ءۆيلنيۋستىڭ ايماقتىق سوتى 1991 جىلعى 13 قاڭتاردا ەل استاناسىندا ورىن العان وقيعاعا قاتىستى تەرگەۋ جۇمىستارىن اياقتادى. ءويتىپ سوت  ۇكىمىمەن سسرو-نىڭ بۇرىنعى قورعانىس ءمينيسترى، كەڭەس وداعىنىڭ سوڭعى مارشالى دميتريي يازوۆتى ون جىلعا سوتتالدى.

سونداي-اق كەڭەس وداعىنىڭ بۇرىنعى وفيسەرى، «الفا» توبىنىڭ ەكس-كومانديرى جانە زاپاستاعى پولكوۆنيك ميحايل گولوۆاتوۆ  12 جىلدىق جازاسىن الدى. ءبىراق ەكەۋى دە رەسەيدە تۇراتىندىقتان ولارعا ۇكىم سىرتتاي شىعارىلدى.

ايتا كەتەيىك، 1990 جىلدىڭ 11 ناۋرىزى كۇنى ليتۆانىڭ جوعارى كەڭەسى ءوزىنىڭ تاۋەلسىزدىگىن قالپىنا كەلتىرۋ تۋرالى قاۋلىنى جاريا ەتكەنى بەلگىلى. الايدا رەسمي ماسكەۋ مۇنى قابىل المادى. ەكى جاقتى تارتىس كەلەر جىلعا دەيىن ءوربىدى. 1991 جىلدىڭ قاڭتار ايىندا ليتۆادا قارسىلىق اكسياسى كۇشەيدى. وسىعان بايلانىستى 13 قاڭتاردا ەلگە رەسمي ماسكەۋ اسكەر كىرگىزدى. مىنە ودان بەرى 28 جىل ۋاقىت وتسە دە، سوت، تەرگەۋ جۇمىستارى ءالى جالعاسىپ جاتىر. 2016 جىلى قارقىن العان سوتقا، ءسويتىپ ءۇش جىلدان كەيىن نۇكتە قويىلدى. سوت ليتۆاداعى اسكەري ارناۋلى قۇرىلىمدىق كۇشتى باسقارعان گەنناديي يۆانوۆ پەن يۋريي مەلدى  4 جانە 7 جىلعا كەستى. ول ەكەۋى بىرنەشە جىلدان بەرى ليتۆانىڭ تەرگەۋ يزولياتورىندا قامالىپ وتىر. اسكەريلەرمەن قاقتىعىستىڭ سالدارىنان 14 ادام قازا تاۋىپ، 600 ادام جاراقات العانى بەلگىلى.

ليتۆا پروكۋراتۋراسى «قازا تاپقان ادامداردى كەڭەس ساربازدارى ءولتىردى» دەپ وتىر، ءبىراق قانداي دا ءبىر ناقتى دالەلدەمەلەرى جوق. ءسويتىپ ءۇش جىلعا سوزىلعان تەرگەۋ ىسىنە اقىرى نۇكتە قويىلدى. ءبىراق سسرو-نىڭ بۇرىنعى قورعانىس ءمينيسترى دميتريي يازوۆ مۇنى شىبىن شىققان قۇرلى كورىپ وتىرعان جوق. ويتكەنى ول ەشكىمنىڭ قولى جەتە بەرمەيتىن ماسكەۋدە، ۇيىندە وتىر.