اتىراۋلىق “اقجايىق” باسىلىمى وسى اپتادا جايىق وزەنىندە قىرىلعان بالىقتار تۋرالى بىرنەشە ماقالا جاريالاعان. ولاردىڭ بىرىندە وزەندى ءولى بالىقتاردان تازارتۋعا جەرگىلىكتى تۇرعىنداردىڭ دا اتسالىسىپ جاتقانى ايتىلادى. 

ناۋرىزدىڭ 11ء-ى كۇنى جاريالاعان ماقالادا باسىلىم “ەڭ وپتيميست ساراپشىلاردىڭ بولجامى بويىنشا، بالىق قورىن 2018 جىلعى دەڭگەيگە دەيىن قالپىنا كەلتىرۋ ءۇشىن كەم دەگەندە ۇش-بەس جىل قاجەت” دەگەن ماماندار پىكىرىن كەلتىرگەن.

“ارينە، قىنجىلارلىق جاعداي. بالىق سالاسى ءۇشىن، بالىق اۋلاۋ ونەركاسىبى ءۇشىن بۇل قاسىرەت. ەڭ وپتيميستىك بولجام بويىنشا، بالىقتى قالپىنا كەلتىرۋ ءۇشىن كەم دەگەندە ءۇش جىل، قاراكوز ءۇشىن - 2-3 جىل، سازان، كوكسەركە، اقمارقا ءۇشىن 5 جىل قاجەت” دەگەن باسىلىمعا بالىق اۋلاۋ ونەركاسىبىنىڭ مامانى بوستان سۇلەيمەنوۆ.

جايىق-كاسپيي ورحۋس ورتالىعىنىڭ ديرەكتورى شىنار ىزتىلەۋوۆا باسىلىمعا بەرگەن سۇحباتىندا “مىندەتتى تۇردە تاۋەلسىز ساراپتاما قاجەت”، “بيلىك جۇرتقا اشىق اقپارات جەتكىزىپ وتىرۋى ءتيىس” دەپ ايتقان.

ال قازاقستاننىڭ باتىس وڭىرىنەن اقپارات تاراتاتىن Mgorod.kz سايتى اتىراۋ تۇرعىندارىنىڭ جايىق وزەنىنەن اۋلانعان بالىقتاردى ساتىپ الۋعا قاتتى قورقىپ وتىرعانىن جازعان.

“مۇناي استاناسىنداعى كوپ بازاردا بالىق باعاسىنىڭ جانىنا مىندەتتى تۇردە “قيعاش” (قيعاش وزەنىنەن اۋلانعان) دەپ جازىپ قوياتىن بولدى” دەپ جازدى باسىلىم.

بالىقتاردىڭ جاپپاي ءولۋى بىلتىر جەلتوقساننان بەرى ايتىلا باستادى. اۋىل شارۋاشىلىعى مينيسترلىگى اتىراۋدا 7-11 ناۋرىز كۇندەرى جايىق وزىنەن 3،1 توننا ءولى بالىقتان تازارتقانىن حابارلاعان.

اتىراۋ وبلىستىق پوليسيا دەپارتامەنتى بالىق قىرىلۋىنا بايلانىستى "بوتەن بىرەۋدىڭ مۇلكىن ابايسىزدا جويۋ نەمەسە ءبۇلدىرۋ" (204-باپ، 2ء-بولىم) جانە "سۋدى لاستاۋ، قوقىستاۋ نەمەسە سارقۋ" (328-باپ) باپتارى بويىنشا ەكى قىلمىستىق ءىس قوزعاعانىن مالىمدەدى.

15 ناۋرىزدا اقپارات جانە قوعامدىق دامۋ ءمينيسترى داۋرەن ابايەۆ مەملەكەتتىك "حابار" ارناسىنا بەرگەن سۇحباتىندا "جايىق وزەنىندەگى بالىقتىڭ جاپپاي قىرىلۋى بويىنشا ءتورت كومپانيانىڭ كۇدىككە ىلىنگەنىن" ايتقان.

ونىڭ سوزىنشە، ارناۋلى كوميسسيا "بالىقتار قىرىلۋىنا حيميالىق ۋلانۋ سەبەپ بولدى" دەگەن قورىتىندىعا كەلگەن.

ۇسىنعان: فاريزا جومارت قىزى