل بولات قىزى