بەلگىلى بوكسشى قانات يسلام بيىلعى ناۋرىز مەيرامىن استانا حالقىمەن بىرگە قارسى الدى. اقش-تا جاتتىعىپ جۇرگەن سپورتشى ەلورداعا ارنايى كەلىپ، ەلدەگى وزگەرىستەرگە قاتىستى ءبىر اۋىز پىكىرىن ءبىلدىردى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

بوكسشىنىڭ قازاقستاندا ناۋرىز مەيرامىن تويلاماعانىنا ءۇش-تورت جىل بولىپ قالعان.

"ەلورداعا ەلباسىمىزدىڭ اتى بەرىلىپ، ۇلكەن تاريحي ساتتەر بولىپ جاتىر ەكەن. ەلباسى ماڭىزدى شەشىم قابىلداپ، بارشا حالىق پەن الەمنىڭ كوكەيىندەگى سۇراقتى ءبىر مەزەتتە شەشتى. وسىلايشا، ول كىسى تاعى ءبىر مارتە ءوزىنىڭ باتىرلىعىن، مىنەزىن كورسەتتى"، - دەدى يسلام.

سپورتشى نۇرسۇلتان نازاربايەۆتىڭ پرەزيدەنتتىك وكىلەتتىگىن توقتاتاتىنىن ۇيدە وتىرىپ ەستىگەن.

"شىنىن ايتقاندا، دۇنيە توقتاپ قالعانداي سەزىم بولدى. حالىق تا، ءوزىمىز دە ۇيرەنىپ قالدىق قوي. دەسە دە، اللاعا شۇكىر، جاس بۋىننىڭ ءوسىپ كەلە جاتقانىنا، ەلباسىنىڭ سولارعا باتاسىن بەرگەنىنە قۋانىشتىمىن"، - دەپ اعىنان جارىلدى بوكسشى.

سونىمەن قاتار، ول شارشى الاڭعا قاشان ورالاتىنىن دا ايتتى.

"استانا كۇنىنە ۇلكەن جەكپە-جەك جوسپارلاپ وتىرمىز. جاستار جىلىندا قازاقتىڭ ون ەكى باتىرىنىڭ قۇرمەتىنە جەكپە-جەكتەر ۇيىمداستىرامىز. تاريحتا قالعان اتا-بابالاردىڭ ەسىمىن جاڭعىرتساق، ەرتەڭگى كۇنى جاس ۇرپاق ءبىزدىڭ دە ەسىمىمىزدى جاڭعىرتادى"، - دەدى يسلام.

الداعى جەكپە-جەكتىڭ وتەتىن ورنى ءالى ناقتىلانباعان، ءبىراق الماتىدا بولىپ قالۋى ابدەن مۇمكىن، دەدى ول.

ۇسىنعان: اسەل بولات قىزى