الماتى وبلىسىنىڭ كەربۇلاق اۋدانىنىڭ كاسىپكەرلەرى كوپ بالالى ءارى  جالعىزباستى 3 بىردەي وتباسىعا ءۇي الىپ بەرگەن، - دەپ حابارلايدى Qamshy.kz اقپارات اگەنتتىگى وڭىرلىك كوممۋنيكاسيالار قىزمەتىنە سىلتەمە جاساپ.

بۇگىندە قوعامدا قايىرىمدىلىق جاساپ، ەلگە قول ۇشىن سوزاتىن ازاماتتار كوبەيىپ كەلەدى. جاقىندا كەربۇلاق اۋدانىندا جەكە كاسىپكەرلەردىڭ باستاماسىمەن قايىرىمدىلىق ءىس-شاراسى ءوتتى. ءاز – ناۋرىز مەرەكەسى قارساڭىندا وتكەن بۇل شارا بارىسىندا سارىوزەك اۋىلىندا ورنالاسقان «الاسەم» زاۋىتىنىڭ باس ديرەكتورى ستانيسلاۆ ششەرباكوۆ، الەۋمەتتىك جاعدايى تومەن وتباسىعا ءۇيدىڭ كىلتىن تابىستادى.

«2013 جىلى كۇيەۋىممەن اجىراسقانمىن. ءۇش بالامەن ءۇيسىز پاتەر دەن پاتەرگە كوشىپ جۇرگەنىمە 5 جىلدان استى. بالالارىم وقۋشى، تاپقان تابىسىم ولاردىڭ كيىمى مەن تاماعىنان ارتىلمايدى. ەندى مىنە ۇلكەن ءارى تازا ءوزىمىزدىڭ شاڭىراعىمىز بار»، - دەيدى قۋانىش يەسى جۇماعىز مەدەتوۆا.

قوعالى اۋىلىنىڭ ازاماتى، ءماسليحات دەپۋتاتى، جەكە كاسىپكەر قايرات بەكييەۆ، سول اۋىلدىڭ التى بالانىڭ اناسىن ايگۇل ەشپايەۆاعا ءۇي سىيلاپ قۋانىشكا كەنەلتتى. ال، تالدىبۇلاق  اۋىلىنىڭ ازاماتى كالەن تۇرسىڭبايەۆ التى بالامەن ءۇيسىز جۇرگەن نادەجدا لەمەشكوعا وسى اۋىلدان جايلى باسپانا الىپ بەردى.

سونىمەن قاتار، قاسپان اۋىلىنىڭ كاسىپكەرلەرى سلامباي توقابايەۆ جانە  ۆيتاليي تاراسەنكو 11 بالانىڭ اناسى گۇلناز شاكەنوۆا مەن الەۋمەتتىك جاعدايى تومەن 3 بالالى وتباسىعا  قاجەتتى ازىق-تۇلىكپەن قامتاماسىز ەتتى.

«مەيىرىمدىلىك - ادام بويىنداعى ەڭ ىزگى قاسيەتتەردىڭ ءبىرى. انا-ومىردەگى ەڭ ۇلكەن قۇرمەتكە لايىق ادام. سوندىقتان دا، كوپ بالانى دۇنيەگە اكەلىپ، ۇلتىمىزدىڭ كوبەيۋىنە ۇلكەن ۇلەس قوسىپ جۇرگەن انالارعا قۋانىش ءسىيلاۋ-بىز ءۇشىن ۇلكەن باقىت» -  دەيدى جەكە كاسىپكەر قايرات بوتاي ۇلى.

ءاز-ناۋرىز قارساڭىندا شاڭىراقتارىندا شاتتىق ورناپ، بالا-شاعالارىنىڭ قۋانىشىندا شەك بولماعان انالار ءوز تاراپتارىنان قايىرىمدى جاندارعا شەكسىز العىستارىن جەتكىزدى. بۇل يگىلىكتى شارا ءالى دە جالعاسىن تابا بەرمەك.  

مەرۋەرت ماحمۇتجان