پرەزيدەنتتىڭ تاپسىرماسى بويىنشا از قامتىلعان وتباسىلاردىڭ كىرىسىن ساناۋ كەزىندە جاردەماقىنىڭ ءتورت ءتۇرى ەسەپتەلمەيدى. بۇل تۋرالى ءماجىلىستىڭ پلەنارلىق وتىرىسىندا ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى سۆەتلانا جاقىپوۆا ايتىپ بەردى دەپ حابارلايدى Qamshy.kz اقپارات اگەنتتىگى استانا تەلەارناسىنا سىلتەمە جاساي وتىرىپ. 

جاقىپوۆا: ەلباسىنىڭ تاپسىرماسىمەن وسى ماسەلە قاراستىرىلۋدا.ول جاردەماقىنىڭ 4 ءتۇرى ەسەپتەلمەۋى مۇمكىن ەكەندىگىن العا تارتتى.

ۆيسە-مينيستر كوپ بالالى وتباسىلارعا، "التىن" جانە "كۇمىس القا" يەگەرلەرىنە بەرىلەتىن مەملەكەتتىك جاردەماقى، مۇگەدەك بالالارعا قاراستىرىلعان تولەم جانە شاركىرتاقى دا كىرىسكە جاتپايتىنىن ايتتى.

سونداي-اق ۆيسە-مينيستردىڭ سوزىنشە، جۇمىسقا قابىلەتتى ازاماتتىڭ وتباسىلارى اتاۋلى الەۋمەتتىك كومەك الا المايدى.جاقىپوۆا ولار ۇسىنىلعان جۇمىستان ءبىرىنشى رەت باس تارتسا، تولەمنىڭ 50 پايىزىنان، ال ەكىنشى رەت جاردەماقىدان مۇلدە قاعىلاتىنىن ەسكەرتتى. ساۋىردەن باستاپ 832 مىڭ كوپبالالى جانە از قامتىلعان وتباسىلارعا بەرىلەتىن جاردەماقى ءۇشىن بيىل بيۋدجەتتەن 94 ملرد تەڭگە قاراستىرىلعان.

ال تولەمدى كۇنكورىسى قيىن وتباسىلار الادى. ۆيسە-مينيستر ازاماتتار مەملەكەتتىك جاردەماقىعا يەك ارتىپ، ماسىلدىققا جول بەرمەيدى دەپ سانايدى. ول ءار بالاعا بەرىلەتىن جاردەماقى تولەنە بەرەتىنىن جەتكىزدى.

"ەگەر جالعىزباستى انا 4 بالانى ءوزى باعىپ وتىرسا، بالالارى 20 789 تەڭگەدەن الادى. ءوزى بالاعا كۇتىم جاساپ وتىر عوي، ول اناعا دا 20 789 تەڭگە تولەنەدى. جالعىزباستى انا ءبىر بالامەن وتىرسا، ەكەۋىنە دە 20 789 تەڭگەدەن تولەنەدى"، - دەدى ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى.

ۇسىنعان: فاريزا جومارت قىزى