سەنات وتىرىسىندا جوعارى پالاتا ءتورايىمى داريعا نازاربايەۆا قوجامجاروۆتى سەنات دەپۋتاتى بولىپ تاعايىندالۋىمەن قۇتتىقتادى دەپ حابارلايدى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الا وتىرىپ.
جۋىردا سەنات دەپۋتاتى بولعان بۇرىنعى باس پروكۋرور قايرات قوجامجاروۆ انت بەردى
بۇگىن سەناتتىڭ جالپى وتىرىسىندا جوعارى پالاتا ءتورايىمى داريعا نازاربايەۆا قايرات قوجامجاروۆتى سەنات دەپۋتاتى بولىپ تاعايىندالۋىمەن قۇتتىقتادى.
"قايرات پەرنەش ۇلى بىلىكتى جانە تاجىريبەلى زاڭگەر رەتىندە سەناتتىڭ زاڭ شىعارۋشىلىق قىزمەتىنە بەلسەندى تۇردە ارالاسىپ، قوماقتى ۇلەس قوسادى دەپ سەنەمىز"، - دەدى سەناتتىڭ جاڭا ءتورايىمى.
بەلگىلەنگەن ءتارتىپ بوينىشا جاڭادان تاعايىندالعان دەپۋتات پالاتا وتىرىسىندا انت بەردى.
"قازاقستان حالقىنا ادال قىزمەت ەتۋگە، قازاقستاننىڭ تۇتاستىعى مەن تاۋەلسىزدىگىن نىعايتۋعا، ونىڭ كونستيۋتسياسى مەن زاڭدارىنا قاتاڭ باعىنۋعا، دەپۋتاتتىڭ وزىمە جۇكتەلگەنە مارتەبەلى مىندەتتەرىن ادال اتقارۋعا انت بەرەمىن"، - دەدى قوجامجاروۆ.
"بۇگىن بەرگەن انتقا ادال بولىپ، قىزمەتىڭىزدىڭ تابىستى بولۋىنا تىلەكتەسپىز"، - دەدى داريعا نازاربايەۆا.
سونىمەن قاتار، قوجامجاروۆ سەناتورلاردىڭ داۋىس بەرۋىمەن جوعارعى پالاتانىڭ حالىقارالىق قاتىناستار، قورعانىس جانە قاۋىپسىزدىك جونىندەگى تۇراقتى كوميتەتىنىڭ قۇرامىنا كىردى.
بۇعان قوسا، سەنات وتىرىسىندا دەپۋتات دارحان ساتىبالدىنىڭ وكىلەتتىگى توقتاتىلدى.
جاقىندا ساتىبالدى قازاقستاننىڭ وزبەكستانداعى توتەنشە جانە وكىلەتتى ەلشىسى بولىپ تاعايىندالعان ەدى.
ۇسىنعان: فاريزا جومارت قىزى
