استاناداعى ەڭبەكپەن قامتۋ ورتالىعى تۇرعىنداردان 1 ساۋىرگە دەيىن اتاۋلى الەۋمەتتىك كومەك سۇراپ، مازالاماۋدى سۇرادى. ويتكەنى، تۇرمىسى تومەن وتباسىلارعا تولەنەر جاردەماقى بۇرىنعىشا ەسەپتەلە بەرەدى، ال ونى قايتا راسىمدەۋ جۇمىستارى جارتى جىلدان كەيىن باستالادى. بۇل تۋرالى مەملەكەتتىك قىزمەتتەر جارمەڭكەسىندە ءمالىم بولدى دەپ Qamshy.kz اقپارات اگەنتتىگى "استانا" ارناسىنا سىلتەمە جاساي وتىرىپ حابارلايدى.

استاناداعى ەڭبەكپەن قامتۋ ورتالىعى تۇرعىنداردى 1 ساۋىرگە دەيىن اتاۋلى الەۋمەتتىك كومەكتى سۇراپ، مازالاۋدىڭ ءجونى جوق دەيدى. ويتكەنى، از قامتىلعان وتباسىلارعا تولەنەر جاردەماقى بۇرىنعىشا ەسەپتەلە بەرەدى، ال ونى قايتا راسىمدەۋ جۇمىستارى جارتى جىلدان كەيىن باستالادى. بۇل تۋرالى مەملەكەتتىك قىزمەتتەر جارمەڭكەسىندە ءمالىم بولدى. كومەك سۇراي بارعان التى بالانىڭ اناسى جانار ومىربەكوۆاعا ماماندار وسىلاي كەڭەس بەرىپتى. كوپبالالى انا بۇعان دەيىن اتاۋلى الەۋمەتتىك كومەك سۇراپ بارماعان. جاردەماقى مولشەرى از بولسا دا، ونى قايتا راسىمدەۋگە ۋاقىتى بولماپتى. «ەندى 1 ساۋىردەن باستاپ، بۇل شاڭىراققا بەرىلەر الەۋمەتتىك كومەكتىڭ كولەمى شامامەن 14 ەسەگە دەيىن كوبەيەدى»،- دەيدى ماماندار.  

يننا فيلارەتوۆا، استانا قالاسى «الماتى» اۋدانى ەڭبەكپەن قامتۋ جانە الەۋمەتتىك قورعاۋ ءبولىمىنىڭ باسشىسى:  بۇل وتباسىعا 153 مىڭ تەڭگە تولەنەدى. سوندىقتان، 1 ساۋىردەن باستاپ، ەڭبەكپەن قامتۋ ورتالىعىنا جولىعىڭىز. تولەماقى مولشەرى 6 ايعا ەسەپتەلەتىندىكتەن، ءقازىر بىزگە جولىعۋدىڭ قاجەتى جوق. ءسىزدى ءقازىر قابىلداسا، 11 مىڭ تەڭگە عانا تاعايىندايدى. سوسىن جارتى جىلدان كەيىن عانا كەلەسىز. ال 1 ساۋىردە ءبىر كەلسەڭىز، ءتيىستى سوما تۇگەل ەسەپتەلەدى.

ماماندار كوپبالالى انالار عانا ەمەس، تۇرمىسى تومەن وتباسىلارعا دا كومەك بەرىلەتىنىن ەسكەرتەدى. تاپقان تابىسى تومەنگى كۇنكورىس دەڭگەيىنىڭ 70%-ى جەتپەيتىن وتباسىلارعا جاردەماقى بەرىلەدى. ءبىراق، ونىڭ مولشەرى ايماقتىق الدە جالپى رەسپۋبليكالىق دەڭگەيدە بولارىن مامانداردىڭ وزدەرى تاپ باسىپ ايتا الماي وتىر. ناقتى شەشىمدى ەڭبەك جانە الەۋمەتتىك قورعاۋ مينيسترلىگى بەرۋى ءتيىس.  

"ءقازىر ءاربىر ايماقتاعى تومەنگى كۇنكورىس مولشەرى توقسان سايىن وزگەرەدى، ءار وڭىردە تۇرلىشە ەسەپتەلەدى. سوندىقتان، كومەك كولەمىن ناقتىلاۋ ءۇشىن مينيسترلىكتىڭ شەشىمىن كۇتەمىز. بۇل جاردەماقى ەل اۋماعىنداعى نەمەسە بەلگىلى ءبىر وبلىستاعى تومەنگى كۇنكورىس مولشەرىنە نەگىزدەلەدى"، -  دەيدى يننا فيلارەتوۆا.

ۇسىنعان: فاريزا جومارت قىزى